ກອງປະຊຸມສຳມະນາ ສາກົນກ່ຽວກັບການ ພັດທະນາການຄ້າ ເຂດຊາຍແດນ ໄຕນິງ
(ພາບປະກອບ)
(vovworld) – “ໄຕນິງ - ປະຕູແຫ່ງການພັດທະນາດ້ານການຄ້າລະຫວ່າງຫວຽດນາມ -ລາວ - ກຳປູເຈຍ” ແມ່ນຫົວຂໍ້ຂອງກອງປະຊຸມສຳມະນາ, ເຊິ່ງດຳເນີນໄປໃນວັນທີ 20/12, ຢູ່ແຂວງ ໄຕນິງ. ເຫດການນີ້ໂດຍກະຊວງອຸດສາຫະກຳການຄ້າ ສົມທົບກັບຄະນະກຳມະການປະຊາຊົນແຂວງ ໄຕນິງ ຈັດຕັ້ງ, ດ້ວຍການເຂົ້າຮ່ວມຂອງຜູ້ແທນທີ່ມາຈາກບັນດາກະຊວງ, ຂະແໜງການທີ່ກ່ຽວຂ້ອງ, ວິສາຫະກິດເຄື່ອນໄຫວໃນຂົງເຂດການຄ້າ, ການບໍລິການ, ການລົງທຶນ ແລະ ການທ່ອງທ່ຽວກັບ ລາວ, ກຳປູເຈຍ ເກືອບ 200 ຄົນ. ທ່ານຮອງລັດຖະມົນຕີກະຊວງອຸດສາຫະກຳການຄ້າຫງວຽນເກີມຕູ໋ ແລະ ທ່ານລັດຖະມົນຕີກະຊວງການຄ້າກຳປູເຈຍ Reach Ra ເປັນປະທານຮ່ວມຂອງກອງປະຊຸມ. ກ່າວຄຳເຫັນທີ່ກອງປະຊຸມ, ທ່ານຮອງລັດຖະມົນຕີກະຊວງອຸດສາຫະກຳການຄ້າຫງວຽນເກີມຕູ໋ ຊີ້ແຈ້ງວ່າ.
“ໃນໄລຍະຜ່ານມາ, ການຄ້າເຂດຊາຍແດນລະຫວ່າງ 3 ປະເທດ ລະຫວ່າງຫວຽດນາມ - ລາວ ແລະ ກຳປູເຈຍ ໄດ້ຮັບການພັດທະນາຢ່າງແຮງ, ອັນໄດ້ດຶງດູດວິສາຫະກິດຫຼາຍແຫ່ງເຂົ້າຮ່ວມ, ຂົງເຂດແລກປ່ຽນກໍ່ມີຫຼາຍຮູບຫຼາຍແບບ. ດ້ວຍແງ່ຫວັງພັດທະນາຢ່າງວ່ອງໄວຄືແນວນັ້ນ, ການຄ້າ 3 ປະເທດ ຈະປະກອບສ່ວນນຳວົງເງິນການຄ້າລະຫວ່າງຫວຽດນາມ ແລະ ລາວ ຂຶ້ນເຖິງ 2 ຕື້ USD ແລະ ຫວຽດນາມ ກັບ ກຳປູເຈຍ ຂຶ້ນເຖິງ 5 ຕື້ USD ໃນປີ 2015 ຕາມແຜນການທີ່ໄດ້ວາງອອກໃຫ້ສຳເລັດ. ເພື່ອຊຸກຍູ້ການຄ້າເຂດຊາຍແດນ 3 ປະເທດ ເລື່ອງຂຸດຄົ້ນພື້ນຖານໂຄງລ່າງເຊື່ອມຕໍ່ 3 ປະເທດຢ່າງມີປະສິດທິຜົນ, ໃນນັ້ນມີທາງຄົມມະນາຄົມຂົນສົ່ງແມ່ນວຽກງານສຳຄັນທີ່ສຸດ.”
ບັນດາຜູ້ແທນໄດ້ສຸມໃສ່ປຶກສາຫາລືກ່ຽວກັບມາດຕະການຊຸກຍູ້ການພັດທະນາດ້ານການຄ້າເຂດຊາຍແດນລະຫວ່າງຫວຽດນາມ - ລາວ ແລະ ກຳປູເຈຍ ຜ່ານເສັ້ນທາງເຊື່ອມຕໍ່ຈາກແຂວງໄຕນິງ ໄປຜ່ານ 2 ປະເທດ ແລະ ຍູ້ແຮງການລົງທຶນ ນຳເຂົ້າ, ສົ່ງອອກສິນຄ້າ, ການບໍລິການ, ການລົງທຶນ ແລະ ການທ່ອງທ່ຽວຜ່ານເສັ້ນທາງດັ່ງກ່າວ, ປະກອບສ່ວນເປີດກວ້າງການພົວພັນຮ່ວມມືໃຫ້ແກ່ບັນດາວິສາຫະກິດ 3 ປະເທດໃນໄລຍະຈະມາເຖິງ.