ກອງປະຊຸມຜັນຂະຫຍາຍການປະຕິບັດມະຕິສູນກາງທີ 4 (ຊຸດທີ 11)
( ພາບ: cpv.org.vn ) (vovworld) - ຕອນເຊົ້າວັນທີ 28-3, ຢູ່ ຮ່າໂນ້ຍ, ຄະນະຂົນຂວາຍປະຊາຊົນສູນກາງໄດ້ຈັດຕັ້ງກອງປະຊຸມພະນັກງານຫຼັກແຫຼ່ງແນວໂຮມປະເທດຊາດ ແລະ ບັນດາອົງການຈັດຕັ້ງການເມືອງ - ສັງຄົມ ຢູ່ຂັ້ນສູນກາງ ຜັນຂະຫຍາຍການປະຕິບັດມະຕິຂອງກອງປະຊຸມຄະນະບໍລິຫານງານສູນກາງພັກຄັ້ງທີ 4 (ຊຸດທີ 11) ດ້ວຍຫົວຂໍ້ວ່າ ”ບາງບັນຫາອັນຮີບດ່ວນກ່ຽວກັບການກໍ່ສ້າງພັກໃນປະຈຸບັນ”. ກ່າວຄວາມເຫັນອັດກອງປະຊຸມ, ທ່ານນາງ Ha Thi Khiet, ເລຂາສູນກາງພັກ, ຫົວໜ້າຄະນະຂົນຂວາຍປະຊາຊົນສູນກາງຊີ້ແຈ້ງວ່າ, ໂດຍຜ່ານການແນະນຳ, ໂຄສະນາບັນດາເນື້ອໃນຂອງມະຕິ, ຄຳສັ່ງ, ແຜນການ ໄດ້ຊ່ວຍໃຫ້ກອງປະຊຸມພະນັກງານຫຼັກແຫຼ່ງແນວໂຮມປະເທດຊາດ ແລະ ບັນດາອົງການຈັດຕັ້ງການເມືອງ - ສັງຄົມ ຢູ່ຂັ້ນສູນກາງ ກຳແໜ້ນ ແລະ ເຂົ້າໃຈຢ່າງເລິກເຊິ່ງ ກ່ຽວກັບຈຸດປະສົງ, ຄວາມໝາຍ, ຄວາມສຳຄັນ, ຄວາມຮຽກຮ້ອງຕ້ອງການ, ເນື້ອໃນຂອງມະຕິ, ກຳແໜ້ນທັດສະນະ, ແນວຄິດຊີ້ນຳນຳພາ, ບັນດາວຽກງານຕ້ອງເຮັດ, ບົນພື້ນຖານນັ້ນຈັດຕັ້ງການເຜີຍແຜ່, ຊາບຊືມ ແລະ ຜັນຂະຫຍາຍການປະຕິບັດມະຕິກອງປະຊຸມຄະນະບໍລິຫານງານສູນກາງພັກຄັ້ງທີ 4 (ຊຸດທີ 11) ໃນລະບົບອົງການຈັດຕັ້ງຂອງແນວໂຮມປະເທດຊາດ ແລະ ບັນດາອົງການຈັດຕັ້ງການເມືອງ - ສັງຄົມ, ເພື່ອແນໃສ່ຍົກສູງຄວາມສາມາດ ແລະ ກຳລັງສູ້ຮົບຂອງພັກ, ສ້າງຄວາມເຫັນດີເຫັນພ້ອມສູງໃນທົ່ວພັກ, ປັບປຸງຄວາມເຊື່ອໝັ້ນໃນໝູ່ພະນັກງານ, ສະມາຊິກພັກ ແລະໝູ່ມະຫາຊົນ, ເພີ່ມທະວີຄວາມເຫັນດີເຫັນພ້ອມໃນສັງຄົມ.
ໃນວັນດຽວກັນ, ຢູ່ແຂວງ ເບ໋ນແຈ ໄດ້ໄຂກອງປະຊຸມຄົ້ນຄ້ວາ, ຊາບຊືມມະຕິກອງປະຊຸມຄະນະບໍລິຫານງານສູນກາງພັກຄັ້ງທີ 4 (ຊຸດທີ 11) . ທ່ານ Tran Cong Ngu, ຮອງປະທານສະພາຊ່ວຍເຫຼືອຄົນເຈັບທີ່ທຸກຍາກ ແລະ ຄົນພິການແຂວງ ເບ໋ນແຈ, ໃຫ້ຮູ້ວ່າ:
”ຕາມຂ້າພະເຈົ້າແລ້ວ, ເລື່ອງໃຫ້ຂໍ້ສັງເກດ, ຕີລາຄາຂອງພັກກອມມູນິດຫວຽດນາມ ກ່ຽວກັບມະຕິກອງປະຊຸມຄະນະບໍລິຫານງານສູນກາງພັກຄັ້ງທີ 4 (ຊຸດທີ 11) ແມ່ນບັນຫາພິເສດທີ່ສຸດ, ກຳນົດໄດ້ຄວາມຈິງ. ນັ້ນແມ່ນເສັ້ນທາງເພື່ອປັບປຸງພັກ, ຖ້າບໍ່ປັບປຸງພັກຢ່າງທັນການມັນຈະເປັນໄພອັນຕະລາຍຕໍ່ປະເທດຊາດ. ດັ່ງນັ້ນ, ເມື່ອອ່ານເອກະສານມະຕິນີ້, ຂ້າພະເຈົ້າຮູ້ສຶກດີໃຈຫຼາຍ, ແລະ ເຊື່ອໝັ້ນວ່າ, ຖ້າຫາກພວກເຮົາຜັນຂະຫຍາຍການປະຕິບັດມະຕິນີ້ຢ່າງຖືກຕ້ອງຈະຊ່ວຍໃຫ້ພັກກອມມູນິດຫວຽດນາມຜ່ານຜ່າຄວາມຫຍຸ້ງຍາກ ແລະ ການທ້າທາຍໄດ້”.
ໃນວັນດຽວກັນ, ຢູ່ແຂວງ ລາຍເຈົາ ກໍ່ໄຂກອງປະຊຸມພະນັກງານທົ່ວແຂວງຊາບຊືມ, ຜັນຂະຫຍາຍການປະຕິບັດມະຕິຂອງກອງປະຊຸມຄະນະບໍລິຫານງານສູນກາງພັກຄັ້ງທີ 4 (ຊຸດທີ 11) ເຊັ່ນດຽວກັນ.