(vovworld) - ຕອນເຊົ້າວັນທີ 11/05, ກອງປະຊຸມຄັ້ງທີ 6 ຂອງຄະນະກຳມະການຊີ້ນຳການຮ່ວມມື 2 ຝ່າຍລະຫວ່າງຫວຽດນາມ - ຈີນ ຖືກດຳເນີນໄປຢູ່ປັກກິງ, ປະເທດຈີນ, ພາຍໃຕ້ການເປັນປະທານຂອງທ່ານຮອງນາຍົກລັດຖະມົນຕີຫວຽດນາມ ຫງວຽນທຽນເຍີນ ແລະ ກຳມະການຄະນະລັດຖະບານ ຢາງເຈຍຊື້. 2 ຝ່າຍໄດ້ສຳຫຼວດກວດການຄືນສະພາບການຮ່ວມມືຈາກກອງປະຊຸມຄັ້ງທີ 5 ເມື່ອເດືອນ 9/2011 ມາຮອດປະຈຸບັນ; ແລກປ່ຽນທິດທາງ, ມາດຕະການເພື່ອແນໃສ່ເພີ່ມທະວີການຮ່ວມມືດ້ານການເມືອງ ແລະ ການຮ່ວມມືລະຫວ່າງ 2 ພັກ, 2 ລັດກວ່າອີກ; ຊຸກຍູ້ການແລກປ່ຽນຄະນະຜູ້ແທນຂັ້ນສູງ ແລະ ການຮ່ວມມືລະຫວ່າງບັນດາກະຊວງ, ຂະແໜງການຕ່າງໆຂອງ 2 ປະເທດ. 2 ຝ່າຍເປັນເອກະພາບນຳກັນຊຸກຍູ້ການຮ່ວມມືໃນບັນດາຂົງເຂດຄື: ເສດຖະກິດ, ການຄ້າ, ການລົງທຶນ, ການສຶກສາບຳລຸງສ້າງ, ວັດທະນະທຳ, ກິລາ, ການພົວພັນແລກປ່ຽນປະຊາຊົນ. 2 ຝ່າຍກໍແລກປ່ຽນບັນດາບັນຫາສາກົນ ແລະ ພາກພື້ນເຊິ່ງຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາຮັກສາສະຖຽນລະພາບ, ສັນຕະພາບ ໃນພາກພື້ນ. ຄາດວ່າ, ເມື່ອສິ້ນຊຸດກອງປະຊຸມ, 2 ຝ່ານຈະລົງນາມໃນສັນຍາຮ່ວມມືບາງສະບັບ.
ກ່ອນໜ້ານັ້ນ, ຕອນບ່າຍວັນທີ 10/05, ເມື່ອພົບປະເຈລະຈາກັບທ່ານນາຍົກລັດຖະມົນຕີຈີນ ຫຼີເຄີສຽງ, ທ່ານຮອງນາຍົກລັດຖະມົນຕີຫງວຽນທຽນເຍີນ ຢືນຢັນວ່າ ການພັດທະນາການພົວພັນເປັນປົກກະຕິ, ຍາວນານ, ການຮ່ວມມືຮອບດ້ານກັບຈີນ ແມ່ນນະໂຍບາຍສະເໝີຕົ້ນສະເໝີປາຍ, ຍາວນານຂອງພັກ ແລະ ລັດຫວຽດນາມ ແລະ ປາດຖະໜາວ່າ ຫວຽດນາມ ພ້ອມກັບຈີນ ມານະພະຍາຍາມ, ເພີ່ມທະວີການຮ່ວມມື, ນຳການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນ ພັດທະນາໃນໄລຍະໃໝ່.