UNICEF ສະເໜີ 4 ຂົງເຂດບຸລິມະສິດຮ່ວມມືກັບກະຊວງສຶກສາ ແລະ ບຳລຸງສ້າງ ຫວຽດນາມ
(VOVWORLD) -ຕອນບ່າຍວັນທີ 12 ຕຸລາ, ທ່ານຮອງລັດຖະມົນຕີກະຊວງສຶກສາ ແລະ ບຳລຸງສ້າງຫວຽດນາມ ໂງທິມິນ ໄດ້ໃຫ້ການຕ້ອນຮັບທ່ານນາງ Lesley Miller ຮອງຫົວໜ້າຄະນະຜູ້ຕາງໜ້າ UNICEF ປະຈຳ ຫວຽດນາມ. ສອງຝ່າຍໄດ້ແລກປ່ຽນກ່ຽວກັບບັນດາເນື້ອໃນ ເພື່ອເພີ່ມທະວີການຮ່ວມມືໃນຂົງເຂດການສຶກສາ ແລະ ບຳລຸງສ້າງ.
 ທ່ານຮອງລັດຖະມົນຕີກະຊວງສຶກສາ ແລະ ບຳລຸງສ້າງຫວຽດນາມ ໂງທິມິນ ໃຫ້ການຕ້ອນຮັບທ່ານນາງ Lesley Miller ຮອງຫົວໜ້າຄະນະຜູ້ຕາງໜ້າ UNICEF ປະຈຳ ຫວຽດນາມ (ພາບ: VOV5) |
ທີ່ການເຮັດວຽກ, ທ່ານນາງ Lesley Miller ໄດ້ສະເໜີ 4 ຂົງເຂດບຸລິມະສິດຮ່ວມມືລະຫວ່າງ UNICEF ຫວຽດນາມ ແລະ ກະຊວງສຶກສາ ແລະ ບຳລຸງສ້າງ ຫວຽດນາມ, ເຊິ່ງລວມມີ: ນຳເຕັກໂນໂລຢີດີຈີຕອນເຂົ້າໃນຫຼັກສູດການສຶກສາພາກບັງຄັບ; ສ້າງຫຼັກສູດການສຶກສາໃໝ່ໃຫ້ແກ່ຊັ້ນອະນຸບານ; ຍົກສູງຄຸນນະພາບການສຶກສາ ແລະ ຮັບປະກັນຄວາມຍຸຕິທຳໃນການສຶກສາ; ສ້າງສະພາບແວດລ້ອມຮ່ຳຮຽນ ຂຽວ - ສະອາດ - ສວຍງາມ ແລະ ປອດໄພ.
ທ່ານນາງຮອງລັດຖະມົນຕີ ໂງທິມິນ ໄດ້ສະແດງຄວາມເຫັນດີເຫັນພ້ອມຕໍ່ຂໍ້ສະເໜີຮ່ວມມືຂອງ UNICEF ໃນໄລຍະຈະມາເຖິງ ເພື່ອແນໃສ່ສ້າງສະພາບແວດລ້ອມຮ່ຳຮຽນ ຂຽວ - ສະອາດ - ສວຍງາມ ແລະ ປອດໄພໃຫ້ແກ່ນັກຮຽນທຸກໆຄົນ.