(VOVWORLD) -ຕອນບ່າຍວັນທີ 21 ພຶດສະພາ, ຢູ່ຮ່າໂນ້ຍ, ໄດ້ດຳເນີນການຖະແຫຼງຂ່າວສາກົນກ່ຽວກັບວຽກງານກະກຽມການເລືອກຕັ້ງສະມາຊິກສະພາແຫ່ງຊາດຊຸດທີ XV ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2021 – 2026. ການເລືອກຕັ້ງຈະດໍາເນີນໃນວັນທີ 23 ພຶດສະພາ, ຜູ້ມີສິດເລືອກຕັ້ງຫຼາຍກວ່າ 69 ລ້ານຄົນຈະໄປປ່ອນບັດ ເພື່ອຄັດເລືອກສະມາຊິກສະພາແຫ່ງຊາດ 500 ທ່ານ ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2021 – 2026 ຈຳນວນ 3.727 ທ່ານ. ການເລືອກຕັ້ງຖືກດຳເນີນຢູ່ 84.767 ຫົວໜ່ວຍໃນທົ່ວປະເທດ.
ກ່າວຄຳເຫັນທີ່ການຖະແຫຼງຂ່າວ, ທ່ານເລຂານຸການໃຫຍ່ສະພາແຫ່ງຊາດ, ຫົວໜ້າຫ້ອງການສະພາເລືອກຕັ້ງແຫ່ງຊາດ ບຸ່ຍວັນເກື່ອງ ໃຫ້ຮູ້ວ່າ ໄລ່ຮອດຈຸດເວລານີ້, ວຽກງານກະກຽມແກ່ການເລືອກຕັ້ງດັ່ງກ່າວ ໄດ້ປະຕິບັດສຳເລັດໂດຍພື້ນຖານແລ້ວ.
“ທ້ອງຖິ່ນຕ່າງໆ ໄດ້ກຽມພ້ອມຢ່າງສູງໃຫ້ແກ່ວັນເລືອກຕັ້ງແລ້ວ. ບາງທ້ອງຖິ່ນທີ່ດຳເນີນການເລືອກຕັ້ງກ່ອນເວລາກຳນົດ ກໍຮັບປະກັນຄວາມປອດໄພ ແລະ ຖືກຕ້ອງຕາມກົດໝາຍ. ເວົ້າລວມແລ້ວ, ການເລືອກຕັ້ງຢູ່ແຕ່ລະຂັ້ນ, ຂະແໜງການ, ທ້ອງຖິ່ນ, ນະຄອນຕ່າງໆ ພວມໄດ້ຮັບການຜັນຂະຫຍາຍຢ່າງຄົບຊຸດ, ແໜ້ນແຟ້ນ ແລະ ໃຫ້ໝາກຜົນສູງ”
ທ່ານນາງ ຫງວຽນທິແທັງ, ຫົວໜ້າຄະນະວຽກງານສະມາຊິກສະພາແຫ່ງຊາດ (ພາບ: VOV) |
ກ່ຽວກັບວຽກງານບຸກຄະລາກອນ ຮັບສະໝັກເລືອກຕັ້ງເປັນສະມາຊິກສະພາແຫ່ງຊາດ, ຕາມທ່ານນາງ ຫງວຽນທິແທັງ, ຫົວໜ້າຄະນະວຽກງານສະມາຊິກສະພາແຫ່ງຊາດ, ຮອງຫົວໜ້າ ອະນຸກຳມະການບຸກຄະລາກອນ ສະພາເລືອກຕັ້ງແຫ່ງຊາດ ແລ້ວ, ສະພາເລືອກຕັ້ງແຫ່ງຊາດ ໄດ້ມີການເຮັດວຽກຢ່າງພາວະວິໄສ, ທ່ຽງທຳ, ມີຄວາມຮັບຜິດຊອບ ແລະ ຮັບປະກັນຖືກຕ້ອງຕາມກົດໝາຍ.
ທ່ານພົນເອກ ໂຕເລິມ, ລັດຖະມົນຕີກະຊວງຕຳຫຼວດ ຫວຽດນາມ ກ່າວຄຳເຫັນທີ່ກອງປະຊຸມ (ພາບ: cand.com.vn) |
ໃນວັນດຽວກັນ, ກ່າວຄໍາເຫັນທີ່ກອງປະຊຸມອອນລາຍ ກັບຄະນະກຳມະການເລືອກຕັ້ງຂອງ 3 ທ້ອງຖິ່ນ ລວມມີ ດ່າໜັງ, ກວ໋າງນາມ ແລະ ກວ໋າງງ໋າຍ ກ່ຽວກັບວຽກງານກະກຽມການເລືອກຕັ້ງ, ທ່ານພົນເອກ ໂຕເລິມ, ລັດຖະມົນຕີກະຊວງຕຳຫຼວດ ຫວຽດນາມ, ກຳມະການສະພາເລືອກຕັ້ງແຫ່ງຊາດ ກໍຮຽກຮ້ອງໃຫ້ 3 ທ້ອງຖິ່ນດັ່ງກ່າວ ຕ້ອງປະຕິບັດຖືກຕ້ອງຕາມຂໍ້ກຳນົດກົດໝາຍວ່າດ້ວຍການເລືອກຕັ້ງ, ວຽກງານກະກຽມ, ສືບຕໍ່ປະຕິບັດວຽກງານປ້ອງກັນ, ສະກັດກັ້ນໂລກລະບາດ ໂຄວິດ - 19 ໄດ້ເປັນຢ່າງດີ; ສືບຕໍ່ຍູ້ແຮງວຽກງານໂຄສະນາກ່ຽວກັບການເລືອກຕັ້ງ, ປັບໄໝບັນດາກໍລະນີຂົນຂວາຍການເລືອກຕັ້ງທີ່ບໍ່ຖືກຕ້ອງຕາມຂໍ້ກຳນົດຢ່າງເຂັ້ມງວດ, ເພີ່ມທະວີວຽກງານຕິດຕາມກວດກາ, ປ້ອງກັນຄວາມປອດໄພແກ່ເຂດປ່ອນບັດເລືອກຕັ້ງຢ່າງເດັດຂາດ.
ໄລ່ມາຮອດຈຸດເວລານີ້, ມີທ້ອງຖິ່ນ 16 ແຫ່ງ ໄດ້ຮັບການອະນຸຍາດຈາກສະພາເລືອກຕັ້ງແຫ່ງຊາດ ດຳເນີນການເລືອກຕັ້ງກ່ອນເວລາກຳນົດ.
ຜົນການເລືອກຕັ້ງສະມາຊິກສະພາແຫ່ງຊາດຊຸດທີ XV ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2021 – 2026 ຈະໄດ້ປະກາດພາຍຫຼັງ 20 ວັນດຳເນີນການເລືອກຕັ້ງສະມາຊິກສະພາແຫ່ງຊາດ ແລະ 10 ວັນພາຍຫຼັງດຳເນີນການເລືອກຕັ້ງສະມາຊິກສະພາປະຊາຊົນທຸກຂັ້ນ.