ການປະຊຸມຂ່າວນັດສາມັນປະຈຳເດືອນ 5 ຂອງລັດຖະບານ

ວັນສຸກ ທີ 30 ພຶດສະພາ ຄ.ສ. 2014 | 15:27:36

ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ຫງວຽນວັນເນັນ ໄດ້ເປັນປະທານການປະຊຸມຂ່າວນັດສາມັນປະຈຳເດືອນ 5 ຂອງລັດຖະບານ

(ພາບ:http://baodientu.chinhphu.vn/)

(vovworld)- ຕອນບ່າຍວັນທີ 29/5, ຢູ່ຮ່າໂນ້ຍ, ໄດ້ດຳເນີນການປະຊຸມຂ່າວນັດສາມັນປະຈຳເດືອນ 5 ຂອງລັດຖະບານ ເພື່ອແຈ້ງຂ່າວກ່ຽວກັບຫຼາຍບັນຫາເສດຖະກິດສັງຄົມທີ່ໄດ້ຮັບຄວາມສົນໃຈ. ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ຫງວຽນວັນເນັນ ໄດ້ເປັນປະທານການປະຊຸມຂ່າວ. ຕອບສຳພາດນັກຂ່າວກ່ຽວກັບກໍລະນີຈີນຕັ້ງຮ້ານເຈາະນ້ຳມັນໄຮຢາງ 981 ໃນເຂດຖະກິດຈຳເພາະ ແລະ ໄຫຼ່ທະວີບຂອງຫວຽດນາມນັ້ນ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ຫງວຽນວັນເນັນ ຢືນຢັນວ່າ ນີ້ແມ່ນການກະທຳລ່ວງລະເມີດຢ່າງຮ້າຍແຮງຕໍ່ອະທິປະໄຕເຂດນ່ານທະເລຂອງຫວຽດນາມ; ລ່ວງລະເມີດກົດໝາຍສາກົນ. ກ່ຽວກັບວິທີດຳເນີນການຮ້ອງຟ້ອງຈີນຢູ່ສານສາກົນ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ຫງວຽນວັນເນັນ ໃຫ້ຮູ້ວ່າ : ຫວຽດນາມໄດ້ກະກຽມສຳເນົາເອກະສານກ່ຽວກັບເລື່ອງນີ້ແລ້ວ. ໃນໄລຍະປະຈຸບັນ, ຊາວປະມົງເອງແມ່ນຜູ້ປົກປັກຮັກສາອະທິປະໄຕເຂດທະເລໝູ່ເກາະຢ່າງມີປະສິດທິຜົນທີ່ສຸດ, ດັ່ງນັ້ນ, ລັດຖະບານຈະຜັນຂະຫຍາຍບັນດານະໂຍບາຍນູນຊ່ວຍຊາວປະມົງປະກອບອາຊີບຫາປາຢູ່ທະເລ. ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ຫງວຽນວັນເນັນ ຊີ້ແຈ້ງວ່າ :

“ ຄວາມເຫັນດີເປັນເອກະສັນທີ່ກອງປະຊຸມລັດຖະບານຄັ້ງນີ້ ແມ່ນໃຫ້ຊາວປະມົງໄດ້ກູ້ຢືມເງິນດ້ວຍຄ່າດອກເບ້ຍຕ່ຳຄື 3% ໃນໄລຍະ 10 ປີເພື່ອຕໍ່ກຳປັ່ນໃໝ່ ແລະ ຍົກລະດັບເປັນກຳປັ່ນຫຸ້ມເຫຼັກ, ເພື່ອຮັບໃຊ້ວຽກງານຫາປາຢູ່ໄກຝັ່ງ, ທັງນີ້ກໍຊ່ວຍໃຫ້ຊາວປະມົງອຸ່ນອຽນໃຈ, ໄປຫາປາຢູ່ໄກຝັ່ງ ແລະ ປົກປັກຮັກສາອະທິປະໄຕເຂດໝູ່ເກາະທະເລຂອງປະເທດຊາດ”

ກ່ຽວກັບວຽກງານຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຢູ່ບັນດາເຂດອຸດສາຫະກຳ, ເຂດເສດຖະກິດຢູ່ແຂວງຮ່າຕິ້ງ ແລະ ບີງເຢືອງໃນໄລຍະທີ່ຜ່ານມາ, ທ່ານພົນຕີຮ່ວາງກົງຕືຫົວໜ້າອົງການສືບສວນກະຊວງຕ່ຳຫຼວດໃຫ້ຮູ້ວ່າ ທາງກະຊວງໄດ້ຊີ້ນຳຈັດສົ່ງກຳລັງໄປປົກປັກຮັກສາຊີວິດອີນຊີ ແລະ ຊັບສິນຂອງນັກລົງທຶນຕ່າງປະເທດ ແລະ ນຳຕົວພວກກະທຳຜິດຂຶ້ນສານດຳເນີນຄະດີ. ກ່ຽວກັບມາດຕະການແກ້ໄຂໃນໄລຍະທີ່ຈະມາເຖິງ, ທ່ານພົນຕີຮ່ວາງກົງຕື ໃຫ້ຮູ້ວ່າ :

“ ຕ້ອງປະຕິບັດບັນດາມາດຕະການແກ້ໄຂຢ່າງຄົບຊຸດ, ໃນນັ້ນມີມາດຕະການປຸກລະດົມ, ຂົນຂວາຍມະຫາຊົນ ເຫັນດີເຫັນພ້ອມກັບທັດສະນະຊີ້ນຳອັນຖືກຕ້ອງຂອງພັກ ແລະ ລັດ, ບໍ່ຟັງຄວາມຍຸຍົງສົ່ງເສີມຂອງພວກຄົນທີ່ບໍ່ດີ. ພ້ອມກັນນັ້ນ ກໍເພີ່ມທະວີກຳລັງໄປປົກປັກຮັກສາຊີວິດອີນຊີ ແລະ ຊັບສິນຂອງນັກລົງທຶນຕ່າງປະເທດຢູ່ບັນດາເຂດອຸດສາຫະກຳ, ເຂດເສດຖະກິດ, ເຂດຜະລິດສົ່ງອອກ...”