(vovworld) - ປີ 2011 ຂະແຫນງຕຳແຜ່ນຕັດຫຍິບຫວຽດນາມ ບັນລຸວົງເງິນສົ່ງອອກ 14 ຕຶ້ USD ເພີ່ມຂຶ້ນ 30% ເມື່ອທຽບກັບປີ 2010. ກ້າວເຂົ້າສູ່ປີ 2012 ເຖິງວ່າ ບັນດາຜູ້ຊ່ຽວຊານດ້ານເສດຖະກິດໃຫ້ຂໍ້ສັງເກດວ່າ ປີນີ້ຍັງປະສົບກັບຄວາມຫຍຸ້ງຍາກຫລາຍປະການຍ້ອນຜົນກະທົບຈາກສະພາບ ເສດຖະກິດໂລກກໍຕາມ, ແຕ່ເຄື່ອງຕຳແຜ່ນຕັດຫຍິບຫວຽດນາມຍັງຄົງ ສືບຕໍ່ຮັກສາທີ່ຕັ້ງສຳຄັນໃນຂົງເຂດສົ່ງອອກຢູ່.
ໃນຊຸມປີມໍ່ໆມານີ້, ເຖິງວ່າ ຖືກຜົນສະທ້ອນຫລາຍຢ່າງຍ້ອນການຊຸດໂຊມຂອງພື້ນຖານເສດຖະກິດທົ່ວໂລກກໍຕາມ ແຕ່ຂະແຫນງຕຳແຜ່ນຕັດຫຍິບຫວຽດນາມ ຍັງຄົງບັນລຸວົງເງິນສົ່ງອອກຫລາຍພໍສົມຄວນ ແລະ ແມ່ນຫນຶ່ງໃນຈຳນວນ 5 ຂະແຫນງ, ຂົງເຂດ ເຊິ່ງຍາມໃດກໍນຳຫນ້າກ່ຽວກັບວົງເງິນສົ່ງອອກ. ຕາມຕົວເລກສະຖິຕິຈາກສະຫະສະມາຄົມເຄື່ອງຕຳແຜ່ນຕັດຫຍິບຫວຽດນາມແລ້ວ, ປີ 2010 ການສົ່ງອອກເຄື່ອງຕຳແຜ່ນຕັດຫຍິບຂອງຫວຽດນາມບັນລຸ 11,2 ຕຶ້ USD ແລະ ປີ 2011 ບັນລຸ ກວ່າ 13,5 ຕຶ້ USD, ປີ 2012 ເຄື່ອງຕຳແຜ່ນຕັດຫຍິບຫວຽດນາມວາງຄາດໝາຍບັນລຸວົງເງິນສົ່ງອອກໃຫ້ໄດ້ 15 ຕຶ້ USD, ເພີ່ມຂຶ້ນ 10 -12%. ເປັນຫນ້າສົນໃຈ ນັ້ນແມ່ນ ນັບແຕ່ຊຸມເດືອນຕົ້ນປີນີ້, ມີວິສາຫະກິດເຄື່ອງຕຳແຜ່ນຕັດຫຍິບຫວຽດນາມຫລາຍແຫ່ງມີໃບສັ່ງຊຶ້ສິນຄ້າ ໃນນັ້ນ 70% ວິສາຫະກິດມີໃບສັ່ງຊຶ້ເຄື່ອງຕຳແຜ່ນຕັດຫຍິບຈົນຮອດທ້າຍໄຕມາດ 1, ບາງວິສາຫະກິດມີໃບສັ່ງຊຶ້ດ້ວຍມູນຄ່າສູງຈົນຮອດທ້າຍປີແລ້ວ. ນີ້ແມ່ນກາລະໂອກາດທີ່ດີເພື່ອໃຫ້ຂະແຫນງຕຳແຜ່ນຕັດຫຍິບຫວຽດນາມ ສືບຕໍ່ຢືນຢັນທີ່ຕັ້ງການສົ່ງອອກຂອງຕົນ. ຕາມການຕີລາຄາຂອງສະຫະສະມາຄົມເຄື່ອງຕຳແຜ່ນຕັດຫຍິບຫວຽດນາມແລ້ວ, ປີຜ່ານມາເຖິງວ່າໃນສະພາບເສດຖະກິດໂລກປະສົບກັບຄວາມຫຍຸ້ງຍາກກໍຕາມ, ແຕ່ວົງເງິນສົ່ງອອກເຄື່ອງຕຳແຜ່ນຕັດຫຍິບຫວຽດນາມ ຍັງຄົງບັນລຸມູນຄ່າການເຕີບໂຕສູງ, ຍ້ອນບັນດາວິສາຫະກິດພາຍໃນປະເທດໄດ້ ສ້າງສາຍພົວພັນທີ່ດີ ແລະ ຄວາມໄວ້ເນື້ອເຊື່ອໃຈກັບບັນດາລູກຄ້າ. ຍ້ອນເຫດນັ້ນ, ການເຕີບໂຕໃນການສົ່ງອອກໄປຍັງບັນດາຕະຫລາດເດີມຮັກສາຄວາມເປັນປົກກະຕິຢູ່. ທ່ານນາງ ຫງວຽນທິແທນຮ່ວຽນ, ຜູ້ອຳນວຍການໃຫຍ່ບໍລິສັດຕັດຫຍິບ ເລກ 10 ໃຫ້ຮູ້ວ່າ:
“ມີບາງວິສາຫະກິດສົ່ງສິນຄ້າໄປຍັງຕະຫລາດໃຫ່ມ, ແຕ່ບໍລິສັດຕັດຫຍິບເລກ 10 ຍັງຄົງມີການເຕີບໂຕຢູ່ບັນດາຕະຫລາດເດີມຄື: ອາເມລິກາ, ອີຢູ ແລະ ຍີ່ປຸ່ນ ຫາກບໍ່ທັນຫັນໄປສູ່ຕະຫລາດອື່ນ. ຜ່ານນັ້ນ ສືບຕໍ່ຢືນຢັນກຳລັງຄວາມສາມາດແກ້ງແຍ້ງຂອງຕົນໃນບັນດາວິສາຫະກິດຕຳແຜ່ນຕັດຫຍິບເວົ້າລວມ.”
