ການນຳພັກ,ລັດຕ້ອນຮັບນາຍົກລັດຖະມົນຕີສະຫະພັນລາຊະອານາຈັກອັງກິດແລະໄອແລນເໜືອ
(ທ່ານເລຂາທິການໃຫຍ່ ຫງວຽນຟຸຈ້ອງຕ້ອນຮັບ
ທ່ານນາຍົກລັດຖະມົນຕີສະຫະພັນລາຊະອານາຈັກອັງກິດ ແລະ ໄອແລນເໜືອ)
(vovworld) - ຕອນບ່າຍວັນທີ 29/07, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີສະຫະພັນລາຊະອານາຈັກອັງກິດ ແລະ ໄອແລນເໜືອ David Cameron ພວມຢ້ຽມຢາມຫວຽດນາມ ຢ່າງເປັນທາງການ. ທີ່ການຕ້ອນຮັບ, ທ່ານເລຂາທິການໃຫຍ່ ຫງວຽນຟຸຈ້ອງ ປາດຖະໜາວ່າ, ການຢ້ຽມຢາມຫວຽດນາມ ຄັ້ງນີ້ຂອງທ່ານນາຍົກລັດຖະມົນຕີອັງກິດ ຈະປະກອບສ່ວນເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ສືບຕໍ່ຊຸກຍູ້ການຮ່ວມມືໃນທຸກຂົງເຂດຂອງການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ລາຊະອານາຈັກອັງກິດ, ໃນນັ້ນມີການພົວພັນລະຫວ່າງພັກກອມມູນິດຫວຽດນາມ ກັບບັນດາພັກຝ່າຍການເມືອງຂອງອັງກິດ, ບັນດາການເຄື່ອນໄຫວດ້ານການຄ້າ, ການລົງທຶນ, ການຮ່ວມມືດ້ານສຶກສາ, ບຳລຸງສ້າງ. ທ່ານເລຂາທິການໃຫຍ່ ປາດຖະໜາວ່າ, ອັງກິດ ສືບຕໍ່ມີທັດສະນະຢ່າງຕັ້ງໜ້າໃນການແກ້ໄຂບັນດາການຂັດແຍ້ງກັນໂດຍສັນຕິວີທີຢູ່ພາກພື້ນອາຊີ - ປາຊີຟິກ ກໍຄືຢູ່ໃນໂລກ.
ທ່ານນາຍົກລັດຖະມົນຕີ David Cameron ຢືນຢັນວ່າ, ລັດຖະບານອັງກິດ ຖືເປັນສຳຄັນການພົວພັນກັບຫວຽດນາມ, ຖືຫວຽດນາມ ແມ່ນຄູ່ຮ່ວມມືສຳຄັນໃນພາກພື້ນ ແລະ ຈະມານະພະຍາຍາມຊຸກຍູ້ການຜັນຂະຫຍາຍບັນດາຄຳໝັ້ນສັນຍາກັບຫວຽດນາມ ໃນບັນດາຂົງເຂດບຸລິມະສິດ, ບົນຈິດໃຈຖະແຫຼງການຮ່ວມກ່ຽວກັບການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດ.
ແລະກໍໃນວັນດຽວກັນ, ທີ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີອັງກິດ David Cameron. ຢູ່ທີ່ນີ້, ທ່ານນາຍົກລັດຖະມົນຕີ ເຊື່ອໝັ້ນວ່າ, ເມື່ອສັນຍາການຄ້າເສລີ (FTA) ທີ່ໄດ້ຮັບການລົງນາມລະຫວ່າງຫວຽດນາມ ແລະ EU ແລ້ວ, ການພົວພັນຮ່ວມມືດ້ານຄ້າລະຫວ່າງຫວຽດນາມ ແລະ ລາຊະອານາຈັກອັງກິດ ຈະມີການຫັນປ່ຽນຢ່າງຕັ້ງໜ້າ. ວົງເງິນການຄ້າ 2 ສົ້ນຈະເຕີບໂຕຢ່າງເໝາະສົມກັບຄວາມສະມາດບົ່ມຊ້ອນ.