ການນຳພັກ,ລັດໄຫວ້ອາໄລ ປະທານໂຮ່ຈີມິນ ແລະ ອາໄລຫາ
ບັນດານັກວິລະຊົນທີ່ເສຍສະຫຼະຊີວິດເພື່ອຊາດ
(vovworld) – ເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນມູນເຊື້ອຕຳຫລວດປະຊາຊົນ ຫວຽດນາມ (19/8/1945 – 19/8/2015) ແລະ 10 ປີແຫ່ງວັນບຸນທົ່ວປວງຊົນປົກປັກຮັກສາຄວາມປອດໄພປະເທດຊາດ (19/8/2005 – 19/8/2015), ຕອນເຊົ້າວັນທີ 18/8, ຄະນະຜູ້ແທນຄະນະບໍລິຫານງານສູນກາງພັກ, ປະທານປະເທດ, ສະພາແຫ່ງຊາດ, ລັດຖະບານ, ຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ເຂົ້າສຸສານໄຫວ້ອາໄລປະທານ ໂຮ່ຈີມິນ ແລະ ອາໄລຫາບັນດາວິລະຊົນນັກຮົບທີ່ເສຍສະຫຼະຊີວິດເພື່ອຊາດ ຢູ່ອະນຸສາວະລີວິລະຊົນນັກຮົບທີ່ເສຍສະຫຼະຊີວິດເພື່ອຊາດ. ເຂົ້າຮ່ວມພິທີໄຫວ້ອາໄລມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູຈ້ອງ, ທ່ານປະທານປະເທດ ເຈືອງເຕີ໋ນຊາງ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ, ທ່ານປະທານສະພາແຫ່ງຊາດ ຫງວຽນຊິງຮຸ່ງ, ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຫງວຽນທ້ຽນເຢີນ. ນະທີ່ນີ້, ການນຳພັກ, ລັດ, ແນວໂຮມປະເທດຊາດ ຫວຽດນາມ ສະແດງຄວາມເຄົາລົບ, ອາໄລຫາບຸນຄຸນອັນໃຫຍ່ຫລວງຂອງປະທານ ໂຮ່ຈີມິນ ສຳລັບພາລະກິດປະຕິວັດຂອງພັກ ແລະ ປະເທດຊາດ.
ຫລັງຈາກນັ້ນ, ທີ່ອະນຸສາວະລີບັນດາວິລະຊົນນັກຮົບທີ່ເສຍສະຫຼະຊີວິດເພື່ອຊາດ, ຄະນະຜູ້ແທນຄະນະບໍລິຫານງານສູນກາງພັກ, ປະທານປະເທດ, ສະພາແຫ່ງຊາດ, ລັດຖະບານ, ຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ວາງພວງມາລາອາໄລຫາບັນດານັກວິລະຊົນນັກຮົບທີ່ເສຍສະຫຼະຊີວິດເພື່ອຊາດ
ແລະກໍໃນຕອນເຊົ້າວັນທີ 18/8, ຄະນະຜູ້ແທນຄະນະພັກຕຳຫລວດສູນກາງ - ກະຊວງຕຳຫລວດ ໂດຍທ່ານພົນເອກ ເຈີ່ນດ້າຍກວາງ, ລັດຖະມົນຕີວ່າການກະຊວງຕຳຫລວດ ເປັນຫົວໜ້າຄະນະ, ເຂົ້າສຸສານໄຫວ້ອາໄລປະທານ ໂຮ່ຈີມິນ ແລະ ວາງພວງມາລາອາໄລຫາບັນດາວິລະຊົນນັກຮົບທີ່ເສຍສະຫຼະຊີວິດເພື່ອຊາດຢູ່ອະນຸສາວະລີບັນດາວິລະຊົນນັກຮົບທີ່ເສຍສະຫຼະຊີວິດເພື່ອຊາດ. ໃນຕະຫລອດໄລຍະ 70 ປີແຫ່ງວັນປະຕິບັດໜ້າທີ່ປົກປັກຮັກສາຄວາມປອດໄພແຫ່ງຊາດ, ຮັກສາຄວາມລະບຽບຮຽກຮ້ອຍສັງຄົມ, ທີ່ລຳບາກກາກກຳ, ສັບສົນ, ພະນັກງານ, ນັກຮົບຕຳຫລວດປະຊາຊົນຫລາຍຄົນບໍ່ຫົວຊາຕໍ່ຄວາມອັນຕະລາຍ, ພ້ອມແລ້ວທີ່ຈະເສຍສະຫຼະຊີວິດ ເພື່ອປົກປັກຮັກສາພັກ, ຮັກສາລະບອບສັງຄົມນິຍົມ, ເພື່ອຊີວິດການເປັນຢູ່ສະຫງົບສຸກ ແລະ ຄວາມຜາສຸດຂອງປະຊາຊົນ.