Vovworld- ຕອນບ່າຍວັນທີ 16/11, ຢູ່ຮ່າໂນ້ຍ, ທ່ານເລຂາທິການໃຫຍ່ພັກກອມມູນິດຫວຽດນາມ Nguyen Phu Trong ໄດ້ໃຫ້ການຕ້ອນຮັບ ທ່ານ Mykola Azarov ນາຍົກລັດຖະມົນຕີອູກະແຣນ, ປະທານພັກພາກພື້ນອູກະແຣນ ທີ່ເດີນທາງມາຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ. ທີ່ການຕ້ອນຮັບ, ທ່ານເລຂາທິການໃຫຍ່ພັກກອມມູນິດຫວຽດນາມ Nguyen Phu Trong ເນັ້ນໜັກວ່າ ຫວຽດນາມຖືເປັນສຳຄັນການພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານກັບອູກະແຣນ, ພ້ອມທັງຮັບຮູ້ບັນດາບາດກ້າວຂະຫຍາຍຕົວຢ່າງຕັ້ງໜ້າຂອງການພົວພັນ ລະຫວ່າງ 2 ປະເທດໃນໄລຍະທີ່ຜ່ານມາ, ກໍຄືຄວາມມານະພະຍາຍາມຂອງລັດຖະບານ 2 ປະເທດໃນການຊຸກຍູ້ການຮ່ວມມືໃນຫຼາຍຂົງເຂດ, ສູ້ຊົນນຳການພົວພັນຮ່ວມມື ດ້ານເສດຖະກິດ-ການຄ້າ 2 ຝ່າຍຂຶ້ນເທົ່າທຽມກັບຄວາມຫວັງ ແລະ ຄວາມສາມາດບົ່ມຊ້ອນຂອງ 2 ປະເທດ. ທ່ານເລຂາທິການໃຫຍ່ພັກກອມມູນິດຫວຽດນາມ Nguyen Phu Trong ຢືນຢັນວ່າ ພັກກອມມູນິດຫວຽດນາມຖືເປັນສຳຄັນການປັບປຸງ ແລະ ເພີ່ມທະວີການພົວພັນກັບບັນດາພັກການເມືອງຢູ່ ອູກະແຣນ, ໃນນັ້ນມີພັກພາກພື້ນ ອູກະແຣນ; ຕີລາຄາສູງການເຊັນສັນຍາຮ່ວມມື ລະຫວ່າງ 2 ພັກ.
ສ່ວນ ທ່ານນາຍົກລັດຖະມົນຕີອູກະແຣນ Mykola Azarov ຢືນຢັນວ່າ ອູກະແຣນ ຖືຫວຽດນາມເປັນຄູ່ຮ່ວມມືທີ່ມີມາແຕ່ດົນນານ, ສຳຄັນຂອງ ອູກະແຣນໃນພາກພື້ໜອາຊີ-ອາຊີຟິກ. ທ່ານນາຍົກລັດຖະມົນຕີອູກະແຣນ Mykola Azarov ຢືນຢັນວ່າພັກພາກພື້ນ ອູກະແຣນ ຖືເປັນສຳຄັນການພົວພັນກັບພັກກອມມູນິດຫວຽກນາມ ແລະ ຈະມານະພະຍາຍາມຜັນຂະຫຍາຍສັນຍາຮ່ວມທີ່ໄດ້ຮັບການເຊັນກັນເພື່ອຊຸກຍູ້ການພົວພັນຮ່ວມມືລະຫວ່າງ 2 ປະເທດ.
