(vovworld) – ວັນ​ທີ 4/3, ​ໃນ​ການ​ປະຊຸມ​ຂ່າວ​ສະ​ເພາະພາຍຫຼັງ​ຮອບ​ເຈລະຈາ​ຄັ້ງ​ທີ 7 ກ່ຽວ​ກັບ​ຂໍ້​ຕົກລົງ​ຄູ່​ເຈລະຈາດ້ານ​ການ​ເມືອງ ​ແລະ ການ​ຮ່ວມ​ມື​ລະຫວ່າງ ກູ​ບາ ​ແລະ ສະຫະພາບ ​ເອີ​ລົບ (ອີ​ຢູ), ທີ່​ເຄີຍ​ໄດ້​ຮັບ​ຖື​ວ່າ​​ແມ່ນ​ບາດ​ກ້າວ​ສ້າງ​ການ​ພົວພັນ 2 ຝ່າຍ​ເປັນ​ປົກກະຕິ​ຢ່າງ​ສົມບູນ, ຫົວໜ້າ​ຂອງ​ຄະນະ​ເຈລະຈາ​ທັງ 2 ຝ່າຍ​ລ້ວນ​ແຕ່​ສະ​ແດງ​ຄວາມ​ເພິ່ງ​ພໍ​ໃຈ ​ແລະ ຄວາມ​ປະ​ເອີ​ບ​ໃຈ.

        ທ່ານ​ລັດຖະມົນຕີ​ຊ່ວຍ​ວ່າການ​ກະຊວງ​ການ​ຕ່າງປະ​ເທດ ກູ​ບາ Abelardo Moreno ສະ​ແດງ​ຄວາມ​ຫວັງວ່າ​ພາຍຫຼັງ​ການ​ແລກປ່ຽນ​ຢ່າງ​ລະ​ອຽດ​ໃນ​ຊຸມ​ວັນ​ຈະ​ມາ​ເຖິງ, 2 ຝ່າຍ​ອາດ​ຈະ​ສິ້ນ​ສຸດ​ການ​ເຈລະຈາ​ກ່ຽວກັບ​ຂໍ້​ຕົກລົງ​ນີ້​ໃນ​ການ​ຢ້ຽມຢາມ ກູ​ບາ ຂອງຜູ້ຕາງໜ້າຂັ້ນ​ສູງ​ກ່ຽວ​ກັບ​ນະ​ໂຍບາຍ​ປ້ອງ​ກັນ​ຄວາມ​ສະຫງົບ ​ແລະ ພົວພັນ​ຕ່າງປະ​ເທດ​ຂອງ ອີ​ຢູ Federica Mogherini ​ເຊິ່ງຄາດ​ວ່າ​ຈະດຳ​ເນີນໃນ​ວັນ​ທີ 10 – 11/3 ຈະ​ມາ​ເຖິງ. ທ່ານ Moreno ​ເນັ້ນ​ໜັກ​ວ່າ: 2 ຝ່າຍ​ເຫັນ​ດີ​ເປັນ​ເອກະສັນ​ພັດທະນາ​ການ​ພົວພັນ​ໂດຍ​ອີງ​​ໃສ່​ຫຼັກການ​ເຄົາລົບ​ນັບຖື​ອະທິປະ​ໄຕ, ​ຜືນ​ແຜ່ນດິນ​ອັນ​ຄົບ​ຖ້ວນ, ​ເຄົາລົບ​ລັດຖະທຳ​ມະນູນ ​ແລະ ບັນດາ​ຂໍ້​ກຳນົດ​ກົດ​ໝາຍຂອງ​ກັນ. ສ່ວນ​ທ່ານ Chistian Leffler, ຮອງ​ເລຂາທິການ​ໃຫຍ່​ບັນດາ​ບັນຫາ​ເສ​ດຖະກິດ​​ ​ແລະ ທົ່ວ​ໂລກ​ຂອງ​ອົງການ​ການ​ຕ່າງປະ​ເທດ ອີຢູ, ຮັບ​ຮູ້ ຮອບ​ເຈລະຈາ​​ທີ່​ດຳ​ເນີນ​​ເປັນ​ເວລາ 2 ວັນ​ເຊິ່ງ​ຫາ​ກໍ​ສິ້ນ​ສຸດລົງ​ນັ້ນ​ແມ່ນ “ຕັ້ງໜ້າ” ​ແລະ 2 ຝ່າຍ​ບັນລຸ​ໄດ້​ຄວາມ​ເຫັນ​ດີ​ເຫັນ​ພ້ອມ​ຕໍ່​ບັນ​ດາ​ບັນຫາ​ສຳຄັນ​ທີ່​ສຸດ.