(VOVWORLD) -ກອງປະຊຸມລັດຖະມົນຕີ ອາຊຽນ-ອົດສະຕາລີ ສະໄໝພິເສດກ່ຽວກັບ ໂລກລະບາດໂຄວິດ-19 ໄດ້ດຳເນີນໃນວັນທີ 30 ມິຖຸນາ ຜ່ານທາງອອນລາຍ, ດ້ວຍການເຂົ້າຮ່ວມຂອງບັນດາລັດຖະມົນຕີກະຊວງການຕ່າງປະເທດ ອາຊຽນ ແລະ ລັດຖະມົນຕີກະຊວງການຕ່າງປະເທດ ອົດສະຕາລີ.
 ທ່ານ ຫງວຽນກວກຢູງ ຮອງລັດຖະມົນຕີກະຊວງການຕ່າງປະເທດ ຫວຽດນາມ, ຫົວໜ້າ SOM ອາຊຽນ ຂອງ ຫວຽດນາມ (ພາບ: TTXVN) |
ທ່ານ ຫງວຽນກວກຢູງ ຮອງລັດຖະມົນຕີກະຊວງການຕ່າງປະເທດ ຫວຽດນາມ, ຫົວໜ້າ SOM ອາຊຽນ ຂອງ ຫວຽດນາມ, ໄດ້ຕາງໜ້າໃຫ້ ຫວຽດນາມ ໃນບົດບາດເປັນປະທານ ອາຊຽນ ເຂົ້າຮ່ວມກອງປະຊຸມ.
ທີ່ກອງປະຊຸມ, ສອງຝ່າຍໄດ້ເຫັນດີຍູ້ແຮງການສົມທົບແບ່ງປັນຂໍ້ມູນຂ່າວສານ, ບົດຮຽນ, ເພື່ອຍົກສູງກຳລັງຄວາມສາມາດກະກຽມຮັບມື ແລະ ການຮ່ວມມືຄວບຄຸມ, ສະກັດກັ້ນໂລກລະບາດຢ່າງມີປະສິດທິຜົນ; ພິເສດແມ່ນການສົມທົບຢ່າງແໜ້ນແຟ້ນໃນຄວາມມານະພະຍາຍາມຄົ້ນຄ້ວາ ແລະ ຜະລິດວັກຊິນກັນພະຍາດໂຄວິດ-19 ແລະ ຢາປິ່ນປົວ. ບັນດາຝ່າຍກໍ່ຢັ້ງຢືນຄືນໃໝ່ກ່ຽວກັບຄຳໝັ້ນສັນຍາໜູນຊ່ວຍພົນລະເມືອງຂອງກັນທີ່ຖືກຜົນສະທ້ອນຍ້ອນເຊື້ອພະຍາດ, ສ້າງເງື່ອນໄຂໃຫ້ກັບຄືນບ້ານເກີດເມືອງນອນຖ້າມີຄວາມຕ້ອງການ ແລະ ໃນເງື່ອນໄຂທີ່ເໝາະສົມ. ໄປຄຽງຄູ່ກັນນັ້ນ, ແມ່ນເພີ່ມທະວີຍາດແຍ່ງບັນດາກົນໄກທີ່ມີຢູ່ແລ້ວ, ບັນດາໂຄງການໜູນຊ່ວຍດ້ານເສດຖະກິດ ແລະ ການຮ່ວມມືພັດທະນາຂອງ ອົດສະຕາລີ, ພະຍາຍາມສຳເລັດການລົງນາມສັນຍາ RCEP ໂດຍໄວ.
ກ່າວຄຳເຫັນໃນນາມເປັນຜູ້ຕາງໜ້າໃຫ້ ຫວຽດນາມ ດ້ວຍບົດບາດເປັນປະທານ ອາຊຽນ, ທ່ານ ຫງວຽນກວກຢູງ ຮອງລັດຖະມົນຕີກະຊວງການຕ່າງປະເທດ ຫວຽດນາມ ເນັ້ນໜັກວ່າ ອາຊຽນ ແລະ ອົດສະຕາລີ ຕ້ອງຍົກສູງສະຕິລະວັງຕົວຕໍ່ກະແສຟອງໂລກລະບາດອາດຈະລະບາດຮອບ 2; ເອົາໃຈໃສ່ຮັບປະກັນສິດຜົນປະໂຫຍດ ແລະ ການປະພຶດຢ່າງມີຄວາມສະເໝີພາບຕໍ່ພົນລະເມືອງຂອງບັນດາປະເທດ ອາຊຽນ ຢູ່ ອົດສະຕາລີ ແລະ ຍູ້ແຮງການຮ່ວມມືຫຼຸດຜ່ອນຜົນກະທົບຂອງໂລກລະບາດທີ່ມີຕໍ່ເສດຖະກິດ-ສັງຄົມເພື່ອມຸ່ງໄປເຖິງການຟື້ນຟູແບບຍືນຍົງ.