(vovworld) - ຕອນເຊົ້າວັນທີ 29/07, ຢູ່ນະຄອນຫຼວງວຽງຈັນ, ທ່ານນາຍົກລັດຖະມົນຕີ ທອງສິງ ທຳມະວົງ ແລະ ທ່ານຮອງປະທານປະເທດ ບຸນຍັງ ວໍລະຈິດ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໂດຍທ່ານຮອງປະທານສະພາແຫ່ງຊາດຫວຽດນາມ ອວງຈູລິວ ນຳໜ້າທີ່ພວມຢູ່ຢ້ຽມຢາມ ແລະ ເຮັດວຽກຢູ່ລາວ. ທ່ານຮອງປະທານສະພາແຫ່ງຊາດ ອວງຈູລິວ ໄດ້ອວຍພອນບັນດາຜົນງານເຊິ່ງປະຊາຊົນລາວ ບັນລຸໄດ້ໃນໄລຍະຜ່ານມາ ແລະ ເນັ້ນໜັກວ່າ ສະພາແຫ່ງຊາດຫວຽດນາມ ຕີລາຄາສູງຂໍ້ລິເລີ່ມຂອງສະພາແຫ່ງຊາດລາວ ໃນການຈັດຕັ້ງກອງປະຊຸມສຳມະນາບັນດາຫົວເລື່ອງສະເພາະເພື່ອຮັບໃຊ້ການຮ່ວມມືລົງທຶນ, ກໍ່ຄືເລື່ອງເຂົ້າເປັນສະມາຊິກປະຊາຄົມເສດຖະກິດອາຊຽນ ໃນປີ 2015 ຂອງ 2 ປະເທດ. ທ່ານຮອງປະທານສະພາແຫ່ງຊາດ ອວງຈູລິວ ຢືນຢັນວ່າ ພັກ, ລັດຖະບານ, ສະພາແຫ່ງຊາດ ແລະ ປະຊາຊົນຫວຽດນາມ ຈະເຮັດຈົນສຸດຄວາມສາມາດຂອງຕົນເພື່ອເພີ່ມພູນຄຸນສ້າງສາຍພົວພັນແບບພິເສດລະຫວ່າງຫວຽດນາມ - ລາວ ໃຫ້ນັບມື້ນັບພັດທະນາຢ່າງໝັ້ນຄົງ ເພື່ອຄວາມຜາສຸກຂອງປະຊາຊົນ ແລະ ສັນຕິພາບ, ການພັດທະນາ ແລະ ວັດທະນາຖາວອນໃນພາກພື້ນ ແລະ ໃນໂລກ.
ບັນດາການນຳລາວ ໄດ້ຂອບໃຈຕໍ່ພັກ, ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອລາວ ໃນໄລຍະຜ່ານມາ ແລະ ປາດຖະໜາວ່າ ໃນໄລຍະຈະມາເຖິງ 2 ຝ່າຍຈະເພີ່ມທະວີການຮ່ວມມື, ຊຸກຍູ້ການຮ່ວມມຶລົງທຶນໃຫ້ບັນລຸປະສິດທິຜົນສູງກວ່າ, ປະກອບສ່ວນຊຸກຍູ້ການພົວພັນຮ່ວມມື, ຄວາມສາມັກຄີແບບພິເສດລະຫວ່າງລາວ - ຫງຽດນາມ ໃຫ້ຂຶ້ນສູ່ລະດັບສູງໃໝ່.