(ພາບປະກອບ: VGP)

        ອົງການສຶກສາວິທະຍາສາດ ແລະ ວັດທະນະທຳສປຊ (UNESCO) ໄດ້ເອົາຊື່ “ສິລະປະເຮັດເຄື່ອງປັ້ນດິນເຜົາຂອງຊາວເຜົ່າ ຈຳ” ເຂົ້າໃນບັນຊີລາຍຊື່ມໍລະດົກວັດທະນະທຳບໍ່ເປັນວັດຖຸຕ້ອງອະນຸລັກຮັກສາໂດຍດ່ວນ. ຂໍ້ຕົກລົງດັ່ງກ່າວເຊິ່ງອົງການ UNESCO ໄດ້ຮັບຮອງເອົາໃນຕອນບ່າຍວັນທີ 29 ພະຈິກ, ໃນຂອບເຂດກອງປະຊຸມຄັ້ງທີ 17 ຂອງຄະນະກຳມະການລະຫວ່າງລັດຖະບານສົນທິສັນຍາ 2003 ກ່ຽວກັບການອະນຸລັກຮັກສາມໍລະດົກວັດທະນະທຳບໍ່ເປັນວັດຖຸ, ເຊິ່ງຈັດຂຶ້ນແຕ່ທີ 28 ພະຈິກ ຫາວັນທີ 03 ທັນວາ, ຢູ່ນະຄອນຫຼວງ Rabat ຂອງ ມາໂຣກ. “ສິລະປະເຮັດເຄື່ອງປັ້ນດິນເຜົາຂອງຊາວເຜົ່າ ຈຳ” ແມ່ນມໍລະດົກວັດທະນະທຳບໍ່ເປັນວັດຖຸທີ 15 ຂອງ ຫວຽດນາມ ເຊິ່ງ ອົງການ UNESCO ເອົາຊື່ເຂົ້າໃນບັນຊີລາຍຊື່. ທ່ານນາງເອກອັກຄະລັດຖະທູດ ເລທິຮົ່ງເວິນ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ UNESCO, ໃຫ້ຮູ້ວ່າ ເຫດການດັ່ງກ່າວໄດ້ປະກອບສ່ວນໂຄສະນາໃຫ້ເພື່ອນມິດສາກົນກ່ຽວກັບມໍລະດົກວັດທະນະທຳເປັນເອກະລັກສະເພາະຂອງເຂດແຄມທະເລທາງຕອນໃຕ້ພາກກາງ ຫວຽດນາມ ແລະ ຊ່ວຍໃຫ້ພໍ່ແມ່ປະຊາຊົນບັນດາເຜົ່າ ແລະ ວົງຄະນະຍາດຊຸມຊົນແຂວງ ນິງທ້ວນ ແລະ ບິ່ງທ້ວນ ມີມາດຕະການຢ່າງແທດຈິງ ແລະ ມີປະສິດທິຜົນເພື່ອແນໃສ່ອະນຸລັກຮັກສາ, ເສີມຂະຫຍາຍຄຸນຄ່າສິລະປະຂອງອາຊີບເຮັດເຄື່ອງປັ້ນດິນເຜົາຂອງຊາວເຜົ່າ ຈຳ.