ເພື່ອຮັກສາລະດັບຈະເລີນເຕີບໂຕ, ຂະແຫນງຕຳແຜ່ນຕັດຫຍິບໄດ້ປະຕິບັດຫລາຍມາດຕະການເພື່ອຜ່ານຜ່າຄວາມຫຍຸ້ງຍາກ. ຄຽງຂ້າງການເປີດກວ້າງຕະຫລາດສົ່ງອອກ, ຂະແຫນງຕຳແຜ່ນຕັດຫຍິບຍັງເອົາໃຈໃສ່ເປັນພິເສດເຖິງການພັດທະນາຕະຫລາດພາຍໃນປະເທດ ແລະ ປະຕິບັດການສ້າງອົງປະກອບຂອງຂະແຫນງຄືນໃຫມ່. ຕາມການປະກາດຂອງສະຫະສະມາຄົມເຄື່ອງຕຳແຜ່ນຕັດຫຍິບຫວຽດນາມ (Vitas), ປີ 2011 ຂະແຫນງ ເຄື່ອງຕັດຫຍິບສ່ົງອອກເກີນດຸນ 6,5 ຕຶ້ USD, ເພີ່ມຂຶ້ນ 1,5 ຕຶ້ USD ເມື່ອທຽບໃສ່ປີ 2010. ດ້ວຍລະດັບສົ່ງອອກເກີນດຸນນີ້, ຂະແຫນງຕຳແຜ່ນຕັດຫຍິບໄດ້ຍົກອັດຕາສິນຄ້າຫວຽດນາມທີ່ນຳໃຊ້ພາຍໃນປະເທດຂຶ້ນເຖິງ 48%. ໃນເງື່ອນໄຂທີ່ການສົ່ງອອກຂອງທັງປະເທດມີການເຕີບເປັນຜົນລົບນັ້ນ, ບັນດາຄວາມມານະພະຍາຍາມຂອງຂະແຫນງຕຳແຜ່ນຕັດຫຍິບແມ່ນສິ່ງທີ່ຫນ້າຮັບຮູ້, ພິເສດແມ່ນໃນເງື່ອນໄຂທີ່ກຳລັງຊຶ້ຂອງຕະຫລາດຫລາຍແຫ່ງໃນໂລກຖືກຫລຸດລົງ ແລະ ວົງເງິນສົ່ງອອກບາງປະເພດສິນຄ້າຕົ້ນຕໍຂອງຫວຽດນາມລ້ວນແຕ່ຫລຸດລົງ. ທ່ານ ເລຕຽນເຈື່ອງ, ຮອງຜູ້ອຳນວຍການໃຫຍ່ກຸ່ມບໍລິສັດເຄື່ອງຕຳແຜ່ນຕັດຫຍິບຫວຽດນາມໃຫ້ຮູ້ວ່າ:
“ປີ 2010 ການສົ່ງອອກເກີນດຸນແຕ່ 4,6 - 4,7 ຕຶ້ USD, ປີຜ່ານມາບັນລຸ 6,5 ຕຶ້ USD ນັ້ນແມ່ນການດັດປັບອັນໃຫຍ່ຫລວງໃນມູນຄ່າສິນຄ້າພາຍໃນປະເທດ ແລະ ມູນຄ່າເພີ່ມຂອງຂະແຫນງຕຳແຜ່ນຕັດຫຍິບພາຍໃນປະເທດ. ຂ້າພະເຈົ້າຄິດວ່າ ໃນໄລຍະຍາວ ເຖິງວ່າ ລາຄາໃນຕະຫລາດໂລກອາດຈະດັດປັບໃຫ້ເພີ່ມຂຶ້ນ ຫລື ຖືກຫລຸດລົງກໍຕາມ ແຕ່ສິ່ງສຳຄັນສຳລັບເຄື່ອງຕຳແຜ່ນຕັດຫຍິບ ແມ່ນຈຳເປັນຕ້ອງ ກວດການ, ນັ້ນແມ່ນການສົ່ງອອກເກີນດຸນຈະນຳມາຊຶ່ງມູນຄ່າເສດຖະກິດສູງໃຫ້ທັງປະເທດ..”
