(vovworld) - ຕອນເຊົ້າວັນທີ 4/9, ທ່ານນາຍົກລັດຖະມົນຕີ Nguyen Tan Dung ໄດ້ເຂົ້າຮ່ວມພິທີໄຂສົກຮຽນໃໝ່ຢູ່ໂຮງຮຽນມັດທະຍົມຕອນປ່າຍລົງເລິກ Le Hong Phong, ນະຄອນ ໂຮ່ຈີມິນ. ກ່າວຄວາມເຫັນຢູ່ທີ່ນີ້, ທ່ານນາຍົກລັດຖະມົນຕີ Nguyen Tan Dung ເນັ້ນໜັກວ່າ: ພັກ ແລະ ລັດຫວຽດນາມ ຍາມໃດກໍ່ເອົາໃຈໃສ່ເບິ່ງແຍງເຖິງການພັດທະນາພາລະກິດການສຶກສາ ຖືວ່ານີ້ແມ່ນລັດຖະນະໂຍບາຍອັນດັບໜຶ່ງໃນຍຸດທະສາດພັດທະນາປະເທດຊາດ, ແມ່ນປັດໃຈທີ່ມີຄວາມໝາຍຕັດສິນເພື່ອລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ຍູ້ແຮງການຫັນເປັນປະເທດອຸດສາຫະກຳ, ພັດທະນາຢ່າງວ່ອງໄວ - ໝັ້ນຄົງ. ທ່ານນາຍົກລັດຖະມົນຕີ Nguyen Tan Dung ຖືວ່າ ສົກຮຽນ 2012 – 2013 ແມ່ນປີທີ 2 ແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ປະຕິບັດຍຸດທະສາດພັດທະນາການສຶກສາໄລຍະ 2011 – 2020, ໃນນັ້ນພັດທະນາແຫຼ່ງຊັບພະຍາກອນມະນຸດຢ່າງວ່ອງໄວ, ພິເສດແມ່ນແຫຼ່ງຊັບພະຍາກອນມະນຸດທີ່ມີຄຸນນະພາບສູງ, ສູມໃສ່ການປ່ຽນໃໝ່ພື້ນຖານການສຶກສາໂດຍພື້ນຖານ ແລະ ຮອບດ້ານ ແມ່ນຂອດບຸກທະລຸໃນຍຸດທະສາດ ເພື່ອພັດທະນາປະເທດຊາດ. ທ່ານນາຍົກລັດຖະມົນຕີ Nguyen Tan Dung
ເນັ້ນໜັກວ່າ:
ທ່ານນາຍົກລັດຖະມົນຕີ Nguyen Tan Dung ເຂົ້າຮ່ວມພິທີໄຂສົກຮຽນໃໝ່
ຢູ່ໂຮງຮຽນມັດທະຍົມຕອນປ່າຍລົງເລິກ Le Hong Phong
(ພາບ: google.com)
”ໂຮງຮຽນມັດທະຍົມຕອນປ່າຍລົງເລິກ Le Hong Phong ແລະບັນດາໂຮງຮຽນລົງເລິກໃນທົ່ວປະເທດຕ້ອງຄົ້ນພົບ ແລະ ບຳລຸງສ້າງຊັບພະຍາກອນມະນຸດທີ່ມີຄຸນນະພາບສູງ. ນັກຮຽນບໍ່ພຽງແຕ່ເກັ່ງວິຊາຕ່າງໆເທົ່ານັ້ນ ຫາກຕ້ອງເກັ່ງດ້ານຄວາມຮູ້ສັງຄົມ, ເກັ່ງກ່ຽວກັບຂະແໜງອຸດສາຫະກຳປ່າຍແຫຼມອີກດ້ວຍ. ພະນັກງານ, ຄູສອນຂອງໂຮງຮຽນຕ້ອງມີສະຕິໃນການກໍ່ສ້າງໂຮງຮຽນໃຫ້ກາຍເປັນສູນບຳລຸງສ້າງທີ່ມີຄຸນນະພາບສູງຂອງນະຄອນ ແລະ ຂອງທົ່ວປະເທດ. ລັດຖະບານ, ຄະນະພັກ, ອຳນາດການປົກຄອງທຸກຂັ້ນ, ບັນດາທ້ອງຖີ່ນໃນທົ່ວປະເທດຕ້ອງສ້າງເງື່ອນໄຂ, ເອົາໃຈໃສ່ເຖິງການລົງທຶນກວ່າອີກໃຫ້ແກ່ພາລະກິດບຳລຸງສ້າງຊັບພະຍາກອນມະນຸດ, ສ້າງເງື່ອນໄຂດີກວ່າອີກ, ຄົບຖ້ວນກວ່າອີກໃຫ້ແກ່ການຮຳ່ຮຽນຂອງລູກຫຼານ”.