ຕອນບ່າຍຂອງວັນດຽວກັນ, ທ່ານປະທານປະເທດຫວຽດນາມ Truong Tan Sang ກໍໄດ້ໃຫ້ການຕ້ອນຮັບ ທ່ານ ນາຍົກລັດຖະມົນຕີອູກະແຣນ Mykola Azarov ຢ່າງສະໜິດສະໜົມ
ທ່ານນາຍົກລັດຖະມົນຕີ Nguyen Tan Dungຕ້ອນຮັບ
ທ່ານນາຍົກລັດຖະມົນຕີອູກະແຣນ Mykola Azarov
(ພາບ: VGP)
|
ກ່ອນໜ້ານັ້ນ,ຕອນເຊົ້າວັນທີ 16/11, ທີ່ສຳນັກງານລັດຖະບານຫວຽດນາມ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ເປັນປະທານພິທີຕ້ອນຮັບທ່ານນາຍົກລັດຖະມົນຕີອູກະແຣນ Mykola Azarov ທີ່ເດີນທາງມາຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ. ພາຍຫຼັງພິທີຕ້ອນຮັບ, ທ່ານນາຍົກລັດຖະມົນຕີ Nguyen Tan Dung ໄດ້ມີການເຈລະຈາກັບທ່ານນາຍົກລັດຖະມົນຕີ ອູກະແຣນ Mykola Azarov. ນະທີ່ນີ້, ທ່ານນາຍົກລັດຖະມົນຕີສອງທ່ານ ໄດ້ເຫັນດີເປັນເອກະພາບນຳກັນສືບຕໍ່ຊຸກຍູ້ການແລກປ່ຽນຄະນະຜູ້ແທນທຸກຂັ້ນ, ໃນນັ້ນມີຄະນະຜູ້ແທນຂັ້ນສູງ; ເປີດກວ້າງການພົວພັນຮ່ວມມືໃນທຸກຂົງເຂດການເມືອງ, ເສດຖະກິດ, ການຄ້າ, ການລົງທຶນ, ປ້ອງກັນຊາດ ປ້ອງກັນຄວາມສະຫງົບ ແລະ ກະສິກຳໃຫ້ຍິ່ງກວ່າອີກ; ຊຸກຍູ້ການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນຄື, ການສຶກສາ ແລະ ບຳລຸງສ້າງ, ວັດທະນະທຳ, ການທ່ອງທ່ຽວ, ກິລາ ແລະ ບັນດາຂົງເຂດອື່ນໆ ເຊິ່ງຕ່າງຝ່າຍຕ່າງມີຄວາມສົນໃຈ. ໃນການພົບປະກັບນັກຂ່າວຢູ່ພາຍໃນ ແລະ ຕ່າງປະເທດ. ທ່ານນາຍົກລັດຖະມົນຕີ Nguyen Tan Dung ຊີ້ແຈ້ງວ່າ.
“ພວກຂ້າພະເຈົ້າຢືນຢັນການສະໜັບສະໜູນ ແລະ ສົ່ງເສີມບັນດາວິສາຫະກິດສອງປະເທດແລກປ່ຽນຂໍ້ມູນຂ່າວສານ, ສ້າງຕັ້ງການພົວພັນໂດຍກົງ ເພື່ອຊອກຫາບັນດາຮູບແບບຮ່ວມມືຢ່າງມີປະສິດທິຜົນ. ຝ່າຍຫວຽດນາມ ກ່ຽມພ້ອມການສ້າງເງື່ອນໄຂສະດວກໃຫ້ແກ່ບັນດາວິສາຫະກິດ ອູກະແຣນ ເຂົ້າຮ່ວມບັນດາໂຄງການລົງທຶນໂດຍກົງຢູ່ຫວຽດນາມ ໃນບັນດາຂົງເຂດເຊິ່ງອູກະແຣນ ມີທ່າແຮງ ແລະ ຫວຽດນາມ ມີຄວາມຕ້ອງການ. ສອງຝ່າຍຢືນຢັນສືບຕໍ່ຍູ້ແຮງການຮ່ວມມືດ້ານເຕັກນິກການທະຫານ, ເປີດກວ້າງການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນຄື; ກະສິກຳ, ທະນາຄານ, ການສຶກສາ ບຳລຸງສ້າງ, ວິທະຍາສາດເຕັກໂນໂລຊີ, ວັດທະນະທຳ…”
ສິ້ດສຸດການເຈລະຈາ, ທ່ານນາຍົກລັດຖະມົນຕີ Nguyen Tan Dung ແລະ ທ່ານນາຍົກລັດຖະມົນຕີ Mykola Azarov ໄດ້ເປັນສັກຂີພິຍານພິທີລົງນາມບັນດາເອກະສານຮ່ວມມືສອງຝ່າຍ.