(ທີ່ງານຕະຫຼາດນັດ “VietShrimp 2024 - ຮ່ວມເດີນທາງພ້ອມກັບຜູ້ລ້ຽງກຸ້ງ”)

        ວັນທີ 20 ມີນາ, ງານຕະຫຼາດນັດວາງສະແດງສາກົນອຸດສາຫະກຳຂະແໜງກຸ້ງ ຫວຽດນາມ ຄັ້ງທີ 5, ດ້ວຍຫົວຂໍ້ “VietShrimp 2024 - ຮ່ວມເດີນທາງພ້ອມກັບຜູ້ລ້ຽງກຸ້ງ”, ໄຂຂຶ້ນຢູ່ນະຄອນ ກ່າເມົາ. ງານຕະຫຼາດນັດມີການເຂົ້າຮ່ວມຂອງຮ້ານວາງສະແດງປະມານ 200 ຮ້ານຂອງວິສາຫະກິດ, ອົງການຈັດຕັ້ງຢູ່ພາຍໃນປະເທດ ແລະ ສາກົນ 150 ແຫ່ງ.

        ກ່າວຄຳເຫັນທີ່ພິທີໄຂ, ທ່ານ ຫງວຽນຫວຽດທັງ, ປະທານສະມາຄົມອາຊີບຫາປາ ຫວຽດນາມ, ຫົວໜ້າຄະນະຈັດຕັ້ງ VietShrimp 2024 ໃຫ້ຂໍ້ສັງເກດວ່າ, ປີ 2023 ຂະແໜງສິນໃນນ້ຳ ຫວຽດນາມ ເວົ້າລວມ, ຂະແໜງກຸ້ງເວົ້າສະເພາະ, ປະສົບກັບຄວາມຫຍຸ້ງຍາກ, ແຕ່ປີ 2024 ນີ້ຈະມີການຫັນປ່ຽນທີ່ດີກວ່າ. ຄາດວ່າ, ການສົ່ງອອກກຸ້ງໃນປີ 2024 ນີ້ ຈະມີສັນຍານດີຂຶ້ນ ແລະ ອາດຈະເພີ່ມຂຶ້ນແຕ່ 10 – 15% ເມື່ອທຽບໃສ່ປີ 2023.

        “ຮ່ວມເດີນທາງພ້ອມກັບຜູ້ລ້ຽງກຸ້ງ” ກໍ່ແມ່ນຫົວຂໍ້ຂອງງານຕະຫຼາດນັດວາງສະແດງສາກົນເຕັກໂນໂລຊີຂະແໜງກຸ້ງໃນຄັ້ງນີ້. ຄະນະຈັດຕັ້ງປາດຖະໜາວ່າ, ນີ້ຈະແມ່ນເວທີປາໄສໃຫຍ່ເພື່ອໃຫ້ນັກຄຸ້ມຄອງ, ນັກວິທະຍາສາດ, ນັກດຳເນີນທຸລະກິດ, ຊາວນາ ພ້ອມກັນຊອກຫາມາດຕະການແກ້ໄຂທີ່ບັນລຸປະສິດທິຜົນ ເພື່ອນຳຂະແໜງກຸ້ງເຕີບໂຕ, ພ້ອມທັງຫັນເປົ້າໝາຍພັດທະນາຂະແໜງກຸ້ງ ຫວຽດນາມ ແບບຍືນຍົງໃຫ້ປະກົດຜົນເປັນຈິງ.”

        ຕາມຕົວເລກຂອງກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລ້ວ, ໃນໄລຍະກວ່າ 2 ທົດສະວັດຜ່ານມາ, ຂະແໜງລ້ຽງກຸ້ງຍາມໃດກໍ່ຮັກສາບົດບາດນຳໜ້າໃນການສົ່ງອອກສິນໃນນ້ຳຂອງ ຫວຽດນາມ, ກວມເອົາປະມານ 40 – 45% ຍອດມູນຄ່າສົ່ງອອກສິນໃນນ້ຳ ໃນແຕ່ລະປີ, ເທົ່າກັບ 3,5 – 4 ຕື້ USD. ກຸ້ງ ຫວຽດນາມ ພວມໄດ້ສົ່ງອອກໄປຍັງປະມານ 100 ຕະຫຼາດ, ນອນໃນ top 4 ກ່ຽວກັບການສົ່ງອອກໃນໂລກ.