ການເຄື່ອນໄຫວຂົນສົ່ງເຄື່ອງອຸປະຖຳຜ່ານດ່ານຊາຍແດນ Rafah ຖືກຂາດວັກຂາດຕອນ ເມື່ອສົງຄາມເກີດຂຶ້ນຄືນໃໝ່

ວັນທີ 4 ທັນວາ, ຫ້ອງການປະສານງານບັນດາບັນຫາມະນຸດສະທຳຂອງ ສປຊ  (OCHA) ໃຫ້ຮູ້ວ່າ ບັນດາກຸ່ມກູ້ໄພກູ້ຊີບ ມີພຽງແຕ່ການເຄື່ອນໄຫວທີ່ “ຈຳກັດທີ່ສຸດ” ຢູ່ ກາຊາ, ສະເພາະເຄື່ອງອຸປະຖຳທີ່ສົ່ງໄປຍັງທາງທິດເໜືອ ກາຊາ “ປັດຈຸບັນ ພວມຖືກປິດລ້ອມ”. OCHA ກໍ່ໃຫ້ຮູ້ວ່າ ມີປະຊາຊົນຢ່າງໜ້ອຍສຸດ 316 ຄົນ ເສຍຊີວິດຢູ່ເຂດ ກາຊາ ນັບແຕ່ຕອນບ່າຍວັນທີ 2 ທັນວາ ຫາຕອນບ່າຍວັນທີ 3 ທັນວາ, ໃນສະພາບການປະທະກັນທີ່ເກີດຂຶ້ນຄັ້ງໃໝ່ພາຍຫຼັງຄຳສັ່ງຢຸດຍິງ ລະຫວ່າງອິດສະລາແອັນ ແລະ ຮາມາດ ໝົດຜົນສັກສິດເມື່ອຕົ້ນເດືອນທັນວາ ແລະ ອິດສະລາແອັນ ໄດ້ເປີດບັນດາການບຸກໂຈມຕີໃຫຍ່ທາງອາກາດ, ທາງບົກ ແລະ ທາງທະເລ.

ໃນຂະນະນັ້ນ, ອົງການໜູນຊ່ວຍຊາວອົບພະຍົບປາແລັດສະຕິນ (UNRWA) ໄດ້ຢັ້ງຢືນວ່າ ປະຊາຊົນຢູ່ນະຄອນ Rafah (ຢູ່ທາງທິດໃຕ້ ກາຊາ) ຕ້ອງໄປລີ້ໄພເນື່ອງຈາກບັນດາການບຸກໂຈມຕີທາງອາກາດຈາກອິດສະລາແອັນ. ທ່ານ Thomas White, ຜູ້ນຳ UNRWA ໃຫ້ຮູ້ວ່າ ອົງການນີ້ຍັງບໍ່ທັນຮູ້ວ່າ ຈະໜູນຊ່ວຍ ປະຊາຊົນ ທີ່ພວມຕ້ອງການແນະນຳ ການຊອກຫາສະຖານທີ່ປອດໄພໄດ້ຄືແນວໃດ. ປັດຈຸບັນ ມີປະຊາຊົນ ປະມານ 1,8 ລ້ານຄົນ ດຳລົງຊີວິດຢູ່ເຂດ ກາຊາ ພາຍຫຼັງກອງທັບອິດສະລາແອັນປະກາດຄຳສັ່ງຮຽກຮ້ອງ ປະຊາຊົນ ຕ້ອງເດີນທາງອອກຈາກທາງທິດເໜືອເຂດ ກາຊາ ເມື່ອກາງເດືອນຕຸລາ.