ທ່ານເອກອັກຄະລັດຖະທູດ ຫວຽດນາມ ຫງວຽນຫາຍບັ່ງ

ກອງປະຊຸມສຸດຍອດ ສະມາຄົມປະຊາຊາດ ອາຊີຕາເວັນອອກສ່ຽງໃຕ້ (ອາຊຽນ) ຄັ້ງທີ 43 ແລະ ບັນດາກອງປະຊຸມກ່ຽວຂ້ອງ ຈະດຳເນີນແຕ່ວັນທີ 4 – 7 ກັນຍາ, ຢູ່ປະເທດ ອິນໂດເນເຊຍ. ຕາມທ່ານ ຫງວຽນຫາຍບັ່ງ, ເອກອັກຄະລັດຖະທູດ ຫວຽດນາມ ປະຈຳ ອາຊຽນ ແລ້ວ, ໃນກອງປະຊຸມຄັ້ງນີ້, ບັນດາການນຳຈະຮັບຮອງເອົາເອກະສານທາງການປະມານ 49 ສະບັບ. ນີ້ແມ່ນໝາກຜົນຂອງການເຈລະຈາມາເປັນເວລາຫຼາຍເດືອນ ຂອງບັນດາປະເທດ ອາຊຽນ ກໍ່ຄືລະຫວ່າງອາຊຽນ ກັບບັນດາຄູ່ຮ່ວມມື.

    ກ່ຽວກັບການເຂົ້າຮ່ວມຂອງຄະນະຜູ້ແທນ ຫວຽດນາມ ທີ່ກອງປະຊຸມ, ທ່ານເອກອັກຄະລັດຖະທູດ ຫວຽດນາມ ຫງວຽນຫາຍບັ່ງ ໃຫ້ຮູ້ວ່າ: ບັນດາກະຊວງ, ຂະແໜງການຂອງ ຫວຽດນາມ ໄດ້ເຂົ້າຮ່ວມຢ່າງຕັ້ງໜ້າ ແລະ ໄດ້ປະກອບສ່ວນແທດຈິງເຂົ້າຂໍ້ລິເລີ່ມເຊິ່ງ ອາຊຽນ ໄດ້ຍົກອອກມາ ເພື່ອໃຫ້ບັນດາການນຳຮັບຮອງເອົາທີ່ກອງປະຊຸມສຸດຍອດ. ຄະນະຜູ້ແທນ ຫວຽດນາມ ປະຈຳ ອາຊຽນ ກໍ່ໄດ້ຊັບຊ້ອນການເຈລະຈາບັນດາເອກະສານສຳຄັນໂດຍກົງ, ເຊິ່ງລວມມີຖະແຫຼງການຮ່ວມລະຫວ່າງ ອາຊຽນ ກັບບັນດາຄູ່ຮ່ວມມືຂອງ ອາຊຽນ:

          “ບັນດາການປະກອບສ່ວນຂອງ ຫວຽດນາມ ກໍ່ຄືຂອງຄະນະຜູ້ແທນ ຫວຽດນາມ ທີ່ກອງປະຊຸມ ອາຊຽນ ຄັ້ງນີ້ແມ່ນທັງໃນສາມເສົາຄ້ຳ ການເມືອງ, ຄວາມໝັ້ນຄົງດ້ານເສດຖະກິດ ແລະ ວັດທະນະທຳສັງຄົມ. ກ່ຽວກັບດ້ານການເມືອງ ຄວາມໝັ້ນຄົງ, ດ້ວຍຖານະເປັນປະທານ ອາຊຽນ ປີ 2020, ຫວຽດນາມ ໄດ້ສະເໜີວ່າ ເຖິງຈຸດເວລາແລ້ວທີ່ ອາຊຽນ ຕ້ອງມອງກ້ວາງເຫັນໄກກ່ວາ, ຕ້ອງຍົກອອກການກຳນົດທິດຫຼັງປີ 2025. ສືບຕໍ່ຜັນຂະຫຍາຍຂໍ້ລິເລີ່ມຂອງ ຫວຽດນາມ, ກອງປະຊຸມສຸດຍອດຄັ້ງນີ້ ກໍ່ຈະຮັບຮອງເອົາຖະແຫຼງການກ່ຽວກັບວິໄສທັດແຫ່ງການພັດທະນາຂອງ ອາຊຽນ ໃນ 20 ປີຈະມາເຖິງ ຮອດປີ 2045. ຫວຽດນາມ ກໍ່ສະໜັບສະໜູນ ແລະ ປະກອບຫຼາຍຄຳເຫັນແທດຈິງໃຫ້ແກ່ການສ້າງວິໄສທັດຂອງ ອາຊຽນ ກ່ຽວກັບມະຫາສະໝຸດອິນເດຍ ປາຊີຟິກ”.