ວັນທີ 29 ກັນຍາ, ທີ່ປຶກສາດ້ານສື່ມວນຊົນຂອງທ່ານປະທານາທິບໍດີຕວັກກີ, ທ່ານ Fahrettin Altun ເນັ້ນໜັກວ່າ, ຄຳຖະແຫຼງຂອງເຈົ້າໜ້າທີ່ ອາກເມນີ ທ່ານໜຶ່ງ, ໃນນັ້ນໄດ້ເວົ້າວ່າ: ວັນທີ 29 ກັນຍາ, ຕວັກກີ ໄດ້ຍິງເຮືອບິນສູ້ຮົບຂອງ ອາກເມນີ ລຳໜຶ່ງຕົກ ຢູ່ໃນເຂດດິນແດນ ຂອງ ອາກເມນີ ແມ່ນ “ບໍ່ຖືກຕ້ອງ”. ແລະກໍ່ໃນວັນດຽວກັນ, ກະຊວງປ້ອງກັນປະເທດ ອາແຊັກໄບຊານ ກໍ່ປະຕິເສດຂໍ້ມູນຂ່າວດັ່ງກ່າວ.

          ບັນດາຄຳຖະແຫຼງປະຕິເສດຂອງວົງການເຈົ້າໜ້າທີ່ຕວັກກີ ແລະ ອາແຊັກໄບຊານ ໄດ້ຍົກອອກມາ, ພາຍຫຼັງໃນວັນດຽວກັນ, ກະຊວງປ້ອງກັນປະເທດ ອາກເມນີ ໄດ້ແຈ້ງໃຫ້ຊາບວ່າ ມີເຮືອບິນສູ້ຮົບ F-16 ຂອງຕວັກກີ ໄດ້ຍິງເຮືອບິນ Su-25 ຂອງກອງທັບອາກາດ ອາກເມນີ ຕົກ. ຕາມທ່ານ Shushan Stepanyan, ໂຄສົກກະຊວງປ້ອງກັນປະເທດອາກເມນີ ແລ້ວ, ເຫດການດັ່ງກ່າວເກີດຂຶ້ນໃນເຂດນ່ານຟ້າຂອງອາກເມນີ ໃນຂະນະທີ່ເຮືອບິນຂອງກອງທັບເຮືອປະເທດນີ້ພວມປະຕິບັດໜ້າທີ່ດ້ານການທະຫານ. ການຜັນແປດັ່ງກ່າວໄດ້ເຮັດໃຫ້ເກີດສະພາບການເຄັ່ງຕຶງຢູ່ເຂດທີ່ຂັດແຍ້ງກັນ Nagorny-Karabakh ລະຫວ່າງອາກເມນີ ແລະ ອາແຊັກໄບຊານ ເປັນມື້ທີ 3 ແລ້ວ ແລະ ມີຄວາມສັບສົນຂຶ້ນຕື່ມ.