ທ່ານເລຂາທິການໃຫຍ່ພັກກອມມູນິດ ຫວຽດນາມ Nguyen Phu Trong ໄດ້ຕ້ອນຮັບທ່ານ Medvedev ນາຍົກລັດຖະມົນຕີ ລັດເຊຍ
ພາບ:internet |
(vovworld) - ຕອນບ່າຍວັນທີ 7/11, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ພັກກອມມູນິດ ຫວຽດນາມ Nguyen Phu Trong ໄດ້ຕ້ອນຮັບທ່ານ Medvedev ນາຍົກລັດຖະມົນຕີ ລັດເຊຍ, ປະທານພັກປະເທດລັດເຊຍເອກະພາບ. ທ່ານເລຂາທິການໃຫຍ່ Nguyen Phu Trong ຕີລາຄາສູງການຢ້ຽມຢາມຂອງທ່ານນາຍົກລັດຖະມົນຕີ Medvedev ໃນການຜັນຂະຫຍາຍປະສິດທິຜົນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ. ທ່ານເລຂາທິການໃຫຍ່ Nguyen Phu Trong ປາດຖະຫນາຢາກໃຫ້ພັກກອມມູນິດ ຫວຽດນາມ ແລະ ພັກປະເທດລັດເຊຍເອກະພາບ ຊຸກຍູ້ການຮ່ວມມືໃນທຸກຂົງເຂດຢ່າງບໍ່ຢຸດຢັ້ງ. ທ່ານນາຍົກລັດຖະມົນຕີ ລັດເຊຍ Medvedev ຢືນຢັນວ່າ: ສະຫະພັນລັດເຊຍ ຖື ຫວຽດນາມ ແມ່ນຄູ່ຮ່ວມມືສຳຄັນຕົ້ນຕໍຢູ່ພາກພື້ນ ອາຊີຕາເວັນອອກສຽງໃຕ້. ສະຫະພັນລັດເຊຍ ຕັດສິນໃຈພັດທະນາການພົວພັນຄູ່ຮ່ວມມືຍຸດທະສາດຮອບດ້ານກັບ ຫວຽດນາມ, ເປັນຕົ້ນແມ່ນໃນບັນດາຂົງເຂດເສດຖະກິດ, ການຄ້າ, ການລົງທຶນ, ສຶກສາ, ວິທະຍາສາດ -ເຕັກນິກ ແລະ ປ້ອງກັນຊາດປ້ອງກັນຄວາມສະຫງົບກໍຄືເພີ່ມທະວີການພົວພັນຮ່ວມມືລະຫວ່າງພັກປະເທດລັດເຊຍເອກະພາບ ແລະ ພັກກອມມູນິດ ຫວຽດນາມ. ຕອນບ່າຍວັນດຽວກັນ, ທ່ານປະທານສະພາແຫ່ງຊາດ ຫວຽດນາມ Nguyen Sinh Hung ໄດ້ຕ້ອນຮັບທ່ານນາຍົກລັດຖະມົນຕີລັດເຊຍ Medvedev. ທ່ານປະທານສະພາແຫ່ງຊາດ Nguyen Sinh Hung ໄດ້ຢືນຢັນວ່າການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ Medvedev ແມ່ນເຫດການການເມືອງສຳຄັນເພື່ອຜັນຂະຫຍາຍບັນດາຂໍ້ຕົກລົງຂັ້ນສູງທີ່ບັນລຸໄດ້ ແລະ ວາງອອກບັນດາມາດຕະການລະອຽດເພື່ອຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານທີ່ຫາກໍ່ໄດ້ຮັບການສ້າງຂຶ້ນເມື່ອເດືອນ 7/2012.