ວັນທີ 30 ຕຸລາ, ສະຖາບັນການຕ່າງປະເທດຫວຽດນາມ ໄດ້ສົມທົບກັບກອງທຶນ Konrad – Adenauer (KAS) ຂອງເຢຍລະມັນ ຈັດກອງປະຊຸມສຳມະນາສາກົນດ້ວຍຫົວຂໍ້ວ່າ “ການເພີ່ມທະວີບົດບາດຂອງແມ່ຍິງສຳລັບສັນຕິພາບແລະຄວາມໝັ້ນຄົງ”. ກອງປະຊຸມແມ່ນເພື່ອແນໃສ່ຍົກສູງສະຕິຄວາມຮັບຮູ້ກ່ຽວກັບຄວາມສຳຄັນຂອງແມ່ຍິງໃນບັນດາວິວັດທະນາການສັນຕິພາບ, ມຸ່ງໄປເຖິງການຊຸກຍູ້ບົດບາດຂອງແມ່ຍິງໃນບັນຫາສັນຕິພາບ ແລະ ຄວາມໝັ້ນຄົງ, ພ້ອມທັງປະກອບສ່ວນໃຫ້ແກ່ການເຂົ້າຮ່ວມຂອງຫວຽດນາມ ຢູ່ບັນດາເວທີປາໄສຫຼາຍຝ່າຍ, ພິເສດແມ່ນສະພາຄວາມໝັ້ນຄົງສະຫະປະຊາຊາດ ແລະ ອາຊຽນ ໃນການຊຸກຍູ້ໂຄງການດຳເນີນງານກ່ຽວກັບແມ່ຍິງ, ສັນຕິພາບ ແລະ ຄວາມໝັ້ນຄົງ. ກອງປະຊຸມສຳມະນາໄດ້ດຳເນີນໂດຍກົງ ແລະ ທາງອອນລາຍ. ມີຜູ້ແທນກວ່າ 70 ທ່ານທີ່ມາຈາກບັນດາກະຊວງ, ຄະນະ, ຂະແໜງການ, ບັນດາອົງການຄົ້ນຄວ້າ, ມະຫາວິທະຍາໄລທີ່ມີອິດທິພົນຊື່ສຽງຂອງຫວຽດນາມ, ຜູ້ຕາງໜ້າສະຖານທູດບັນດາປະເທດປະຈຳຮ່າໂນ້ຍ… ເຂົ້າຮ່ວມ.

        ກ່າວຄຳເຫັນໄຂກອງປະຊຸມ, ທ່ານປະລິນຍາເອກ ຫງວຽນຮຸ່ງເຊີນ, ຮອງຫົວໜ້າສະຖາບັນການຕ່າງປະເທດ ເນັ້ນໜັກວ່າ, ນີ້ແມ່ນເຫດການສຳຄັນ, ມີຄວາມໝາຍແທດຈິງ ປະກອບສ່ວນຍົກສູງສະຕິຄວາມຮັບຮູ້ກ່ຽວກັບຄວາມສຳຄັນຂອງແມ່ຍິງໃນບັນດາວິວັດທະນາການສັນຕິພາບ ແລະ ຄວາມໝັ້ນຄົງ, ພ້ອມທັງເປັນການສະແດງໃຫ້ເຫັນຄຳໝັ້ນສັນຍາຢ່າງແຮງຂອງຫວຽດນາມ ແລະ ບັນດາປະເທດໃນການເພີ່ມທະວີບົດບາດຂອງແມ່ຍິງໃນສະພາບພາກພື້ນ ແລະ ສາກົນມີການຜັນແປສັບສົນຫຼາຍຢ່າງ ແລະ ບັນດາສິ່ງທ້າທາຍໃໝ່ຫາກໍ່ພົ້ນເດັ່ນຂຶ້ນ.

        ສ່ວນທ່ານ Mohammad Naciri, ຫົວໜ້າ UN Women ປະຈຳພາກພື້ນອາຊີ - ປາຊີຟິກ ໄດ້ເນັ້ນໜັກເຖິງບົດບາດຂອງແມ່ຍິງ, ພິເສດແມ່ນແມ່ຍິງຢູ່ພາກພື້ນອາຊີຕາເວັນອອກສ່ຽງໃຕ້. ພ້ອມທັງຢືນຢັນວ່າ, ຫວຽດນາມ ແມ່ນໜຶ່ງໃນບັນດາພະຍານຫຼັກຖານດີເດັ່ນໃນການຊຸກຍູ້ບົດບາດ ແລະ ການເຂົ້າຮ່ວມຂອງແມ່ຍິງສຳລັບການເຄື່ອນໄຫວຮັກສາສັນຕິພາບຂອງສະຫະປະຊາຊາດ.