(VOVWORLD) - ຍາມລະດູໃບໄມ້ຫຼົ່ນກໍແມ່ນຈຸດເວລາສວຍງາມທີ່ສຸດໃນປີ ເພື່ອໃຫ້ແຂກທ່ອງທ່ຽວຮັບຊົມທັດສະນີຍະພາບ “ລະດູເຂົ້າສຸກເຫຼືອງ”.
ໃນໄລຍະເວລາແຕ່ເດືອນ ກັນຍາ ຫາເດືອນຕຸລາຂອງແຕ່ລະປີ, ຢູ່ຫຼາຍສະຖານທີ່ໃນເຂດທາງຕາເວັກອອກ - ຕາເວັນຕົກພາກເໜືອ, ເຂດທົ່ງພຽງພາກເໜືອ ຫວຽດນາມ ແມ່ນຮອດຍາມເຂົ້າສຸກເຫຼືອງ, ບັນດາເນື້ອທີ່ນາຂັ້ນໄດໄດ້ປ່ຽນເປັນສີເຫຼືອງອາຮາມ ງາມຕາດັ່ງໃນຝັນ.
1. ຮວ່າງຊູຟີ (ຮ່າຢາງ)
ນາຂັ້ນໄດ ຮວ່າງຊູຟີ ໄດ້ຮັບການຮັບຮອງວ່າ ເປັນມໍລະດົກທັດສະນີຍະພາບລະດັບຊາດຢູ່ ຫວຽດນາມ ເມື່ອປີ 2012 ແລະ ແມ່ນສະຖານທີ່ທ່ອງທ່ຽວທີ່ມີຊື່ສຽງຢູ່ແຂວງ ຮ່າຢາງ.
 (ນາຂັ້ນໄດ ຮວ່າງຊູຟີ, ຮ່າຢາງ: ພາບ: VOV) |
ຈຸດເວລາເໝາະສົມທີ່ສຸດ ເພື່ອຮັບຊົມທົ່ງນາສຸກເຫຼືອງ ຢູ່ທີ່ນີ້ ແມ່ນຍາມເດືອນ ກັນຍາ, ນາຂັ້ນໄດ ແຕ່ລະຂັ້ນກໍພາກັນປ່ຽນເປັນສີເຫຼືອງອາຮາມ, ເປັນໜ້າຈັບອົກຈັບໃຈຫຼາຍ.
 ເມື່ອຢືນຢູ່ທ່າມກາງທັດສະນີຍະພາບທີ່ໃຫຍ່ໂຕມະໂຫຖານ, ພູຜາປ່າໄມ້ສະຫຼັບຊັບຊ້ອນຂອງ ຮ່າຢາງ, ນາຂັ້ນໄດ ຢູ່ຮວ່າງຊູຟີ ຄືດັ່ງພາບສິລະປະກຳອັນໂດດເດັ່ນຢ່າງແທ້ຈິງ, ເຊິ່ງເປັນບັນຍາກາດ ແລະ ຄວາມຮູ້ສຶກທີ່ຍາກຈະຫຼົງລື່ມໄດ້ (ພາບ: VOV) |
2. ໝູ່ກາງຈາຍ (ອຽນບາຍ)
ນາຂັ້ນໄດໝູ່ກາງຈາຍ ນອນຢູ່ເນີນພູສາຍຕ່າງໆ ທີ່ມີເນື້ອທີ່ປະມານ 2.200 ເຮັກຕາ. ມີຫຼາຍສະຖານທີ່ເປັນໜ້າຈັບໃຈ ເພື່ອໃຫ້ແຂກມາຮັບຊົມນາຂັ້ນໄດໝູ່ກາງຈາຍ ເປັນຕົ້ນແມ່ນ ຮ່ອມພູຕູເລະ, ລາປານເຕິນ, ກິ່ວເຂົາຟ້າ.
 (ພາບ: hanoimoi.vn) |
ເມື່ອມາແຫ່ງນີ້, ແຂກທ່ອງທ່ຽວສາມາດຖ່າຍຮູບເປັນທີ່ລະນຶກກ່ຽວກັບພາບນາຂັ້ນໄດທີ່ມີຮູບຊົງຄື ພາເຂົ້າໜຽວ ງາມຫຼາຍ.
