(vovworld)- ໃນ 5 ເດືອນຕົ້ນປີ 2013, ສະພາບເສດຖະກິດຫວຽດນາມ ມີການຫັນປ່ຽນຢ່າງຕັ້ງຫນ້າຫລາຍຢ່າງ. ບັນດາດັດຊະນີກ່ຽວກັບເສດຖະກິດມະຫາພາກນັບມື້ນັບໄດ້ຮັບການປັບປຸງ ດ້ວຍບັນດາສັນຍານດີພໍສົມຄວນກວ່າ. ບັນດາໝາກຜົນດັ່ງກ່າວໄດ້ສະແດງໃຫ້ເຫັນວ່າ: ລັດຖະບານພວມເປັນເຈົ້າການບໍລິຫານ ແລະ ຄວບຄຸມໄພເງິນເຟີ້ສຳເລັດຜົນ.
ບົດລາຍງານຂອງລັດຖະບານ ຫວຽດນາມ ທີ່ວາລະປະຊຸມຂອງລັດຖະບານສະແດງໃຫ້ເຫັນວ່າ: ເສດຖະກິດສັງຄົມໃນ 5 ເດືອນຕົ້ນປີ 2013 ສືບຕໍ່ມີການຫັນປ່ຽນຢ່າງຖືກທິດ ແລະ ບັນລຸໝາກຜົນຫລາຍຢ່າງ. ໄພເງິນເຟີ້ໄດ້ຮັບການຄວບຄຸມ, ລາຄາສິນຄ້າໃນທ້ອງຕະຫລາດໄດ້ຮັກສາເປັນປົກກະຕິ. ດັດຊະນີລາຄາໃຊ້ສອຍ( CPI) ໃນເດືອນ 5/2013 ຫລຸດຜ່ອນ 0,06% . ໃນຂະນະນັ້ນ ໄລ່ລວມ 5 ເດືອນຕົ້ນປີ, ຍອດວົງເງິນສົ່ງອອກຄາດວ່າບັນລຸເກືອບ 50 ຕື້ USD, ເພີ່ມຂຶ້ນກວ່າ 15% ເມ່ືອທຽບໃສ່ໄລຍະດຽວກັນຂອງປີກາຍ. ເງິນລົງທຶນຂອງຕ່າງປະເທດ (ຫລື FDI) ຈົດທະບຽນຄາດວ່າບັນລຸປະມານ 8,52 ຕື້ USD, ເພີ່ມຂຶ້ນ 8,9% ເມື່ອທຽບໃສ່ໄລຍະດຽວກັນຂອງປີກາຍ. ສ່ວນທຶນປະຕິບັດຄາດວ່າບັນລຸ 4,58 ຕື້ USD, ເພີ່ມຂຶ້ນ 1,6%. ຄຽງຄູ່ກັນນັ້ນ, ການຮັບປະກັນຊີວິດສັງຄົມຍັງຄົງເພີ່ມຂຶ້ນໃນສະພາບພື້ນຖານເສດຖະກິດຍັງປະສົບກັບຄວາມຫຍຸ້ງຍາກຫລາຍຢ່າງ. ຫນຶ່ງໃນບັນດາບັນຫາຊື່ງລັດຖະບານເອົາໃຈໃສ່ຊີ້ນຳໃນໄລຍະຜ່ານມາ, ນັ້ນແມ່ນຕະຫລາດອະສັງຫາລິມະຊັບກ່ຽວຂ້ອງໂດຍກົງເຖິງຂົງເຂດຈັດແບ່ງເຮືອນຢູ່ສັງຄົມໄດ້ຮັບການປົວແປງຢ່າງເຫັນໄດ້ຊັດ. ກ່ຽວກັບບັນຫານີ້, ທ່ານ ຈີ້ງດີງຢູງ, ລັດຖະມົນຕີກະຊວງກໍ່ສ້າງຢືນຢັນວ່າ:
