(ພາບປະກອບ: luatvietnam.vn)

ວັນທີ 22 ທັນວາ ແມ່ນວັນສະເຫຼີມສະຫຼອງວັນສ້າງຕັ້ງກອງທັບປະຊາຊົນ ຫວຽດນາມ ຄົບຮອບ 76 ປີ (22/12/1944 – 22/12/2020). 76 ປີ ຜ່ານມາ, ພາຍໃຕ້ການນຳພາໂດຍກົງໃນທຸກດ້ານຂອງພັກຄອມມິນິດ ຫວຽດນາມ, ໂດຍໄດ້ສືບທອດ ແລະ ເສີມຂະຫຍາຍມູນເຊື້ອຮັກຊາດ, ສິລະປະການທະຫານຂອງຊາດ ແລະ ໄດ້ຮັບຄວາມຮັກແພງ, ອຸ້ມຊູຊ່ວຍເຫຼືອຂອງປະຊາຊົນ, ການສະໜັບສະໜູນຈາກເພື່ອນມິດສາກົນ, ກອງທັບປະຊາຊົນ ຫວຽດນາມ ຍາມໃດກໍສະແດງໃຫ້ເຫັນຢ່າງຈະແຈ້ງເຖິງຄຸນນະທາດຂອງກອງທະຫານປະຕິວັດ, ພ້ອມກັບທົ່ວປວງຊົນຍາດເອົາໄຊຊະນະມາອັນຍິ່ງໃຫຍ່ໃນພາລະກິດແຫ່ງການຕໍ່ສູ້ເພື່ອປົດປ່ອຍຊາດ, ປົກປັກຮັກສາປະເທດຊາດ ແລະ ເຮັດຫຼ້ອນໜ້າທີ່ສາກົນ.

        ດ້ວຍຫົວຂໍ້ “ກອງທັບກຽມພ້ອມກ້າວໄປເຖິງກອງທັບຫຼວງ ແລະ ທັນສະໄໝ”, ບົດນຳໃນໜັງສືພິມກອງທັບປະຊາຊົນ ສະບັບອອກວັນທີ 22 ທັນວາ ໄດ້ເນັ້ນໜັກວ່າ: ຕໍ່ໜ້າບັນດາການປ່ຽນແປງຂອງໂລກ ແລະ ພາກພື້ນ, ຢືນຢູ່ຕໍ່ໜ້າບັນດາເງື່ອນໄຂ, ຄວາມຮຽກຮ້ອງຕ້ອງການໃໝ່ຂອງໜ້າທີ່ປົກປັກຮັກສາປະເທດຊາດ, ເລື່ອງສືບຕໍ່ສ້າງກອງທັບປະຕິວັດ, ກອງທັບຫຼວງ, ຊໍານານຮົບ, ທັນສະໄໝເທື່ອລະກ້າວ, ມຸ່ງໄປເຖິງການສ້າງກອງທັບຫຼວງ, ທັນສະໄໝໃນປີ 2030 ແມ່ນວິວັດການ ທີ່ຮຽກຮ້ອງຕ້ອງການທີ່ມີລັກສະນະແນ່ນອນຢ່າງພາວະວິໄສ.

        ສື່ເອເລັກໂຕນິກ ວິທະຍຸກະຈາຍສຽງ ຫວຽດນາມ, ວັນທີ 22 ທັນວາ ໄດ້ລົງບົດຂຽນ ຂອງທ່ານພັນເອກ ຫງວຽນວັນເຊົ້າ, ຮອງຫົວໜ້າສະຖາບັນປະຫວັດສາດການທະຫານ ຫວຽດນາມ ດ້ວຍຫົວຂໍ້ “ຫັນກອງທັບເປັນທັນສະໄໝ ເພື່ອປົກປັກຮັກສາປະເທດຊາດໃຫ້ໝັ້ນຄົງ “ແຕ່ຫົວທີ ແລະ ຈາກທາງໄກ””. ເປົ້າໝາຍຂອງການເພີ່ມທະວີກຳລັງແຮງໃນດ້ານປ້ອງກັນຊາດ ແລະ ຫັນກອງທັບປະຊາຊົນຫວຽດນາມ ເທື່ອລະກ້າວ ແມ່ນເພື່ອແນໃສ່ເປັນເຈົ້າການ, ຕັ້ງໜ້າສະກັດກັ້ນ, ບໍ່ປະໃຫ້ເກີດສົງຄາມ; ແຕ່ພ້ອມກັນນັ້ນ, ພ້ອມແລ້ວທີ່ຈະຕີຊະນະສັດຕູຜູ້ຮຸກຮານ ດ້ວຍອາວຸດເຕັກໂນໂລຢີສູງຂອງບັນດາກຳລັງເປັນປໍລະປັກ.