ກ່າວຄຳເຫັນທີ່ວາລະອັດກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ, ປະທານ ອາຊຽນ 2020 ຢັ້ງຢືນວ່າ ກອງປະຊຸມດັ່ງກ່າວໄດ້ປະສົບຜົນສຳເລັດຢ່າງຈົບງາມ, ອັດປີປະທານ ອາຊຽນ 2020 ລົງ ດ້ວຍສິ່ງທ້າທາຍຫຼາຍຢ່າງ. ບັນດາການນຳ ອາຊຽນ ໄດ້ແລກປ່ຽນກ່ຽວກັບມາດຕະການຫຼາຍຢ່າງ ແລະ ຍົກອອກບັນດາການກຳນົດທິດໃຫຍ່ໃຫ້ແກ່ປະຊາຄົມ ອາຊຽນ:

“ພວກເຮົາໄດ້ເຫັນດີຕໍ່ຫຼາຍເນື້ອໃນສຳຄັນ, ອັນໄດ້ສ້າງກຳລັງໜູນໃໝ່ໃຫ້ແກ່ການພົວພັນລະຫວ່າງ ອາຊຽນ ກັບບັນດາຄູ່ຮ່ວມມື, ຢັ້ງຢືນຄຳໝັ້ນສັນຍາຢ່າງແຮງໃນການຮ່ວມມືຫຼາຍຝ່າຍ, ການຮ່ວມສຳພັນຫັນເປັນເສດຖະກິດເສລີ, ແບ່ງປັນບັນດາບັນຫາໃນພາກພື້ນ ແລະ ສາກົນ ທີ່ພວມເກີດຂຶ້ນ. ພວກເຮົາເຫັນດີເປັນເອກະພາບວ່າ ບົດບາດໃຈກາງຂອງ ອາຊຽນ ຄວນສືບຕໍ່ໄດ້ຮັບການຮັກສາ ແລະ ເສີມຂະຫຍາຍ, ຊຸກຍູ້ການເຈລະຈາ, ການຮ່ວມມື, ສະກັດກັ້ນການປະທະກັນ, ສ້າງຄວາມໄວ້ເນື້ອເຊື່ອໃຈ, ກໍ່ສ້າງໂຄງສ້າງພາກພື້ນ ໃຫ້ເປີດກວ້າງ, ໂປ່ງໃສ, ກວມລວມ ແລະ ອີງໃສ່ລະບຽບກົດໝາຍ”.

ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ກ່າວຄຳເຫັນທີ່ພິທີ (ພາບ: VGP)

 ທ່ານນາຍົກລັດຖະມົນຕີ   ຫງວຽນຊວັນຟຸກ ກໍ່ໄດ້ເນັ້ນໜັກເຖິງເຫດການທີ່ພົ້ນເດັ່ນ ນັ້ນແມ່ນສັນຍາຄູ່ຮ່ວມມືຮອບດ້ານພາກພື້ນ (RCEP) ລະຫວ່າງ 10 ປະເທດ ອາຊຽນ ກັບ 5 ປະເທດພາຍນອກ ທີ່ໄດ້ຮັບການລົງນາມນັ້ນ ບໍ່ພຽງແຕ່ແມ່ນເຫດການສຳຄັນສຳລັບ ອາຊຽນ ເທົ່ານັ້ນ ຫາກຍັງມີຄວາມສຳຄັນສຳລັບການຄ້າທົ່ວໂລກອີກດ້ວຍ.

ພິທີມອບຮັບບົດບາດປະທານ ອາຊຽນ ໃຫ້ແກ່ ບຣູໄນ (ພາບ:VGP)

 ທີ່ພິທີມອບຮັບບົດບາດປະທານ ອາຊຽນ ໃຫ້ແກ່ ບຣູໄນ, ທ່ານນາຍົກລັດຖະມົນຕີ ເຊື່ອໝັ້ນວ່າ ໃນບົດບາດເປັນປະທານ ອາຊຽນ 2021 ບຣູໄນ ຈະສືບຕໍ່ນຳ ອາຊຽນ ໃຫ້ມີຄວາມພັດທະນາ ແລະ ສາມັກຄີ.