 (ພາບ: VOV) |
3. ຕູເລະ (ອຽນບາຍ)
ເມື່ອປຽບທຽບກັບ ໝູ່ກາງຈາຍ, ບັນດາທົ່ງນາຢູ່ຕູເລະ ເຖິງວ່າບໍ່ໃຫຍ່ໂຕມະໂຫຖານ ກໍຕາມ, ແຕ່ ຕູເລະ ມີຄວາມດູດດື່ມສະເພາະຂອງຕົນ. ບັນດາທົ່ງເຂົ້າໜຽວຍາມສຸກຢູ່ ຕູເລະ ໄດ້ສົ່ງກິ່ນຫອມຫວນ ເຮັດໃຫ້ແຂກທ່ອງທ່ຽວຫຼາຍຄົນຫຼົງໄຫຼ.
 (ພາບ: TTXVN) |
ຕາມປົກກະຕິແລ້ວ, ໃນລະດູໃບໄມ້ຫຼົ່ນ, ບັນດາທົ່ງເຂົ້າໜຽວສຸກເຫຼືອງ ສະຫຼັບກັບທົ່ງນາຂຽວອຸ່ມທຸມຂອງລະດູການຜະລິດທີ່ແຕກຕ່າງກັນ ກໍເປັນຈຸດເວລາທີ່ດຶງດູດແຂກທ່ອງທ່ຽວຫຼາຍທີ່ສຸດ.
 (ພາບ: ແອັງຕວັນ) |
4. ຊາປາ (ລາວກາຍ)
ໂດຍເປັນສະຖານທີ່ທ່ອງທ່ຽວທີ່ມີຊື່ສຽງຢູ່ເຂດພູດອຍທາງທິດຕາເວັນຕົກພາກເໜືອ ຫວຽດນາມ, ເມື່ອລະດູໃບໄມ້ຫຼົ່ນວຽນມາ, ຊາປາ (ລາວກາຍ) ບໍ່ພຽງແຕ່ດຶງດູດແຂກທ່ອງທ່ຽວຍ້ອນມີອາກາດ ທີ່ເຢັນສະບາຍເທົ່ານັ້ນ ຫາກຍັງຍ້ອນບັນດາເນື້ອທີ່ນາຂັ້ນໄດທີ່ພວມສຸກເຫຼືອງອາຮາມອີກດ້ວຍ.
 (ພາບ: TTXVN) |
 (ພາບ: TTXVN) |
ສິ່ງທີ່ດູດດື່ມໃນການທ່ອງທ່ຽວຊາປາແມ່ນ ແຂກທ່ອງທ່ຽວສາມາດ ເລືອກເອົາບ່ອນ ພັກເຊົ່າ, ໂຮມສະແຕ ຕາມໃຈມັກ ຍ້ອນວ່າ ບັນດາການບໍລິການທ່ອງທ່ຽວຢູ່ທີ່ນີ້ພັດທະນາໄວກວ່າສະຖານທີ່ອື່ນໆ
 (ພາບ: TTXVN) |
5. ບັກເຊີນ (ລ້າງເຊີນ)
ລະດູເຂົ້າສຸກເຫຼືອງ ຢູ່ ບັກເຊີນ ກໍແມ່ນຈຸດເວລາທີ່ອາກາດຢູ່ທີ່ນີ້ໄດ້ຮັບຖືວ່າ ງາມທີ່ສຸດໃນປີ, ສະດວກກັບການຄົ້ນຫາທໍາມະຊາດ ແລະ ຮັບຊົມທັດສະນີຍະພາບທີ່ທັງຈັບໃຈ ແລະ ໃຫຍ່ໂຕມະໂຫຖານຂອງພູຜາປ່າໄມ້.
 (ພາບ:VOV) |
ບັນດາທົ່ງນາສຸກເຫຼືອງ ຢູ່ ບັກເຊີນ ນອນຢູ່ສາຍພູຫີນປູນ, ໂດຍມີຊາວເຜົ່າ ໄຕ, ນຸ່ງ ແລະ ຢ້າວ ດໍາລົງຊີວິດ.
