ກອງທັບປະຊາຊົນຫວຽດນາມຕ້ອງປົກປັກຮັກສາອະທິປະໄຕແຫ່ງຊາດ
(ກອງປະຊຸມສະຫຼຸບວຽກງານການທະຫານ, ປ້ອງກັນຊາດປີ 2014)
(vovworld) - ກອງທັບປະຊາຊົນຫວຽດນາມ ຕ້ອງປົກປັກຮັກສາອະທິປະໄຕແຫ່ງຊາດ ແລະ ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ. ນີ້ແມ່ນຄຳເຫັນຊີ້ນຳຂອງທ່ານນາຍົກລັດຖະມົນຕີ ຫງວຽນເຕິ໋ນຢຸງ ທີ່ກອງປະຊຸມສະຫຼຸບວຽກງານການທະຫານ, ປ້ອງກັນຊາດປີ 2014, ເຊິ່ງດຳເນີນຢູ່ຮ່າໂນ້ຍ ໃນຕອນເຊົ້າວັນທີ 23/12. ທ່ານນາຍົກລັດຖະມົນຕີ ຊີ້ແຈ້ງວ່າ, ຕໍ່ໜ້າສະພາບການໂລກພວມຜັນແປໄປຢ່າງສັບສົນຢູ່ທະເລຕາເວັນອອກ ແລະ ການຕ້ານທຳລາຍຂອງບັນດາອິດທິກຳລັງທີ່ເປັນປໍລະປັກນັ້ນ. ກອງທັບຫວຽດນາມ ຄວນສຸມໃສ່ແກ້ໄຂສິ່ງຈຳກັດ, ອ່ອນດ້ອຍ ທີ່ຍັງຄົງຄ້າງ, ເພື່ອສືບຕໍ່ເຮັດວຽກງານການທະຫານ, ປ້ອງກັນຊາດໃນປີ 2015 ໃຫ້ດີກວ່າອີກ. ທ່ານນາຍົກລັດຖະມົນຕີ ສະເໜີຄະນະພັກການທະຫານສູນກາງ, ກະຊວງປ້ອງກັນປະເທດໃກ້ຊິດກັບ 5 ຄາດໝາຍໃຫຍ່ຂອງປະເທດຊາດໃນປີ 2015, ຕ້ອງປະຕິບັດສຳເລັດ ແລະ ລື່ນກາຍແຜນການພັດທະນາເສດຖະກິດສັງຄົມທີ່ໄດ້ວາງອອກ, ປົກປັກຮັກສາອະທິປະໄຕແຫ່ງຊາດ, ພິເສດແມ່ນຢູ່ທະເລຕາເວັນອອກ, ຮັບປະກັນຄວາມໝັ້ນຄົງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ; ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ, ເພີ່ມທະວີຄວາມເຫັນດີເຫັນພ້ອມໃນສັງຄົມ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ສະເໜີວ່າ:
“ທີໜຶ່ງແມ່ນເສີມຂະຫຍາຍຜົນງານທີ່ບັນລຸໄດ້, ເຮັດວຽກງານກຳແໜ້ນສະພາບການໃຫ້ດີກວ່າ, ຈາກນັ້ນເປັນເສນາທິການໃຫ້ພັກ, ລັດ ກ່ຽວກັບວຽກງານການທະຫານ, ແລະ ປ້ອງກັນຊາດ. ທີສອງແມ່ນ, ກຳແໜ້ນສະພາບການ, ຄາດຄະເນບັນດາສະຖານະການທີ່ອາດຈະເກີດຂຶ້ນ, ກໍ່ສ້າງວິທີຮັບມືຢ່າງລະອຽດ ແລະ ຈັດຕັ້ງການຊ້ອມຮົບ. ຈາກນັ້ນອົບຮົມ, ກຽມພ້ອມສູ້ຮົບເພື່ອຮັບມືກັບສະພາບການ“.