ພາບປະກອບ

ວັນທີ 6 ທັນວາ, ທ່ານ Eylon Levy, ໂຄສົກຂອງລັດຖະບານ ອິດສະຣາແອນ ໄດ້ຢັ້ງຢືນວ່າ: ຢ່າງໜ້ອຍສຸດ, ເຄິ່ງໜຶ່ງຂອງຜູ້ບັນຊາການກຳລັງ ຮາມາດ ຢູ່ເຂດ ກາຊາ ຖືກດັບສູນນັບແຕ່ເກີດການບຸກໂຈມຕີມີຊື່ວ່າ “ດາບເຫຼັກ” ຂອງກອງທັບ ອິດສະຣາແອນ ເຂົ້າເຂດດິນແດນແຫ່ງນີ້ໃນວັນທີ 7 ຕຸລາ. ກ່າວຄຳເຫັນໃນການປະຊຸມຖະແຫຼງຂ່າວສາກົນຢູ່ Tel Aviv, ທ່ານ Levy ໃຫ້ຮູ້ວ່າ: ບັ້ນບຸກໂຈມຕີຂອງທະຫານບົກເຂົ້າເຂດ ກາຊາ ພວມບັນລຸໄດ້ຫຼາຍບາດກ້າວໃຫຍ່, ເຮັດໃຫ້ກຳລັງການທະຫານຂອງ ຮາມາດ ຫລຸດລົງຫຼາຍພໍສົມຄວນ.

        ໃນຂະນະນັ້ນ, ກອງທັບ ອິດສະຣາແອນ ຢັ້ງຢືນວ່າ: ການບຸກໂຈມຕີຂອງທະຫານບົກປະເທດນີ້ເຂົ້າເຂດ ກາຊາ ຕ້ອງແກ່ຍາວອີກຢ່າງໜ້ອຍສຸດ 1 ເດືອນ ຈຶ່ງຈະສາມາດກໍ່ຄວາມກົດດັນເພື່ອບັງຄັບໃຫ້ກຳລັງ ຮາມາດ ຕ້ອງກັບຄືນສູ່ໂຕະເຈລະຈາກ່ຽວກັບການແລກປ່ຽນຕົວປະກັນ ແລະ ນັກໂທດ.

        ວັນທີ 6 ທັນວາ, ສະຫະພາບເອີລົບ (EU) ໄດ້ສ້າງແຜນການຈັດ 6 ຖ້ຽວບິນມະນຸດສະທຳໃຫມ່ ເພື່ອສະໜອງການໜູນຊ່ວຍເຄື່ອງຂອງທີ່ຈຳເປັນ ໃຫ້ແກ່ບັນດາຜູ້ປະສົບກັບຄວາມຫຍຸ້ງຍາກຢູ່ເຂດ ກາຊາ ໃນເດືອນທັນວາ. ການກະທຳນີ້ໄດ້ຍົກຍອດຈຳນວນແຫຼ່ງສະໜອງການອຸປະຖຳຂອງ EU ຂຶ້ນເຖິງ 1.000 ໂຕນ, ດ້ວຍ 30 ຖ້ຽວບິນໃນຂອບເຂດການບິນມະນຸດສະທຳ.

        ກໍ່ໍ່ກ່ຽວຂ້ອງເຖິງການເຄື່ອນໄຫວນີ້, ທ່ານ Antonio Guterres, ເລຂາທິການໃຫຍ່ ສປຊ ໄດ້ຮຽກຮ້ອງໃຫ້ສະພາຄວາມໝັ້ນຄົງ ສປຊ ມີການກະທຳເພື່ອແນໃສ່ສະກັດກັ້ນວິນາດສະກຳມະນຸດສະທຳຢູ່ເຂດ ກາຊາ; ຮຽກຮ້ອງໃຫ້ບັນດາຝ່າຍ ປະກາດຄຳສັ່ງຢຸດຍິງ ເພື່ອຈຸດໝາຍມະນຸດສະທຳ. ກໍ່ໃນວັນທີ 6 ທັນວາ, ທ່ານ Volker Turk, ຂ້າຫຼວງໃຫຍ່ສິດທິມະນຸດ ສປຊ ໃຫ້ຮູ້ວ່າ ປະຈຸບັນ, ມີປະມານ 1,9 ລ້ານຄົນ ໃນຈຳນວນ 2,2 ລ້ານຄົນຢູ່ເຂດ ກາຊາ ໄດ້ອົບພະຍົບອອກໄປແລ້ວ.