ແລະກໍ່ໃນຕອນເຊົ້າວັນທີ 4/9, ທ່ານຮອງນາຍົກລັດຖະມົນຕີ Nguyen Xuan Phuc ກໍ່ໄດ້ເຂົ້າຮ່ວມພິທີໄຂສົກຮຽນໃໝ່ 2012-2013 ຢູ່ໂຮງຮຽນ Chu Van An, ຮ່າໂນ້ຍ. ກ່າວຄວາມເຫັນຢູ່ທີ່ນີ້, ທ່ານຮອງນາຍົກລັດຖະມົນຕີ Nguyen Xuan Phuc ສະເໜີ:
ທ່ານຮອງນາຍົກລັດຖະມົນຕີ Nguyen Xuan Phuc ເຂົ້າຮ່ວມພິທີໄຂສົກຮຽນໃໝ່
ຢູ່ໂຮງຮຽນ Chu Van An
(ພາບ: google.com) ”ໂດຍເອກອ້າງທະນົງໃຈແມ່ນນັກຮຽນຂອງໂຮງຮຽນ Chu Van An ແຫ່ງທີ່ໄດ້ບຳລຸງສ້າງການນຳຂັ້ນສູງ, ນັກວິທະຍາສາດ, ນັກຄຸ້ມຄອງ, ຜູ້ຊົງຄູນວຸດທິ, ປັນຍາຊົນຫຼາຍຄົນ, ພວກຫຼານຈົ່ງພະຍາຍາມເສີມຂະຫຍາຍມູນເຊື້ອອັນດີງາມນັ້ນ, ຈົ່ງດຸໝັ່ນໃນການຮຳ່ຮຽນ, ຫຼໍ່ຫຼອມ ມີວິທີການຮຳ່ຮຽນທີ່ມີປະສິດທິຜົນ, ສູ້ຊົນເພື່ອກາຍເປັນພົນລະເມືອງທີ່ມີຜົນປະໂຫຍດໃຫ້ແກ່ປະເທດຊາດຢ່າງແທ້ຈິ່ງ, ຕອບສະໜອງຄວາມມຸ້ງຫວັງຂອງຄອບຄົວ ແລະ ສັງຄົມ”.
ທ່ານນາງຮອງປະທານປະເທດ Nguyen Thi Doan ຕີກອງໄຂສົກຮຽນໃໝ່
ຢູ່ໂຮງຮຽນມັດທະຍົມຕອນຢ່າຍລົງເລິກ Hoang Van Thu
(ພາບ: google.com)
ແລະກໍ່ຢູ່ທີ່ແຂວງ ຮ່ວາບິ່ງ, ຕອນເຊົ້າວັນທີ 4/9, ທ່ານນາງຮອງປະທານປະເທດ Nguyen Thi Doan ກໍ່ໄດ້ເຂົ້າຮ່ວມ ແລະ ຕີກອງໄຂສົກຮຽນໃໝ່ຢູ່ໂຮງຮຽນມັດທະຍົມຕອນປ່າຍລົງເລິກ Hoang Van Thu, ນະຄອນ ຮ່ວາບິ່ງ. ກ່າວຄວາມເຫັນນະພິທີ, ທ່ານນາງຮອງປະທານປະເທດ Nguyen Thi Doan ເນັ້ນໜັກວ່າ, ນັກຮຽນ ແລະ ຄູສອນໃນໂຮງຮຽນຄວນຕັ້ງໜ້າປະຕິບັດບັ້ນຂົນຂວາຍກໍ່ສ້າງ ”ໂຮງຮຽນສະໜິດສະໜົມ, ນັກຮຽນຕັ້ງໜ້າ” ໂດຍກະຊວງສຶກສາ - ບຳລຸງສ້າງປຸກລະດົມ, ເດັດດຽວສະກັດກັ້ນບໍ່ໃຫ້ໄພສັງຄົມແຊກແຊງເຂົ້າໂຮງຮຽນ.