(VOVWORLD) -9 ເດືອນຜ່ານມາ, ວົງເງິນສົ່ງອອກຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນ້ຳ ຄາດວ່າບັນລຸ 35,5 ຕື້ USD, ເພີ່ມຂຶ້ນ 17,7% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ, ການສົ່ງອອກຜະລິດຕະພັນເຄື່ອງປ່າຂອງດົງບັນລຸປະມານ 11,97 ຕື້ USD.
 ການປະຊຸມຖະແຫຼງຂ່າວ (ພາບ: baochinhphu.vn) |
ເຖິງວ່າໂລກລະບາດໂຄວິດ - 19 ໄດ້ສົ່ງຜົນກະທົບບໍ່ໜ້ອຍຕໍ່ຂະແໜງກະສິກຳກໍຕາມ, ແຕ່ 9 ເດືອນຜ່ານມາ, ວົງເງິນສົ່ງອອກຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນ້ຳ ຄາດວ່າບັນລຸ 35,5 ຕື້ USD, ເພີ່ມຂຶ້ນ 17,7% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ, ການສົ່ງອອກຜະລິດຕະພັນເຄື່ອງປ່າຂອງດົງບັນລຸປະມານ 11,97 ຕື້ USD. ເປັນອັນວ່າ, ຂະແໜງກະສິກຳຍັງຮັກສາໄດ້ຈັ່ງຫວະເຕີບໂຕ, ຢັ້ງຢືນບົດບາດເປັນເສົາຄ້ຳຂອງເສດຖະກິດ - ສັງຄົມຂອງທັງປະເທດ ດ້ວຍລະດັບການເຕີບໂຕບວກໃນໄຕມາດທີ III/2021. ນີ້ແມ່ນຂໍ້ມູນທີ່ໄດ້ຍົກອອກມາໃນການປະຊຸມຖະແຫຼງຂ່າວ ເຊິ່ງຖືກຈັດຂຶ້ນໃນວັນທີ 05 ຕຸລາ ຂອງກະຊວງກະສິກຳ ແລະ ພັດທະນາຊົນນະບົດ.
ຕາມການຕີລາຄາຂອງກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລ້ວ, 9 ເດືອນຜ່ານມາ, ຫຼາຍດັດຊະນີຜະລິດ, ດຳເນີນທຸລະກິດບັນລຸ ແລະ ໄດ້ລື່ນແຜນການທີ່ໄດ້ວາງອອກ. ຂະແໜງກະສິກຳ ຍັງຮັບປະກັນແຫຼ່ງສະໜອງສະບຽງອາຫານທີ່ອຸດົມສົມບູນ, ຮັບໃຊ້ຄວາມຕ້ອງການອຸປະໂພກບໍລິໂພກຢູ່ພາຍໃນປະເທດ ແລະ ສົ່ງອອກ. ອາເມລິກາ, ຈີນ, ຍີ່ປຸ່ນ, ສ.ເກົາຫຼີ ແມ່ນ 4 ຕະຫຼາດສົ່ງອອກຕົ້ນຕໍຂອງຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນ້ຳຂອງ ຫວຽດນາມ.
ທົ່ວຂະແໜງກະສິກຳສູ້ຊົນໃຫ້ບັນລຸລະດັບເຕີບໂຕໃນປີ 2021 ແມ່ນ 2,5 – 2,8%, ມູນຄ່າສົ່ງອອກໃຫ້ບັນລຸ 44 ຕື້ USD. ດັ່ງນັ້ນ, ນັບແຕ່ນີ້ຮອດທ້າຍປີ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຈະສຸມໃສ່ 4 ກຸ່ມມາດຕະການ ເພື່ອຟື້ນຟູການຜະລິດ, ເນັ້ນແມ່ນ: ຍູ້ແຮງການຜະລິດ, ຍູ້ແຮງການພັດທະນາຕະຫຼາດ; ຊຸກຍູ້ການບໍລິໂພກຜະລິດຕະພັນກະເສດ; ແກ້ໄຂຄວາມຫຍຸ້ງຍາກກ່ຽວກັບທຶນຮອນ ແລະ ແຮງງານໃຫ້ແກ່ວິສາຫະກິດປຸງແຕ່ງຜະລິດຕະພັນກະເສດ.