“ພວກຂ້າພະເຈົ້າພວມຄິດໄລ່ແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ ດ້ວຍການປະຕິບັດຍຸດທະສາດເຮືອນຢູ່ແຫ່ງຊາດຊື່ງນາຍົກລັດຖະມົນຕີໄດ້ເຊັນອະນຸມັດ. ນີ້ແມ່ນວິທີປະຕິບັດຢ່າງຖືກທິດເພື່ອສ້າງຄວາມດຸນດຽງລະຫວ່າງການສະຫນອງ ແລະ ຄວາມຕ້ອງການ, ເພື່ອຕອບສະຫນອງຄວາມຕ້ອງການດ້ານເຮືອນຢູ່ໃຫ້ແກ່ປະຊາຊົນ. ປະຈຸບັນ ມີ 56 ໂຄງການຫັນປ່ຽນຈາກເຮືອນຢູ່ການຄ້າໄປສູ່ເຮືອນຢູ່ສັງຄົມໄດ້ຮັບການລົງມືກໍ່ສ້າງ. ພ້ອມກັນນັ້ນ ທະນາຄານແຫ່ງລັດ ໄດ້ມີຄຳສັ່ງແນະນຳຜັນຂະຫຍາຍບ້ວງສິນເຊື່ອ 30.000 ຕື້ດົ່ງ ບໍ່ພຽງແຕ່ຫນູນຊ່ວຍຕະຫລາດອະສັງຫາລິມະຊັບໂດຍກົງເທົ່ານັ້ນ ຫາກຍັງໃຫ້ຜູ້ທຸກຍາກໄດ້ກູ້ຢືມທຶນເພື່ອຊື້ເຮືອນຢູ່ອີກດ້ວຍ.”
ພາບປະກອບ:internet
|
ຄຽງຄູ່ກັບບັນດາໝາກຜົນທີ່ບັນລຸໄດ້, ລັດຖະບານກໍໄດ້ຊີ້ອອກບັນດາຂໍ້ຈຳກັດຊື່ງພື້ນຖານເສດຖະກິດຄວນສຸມໃສ່ແກ້ໄຂ. ນັ້ນແມ່ນຂົງເຂດກະສິກຳ, ປ່າໄມ້, ສິນໃນນ້ຳ ແລະ ອຸດສາຫະກຳ, ການກໍ່ສ້າງຍັງປະສົບກັບຄວາມຫຍຸ້ງຍາກ. ຄວາມຜິດໂຕນລະຫວ່າງອັດຕາດອກເບ້ຍເງິນຝາກ ແລະ ອັດຕາດອກເບ້ຍໃຫ້ກູ້ຢືມຖືກຮັດແຄບຢ່າງຊັກຊ້າ. ວິວັດການສ້າງໂຄງປະກອບທະນາຄານການຄ້າຄືນໃຫມ່, ສະພາບແກ້ໄຂຫນີ້ເສຍໃນລະບົບທະນາຄານກໍຄືການແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ ຍັງຊັກຊ້າຢູ່. ເພື່ອສືບຕໍ່ຢືດໝັ້ນຈຸດໝາຍຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ພວກເຮົາທັງຮັກສາເສດຖະກິດມະຫາພາກເປັນປົກກະຕິ ທັງຄວບຄຸມໄພເງິນເຟີ້, ແຕ່ຕ້ອງແກ້ໄຂຄວາມຫຍູ້ງຍາກ, ຊຸກຍູ້ການຜະລິດດຳເນີນທຸລະກິດລົງທຶນເພື່ອບັນລຸລະດັບເຕີບໂຕ. ແຕ່ຕ້ອງເຕີບໂຕແບບຍືນຍົງ ຫາກບໍ່ປະໃຫ້ໄພເງິນເຟີ້ເກີດຂຶ້ນຄືນໃຫມ່ ຫລືໄປຝືນກັບວິວັດການສ້າງໂຄງປະກອບຄືນໃຫມ່”