ເຄື່ອງຕຳແຜ່ນຕັດຫຍິບຫວຽດນາມ
ພາບ:vietnam.vn
ໃນໄລຍະຜ່ານມາ, ເຖິງວ່າໄດ້ປະສົບກັບຄວາມຫຍຸ້ງຍາກກໍຕາມ, ແຕ່ບັນດາວິສາຫະກິດໄດ້ມີຄວາມມານະພະຍາຍາມດ້ວຍຕົນເອງເພື່ອຊອກຫາກາລະໂອກາດຢູ່ບັນດາຕະຫລາດໃຫມ່ຄື: ຈີນ, ສເກົາຫລີ, ອັງໂກລາ, ນິວເຢີແລນ, ອິນເດຍ, ລັດເຊຍ. ໃນຄວາມມານະພະຍາຍາມປ່ຽນແທນການນຳເຂົ້າຝ້າຍ, ແຜ່ນແພ, ເສັ້ນໄໝ ວັດຖຸດິບທີ່ມີມູນຄ່າຂຶ້ນເຖິງ 11 ຕຶ້ USD ໃນປີ 2011, ກຸ່ມບໍລິສັດຕຳແຜ່ນຕັດຫຍິບຫວຽດນາມ (Vinatex) ຫາກໍ ນຳຜະລິດຕະພັນຂອງໂຮງງານເສັ້ນໄໝ.Polyester ດີ່ງຫວູ (Dinh Vu) ເຂົ້າເຄື່ອນໄຫວໃນທ້າຍປີ 2011 ຄາດວ່າຈະຕອບສະຫນອງ ໄດ້ 40%. ຄວາມຕ້ອງການກ່ຽວກັບເສັ້ນໄໝໃຫ້ທັງປະເທດ, ປະກອບສ່ວນຫລຸດຜ່ອນການນຳເຂົ້າວັດຖຸດິບ ຈາກຕ່າງປະເທດ. ເລື່ອງຜະລິດວັດຖຸດິບໄດ້ເອງ, ໃນຊຸມປີຈະມາເຖິງ ຈະຊ່ວຍໃຫ້ຂະແຫນງຕຳແຜ່ນຕັດຫຍິບເປັນເຈົ້າການກວ່າໃນການເຊັນສັນຍາສ່ົງອອກສິນຄ້າດ້ວຍມູນຄ່າສູງ, ມີຄຸນຄ່າ ແລະ ສຳຄັນ ແມ່ນຫລຸດຜ່ອນຄວາມສ່ຽງ ແລະ ກຳລັງດັນເມື່ອມີການເໜັງຕີງລາຄາວັດຖຸດິບໃນຕະຫລາດໂລກ. ດ້ານອື່ນ, ບັນດາມາດຕະການຂອງຂະແຫນງຕຳແຜ່ນຕັດຫຍິບໃນຊຸມປີຈະມາເຖິງ ແມ່ນ ສຸມໃສ່ຍົກສູງອັດຕາສ່ວນຜະລິດສິນຄ້າສົ່ງອອກຕາມຮູບການ ຊຶ້ວັດຖຸດິບ ຂາຍຜະລິດຕະພັນສຳເລັດຮູບ (FOB) ແລະ ອອກແບບເອງ, ຜະລິດ ແລະ ຂາຍຜະລິດຕະພັນໃຫ້ແກ່ລູກຄ້າ (ODM). ຄາດໝາຍການສົ່ງອອກຂອງຂະແຫນງຕຳແຜ່ນຕັດຫຍິບປີ 2012 ບັນລຸໃຫ້ໄດ້ຕົວເລກ 15 ຕຶ້ USD. ເພື່ອບັນລຸ ຄາດໝາຍນີ້ໃຫ້ໄດ້ ຂະແຫນງຕຳແຜ່ນຕັດຫຍິບອາດຈະປະເຊີນຫນ້າກັບສິ່ງທ້າທາຍຫລາຍຢ່າງ ຍ້ອນວິກິດການເສດຖະກິດໂລກບໍ່ທັນຟື້ນຕົວເທື່ອ, ຫນິ້ສິນຂອງລັດຢູ່ ປະເທດ ເອີລົບ ຈຳນວນຫນຶ່ງ ຍັງບໍ່ທັນຢຸດຕິ. ເຖິງຢ່າງໃດກໍຕາມ ດ້ວຍບັນດາບົດຮຽນທີ່ຖອດຖອນມາໄດ້ໃນປີ 2011, ປີ 2012 ນີ້ ຂະແຫນງເຄື່ອງຕຳແຜ່ນຕັດຫຍິບ ພວມມານະພະຍາຍາມສູ້ຊົນບັນລຸຄາດໝາຍທີ່ໄດ້ວາງອອກ ແລະ ຫວັງວ່າຈະແມ່ນປີແຫ່ງການພັດທະນາດີພໍສົມຄວນ./.
ໂຕຕວັນ