ທ່ານ Mike Johnson, ປະທານສະພາຕ່ຳ ອາເມລິກາ (ພາບ:Vietnam+ )

ວັນທີ 13 ກຸມພາ, ການນຳພັກ ສາທາລະນະ ຢູ່ສະພາຕ່ຳ ອາເມລິກາ ໄດ້ປະຕິເສດບ້ວງເງິນໜູນຊ່ວຍສະຫງວນໃຫ້ ຢູແກຼນ ພາຍຫຼັງທີ່ກ່ອນນັ້ນ, ສະພາສູງ ອາເມລິກາ ໄດ້ຮັບຮອງເອົາຮ່າງກົດໝາຍທີ່ຄ້າຍຄືກັນ ກໍ່ຄືບໍ່ຫົວຊາຕໍ່ຄຳຮຽກຮ້ອງຂອງທ່ານປະທານາທິບໍດີ Joe Biden.

        ກ່າວຄຳເຫັນຕໍ່ວົງການນັກຂ່າວ, ທ່ານ Mike Johnson, ປະທານສະພາຕ່ຳ ອາເມລິກາ ໄດ້ປະກາດວ່າ: ທ່ານບໍ່ມີເຈດຕະນາອະນຸຍາດລົງປະຊາມະຕິກ່ຽວກັບຮ່າງກົດໝາຍວ່າດ້ວຍການໃຊ້ຈ່າຍງົບປະມານ 95 ຕື້ໂດລາສະຫະລັດ, ສ່ວນຫຼາຍແມ່ນລວມມີບັນດາບ້ວງເງິນໜູນຊ່ວຍໃຫ້ແກ່ ຢູແກຼນ. ຕາມທ່ານປະທານສະພາຕ່ຳ ອາເມລິກາ ແລ້ວ, ທ່ານບໍ່ສາມາດຍອມຮັບຮ່າງກົດໝາຍນີ້ ຖ້າບໍ່ມີບັນດາມາດຕະການຮັດແໜ້ນໃໝ່ ເພື່ອແນໃສ່ສະກັດກັ້ນສະພາບອົບພະຍົບເຂົ້າ ອາເມລິກາ ແບບຜິດກົດໝາຍ ຜ່ານຊາຍແດນທາງທິດໃຕ້.

        ແຕ່ຫຼາຍເດືອນມານີ້, ຄວາມມານະພະຍາຍາມໜູນຊ່ວຍຂອງ ອາເມລິກາ ສະຫງວນໃຫ້ ຢູແກຼນ ເກືອບຄືວ່າຖືກຢຸດສະຫງັກ  ຍ້ອນສະພາບການວຸ່ນວາຍຢູ່ສະພາແຫ່ງຊາດ. ຝ່າຍພັກປະຊາທິປະໄຕຢູ່ສະພາສູງ ໄດ້ຮ່ວມມືກັບພັກ ສາທາລະນະ ເພື່ອຮຽບຮຽງຮ່າງກົດໝາຍລວມ, ເຊິ່ງລວມມີບ້ວງເງິນໜູນຊ່ວຍຕ່າງປະເທດ ກໍ່ຄືບັນດາມາດຕະການຮັດແໜ້ນຄວາມໝັ້ນຄົງເຂດຊາຍແດນໃນຫຼາຍທົດສະວັດຜ່ານມາ.