ຕາມທິດດັ່ງກ່າວ, ລັດຖະບານຊີ້ນຳບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆຢູ່ ຫວຽດນາມ ສຸມໃສ່ແກ່ໄຂເລື່ອງຊັກຊ້າໃນການປະຕິບັດບັນດາມາດຕະການຂອງລັດຖະບານເຂົ້າຊີວິດຕົວຈິງ. ກະຊວງການເງິນປະຕິບັດຖືກກັບແຜນລາຍຮັບລາຍຈ່າຍງົບປະມານຕິດພັນກັບການປະຢັດລາຍຈ່າຍ. ທະນາຄານແຫ່ງລັດຍູ້ແຮງການຜັນຂະຫຍາຍບັນດາມາດຕະການແກ້ໄຂຫນີ້ເສຍ. ສືບຕໍ່ຮັກສາລາຄາໃຫ້ເປັນປົກກະຕິ, ຫລຸດຜ່ອນອັດຕາດອກເບ້ຍໃຫ້ແກ່ບັນດາຂົງເຂດບຸລິມະສິດ, ພິເສດແມ່ນເພີ່ມສິນເຊື່ອໃຫ້ບັນດາຂົງເຂດບຸລິມະສິດ, ມີສົ້ນອອກ, ມີຕະຫລາດຈຳຫນ່າຍຄື: ກະສິກຳ, ອຸດສາຫະກຳຫນູນຊ່ວຍ, ບັນດາຂະແຫນງນຳໃຊ້ແຮງງານຫລາຍ, ມີການແຜ່ຂະຫຍາຍຢ່າງກວ້າງຂວາງ, ກະທົບຢ່າງແຮງເຖິງການພັດທະນາເສດຖະກິດສັງຄົມຂອງປະເທດຊາດ. ດ້ານອື່ນ, ເອົາໃຈໃສ່ເຖິງການຫນູນຊ່ວຍ, ຊຸກຍູ້ການພັດທະນາການຜະລິດກະສິກຳ, ເພາະວ່າ ນີ້ແມ່ນເສົາຄ້ຳຂອງພື້ນຖານເສດຖະກິດ, ໃນນັ້ນ ສ້າງເງື່ອນໄຂສະດວກຊ່ວຍຊາວກະສິກອນໄດ້ກູ້ຢືມທຶນເພື່ອພັດທະນາການຜະລິດ ແລະ ສືບຕໍ່ປະຕິບັດບັນດານະໂຍບາຍຫນູນຊ່ວຍອື່ນສຳລັບຊາວກະສິກອນເປັນຢ່າງດີ, ຫລີກລ້ຽງບໍ່ໃຫ້ເກີດຄວາມເສຍຫາຍດ້ານເສດຖະກິດ. ຕາມການຊີ້ນຳຂອງລັດຖະບານແລ້ວ, ບັນດາທ້ອງຖິ່ນສືບຕໍ່ແກ້ໄຂຄວາມຫຍຸ້ງຍາກໃຫ້ແກ່ບັນດາວິສາຫະກິດ,ໃນນັ້ນ ສະຫງວນບຸລິມະສິດທຶນໃຫ້ກະສິກຳ ແລະ ບັນດາຜະລິດຕະພັນກະເສດທີ່ຕະຫລາດຕ້ອງການ, ພ້ອມທັງເພີ່ມທະວີການສົ່ງເສີມດ້ານການຄ້າ, ເປີດກວ້າງຕະຫລາດສົ່ງອອກ. ຄຽງຄູ່ກັບບັນດາມາດຕະການໃນຕໍ່ຫນ້າ, ບັນດາທ້ອງຖິ່ນສືບຕໍ່ຍູ້ແຮງແຜນຮ່າງສ້າງໂຄງປະກອບລັດວິສາຫະກິດຄືນໃຫມ່, ສ້າງໂຄງປະກອບສິນເຊື່ອຄືນໃຫມ່ ແລະ ສ້າງໂຄງປະກອບການລົງທຶນຂອງລັດຄືນໃຫມ່. ພ້ອມກັບການປະຕິບັດບັນດາໂຄງການຮັບປະກັນຊີວິດສັງຄົມຢ່າງຄົບຖ້ວນ, ລັດຖະບານຫວັງວ່າ: ໃນຊຸມເດືອນຍັງເຫລືອຂອງປີນີ້ ຈະສືບຕໍ່ປະຕິບັດຈຸດໝາຍຮັກສາເສດຖະກິດມະຫາພາກເປັນປົກກະຕິສຳເລັດຜົນ, ຄວບຄຸມໄພເງິນເຟີ້, ສ້າງປະຖົມປັດໃຈໃຫ້ແກ່ການພັດທະນາແບບຍືນຍົງ.