 (ພາບ: VOV) |
ນອກຈາກການຮັບຊົມຄວາມງາມຂອງລະດູເຂົ້າສຸກເຫຼືອງແລ້ວ, ນີ້ກໍຍັງແມ່ນໂອກາດເພື່ອໃຫ້ແຂກທ່ອງທ່ຽວຊອກຫາກ່ຽວກັບຈຸດຄວາມງາມທາງດ້ານວັດທະນະທໍາ, ເອກະລັກສະເພາະຂອງອາຫານການກິນຂອງພໍ່ແມ່ພີ່ນ້ອງບັນດາເຜົ່າຢູ່ທີ່ນີ້ອີກດ້ວຍ.
6. ປູລວງ (ແທັງຮວ໊າ)
ຫຼາຍປີມໍ່ໆມານີ້, ປູລວງ ໄດ້ກາຍເປັນສະຖານທີ່ຮູ້ຈັກກັນດີ ຍ້ອນວ່າເປັນສະຖານທີ່ທີ່ແຂກທ່ອງທ່ຽວຕ່າງປະເທດຫຼາຍຄົນມີຄວາມນິຍົມຊົມຊອບ.
 (ພາບ: laodong.vn) |
ແຂກທ່ອງທ່ຽວ ກໍສາມາດເລືອກ trekking ຂ້າມ ປູລວງ ເພື່ອຊົມທົ່ງນາສຸກເຫຼືອງ, ທັງຊອກຫາວັດທະນະທໍາ ແລະ ຮີດຄອງປະເພນີ ວິຖີຊີວິດຂອງຊາວທ້ອງຖິ່ນ.
 (ພາບ: laodong.vn) |
7.ຕາມກົກ- ບິກດົ້ງ ຢູ່ ນິງບິ່ງ
ຈຸດເວລາເໝາະສົມທີ່ສຸດເພື່ອຊົມທົ່ງນາສຸກເຫຼືອງຢູ່ ຕາມກົກ ແມ່ນແຕ່ເດືອນກັນຍາ ຫາເດືອນ ຕຸລາ.
 (ພາບ: hanoimoi.vn) |
ໂດຍຫ່າງຈາກ ຮ່າໂນ້ຍ ປະມານ 104 ກມ, ແຂກທ່ອງທ່ຽວສາມາດມາຢ້ຽມຢາມຖໍ້າແຫ່ງຕ່າງໆທີ່ເປັນເອກະລັກສະເພາະ ແລະ ເຊື່ອມຕົວເຂົ້າກັບບັນຍາກາດຢູ່ທົ່ງນາສຸກເຫຼືອງທີ່ສວຍງາມດັ່ງໃນຝັນ.
 (ພາບ: hanoimoi.vn) |
8. ອີຕີ (ລາວກາຍ)
ນີ້ກໍແມ່ນໜຶ່ງໃນບັນດາສະຖານທີ່ບໍ່ຄວນພາດໂອກາດແວ່ຢາມເມື່ອມາ ຮອດລາວກາຍ ໃນລະດູເຂົ້າສຸກເຫຼືອງ.
ໂດຍຖືກຂະໜານນາມວ່າ ທັດສະນີຍະພາບຢູ່ແດນສະຫວັນ ຕັ້ງຢູ່ທ່າມກາງພູຜາປ່າໄມ້ທີ່ໃຫຍ່ໂຕມະໂຫຖານ, ບັນດາເນື້ອທີ່ນາຂັ້ນໄດ ສຸກເຫຼືອງ ຊ້ອນຕົວໃນທາງກາງກຸ່ມເມກຂາວເລື່ອນລອຍຢູ່ກາງເວຫາ. ສະຖານທີ່ແຫ່ງນີ້ ແມ່ນຈຸດນັດພົບທີ່ໄດ້ຮັບຄວາມນິຍົມຊົມຊອບຈາກ ຜູ້ມັກຮັກນາຂັ້ນໄດ. /.