.jpg)
(ຄະນະຜູ້ແທນຂັ້ນສູງນະຄອນຫລວງ ຮ່າໂນ້ຍ ແລະ
ຄະນະຜູ້ແທນຂັ້ນສູງນະຄອນຫລວງ ວຽງຈັນ)
(vovworld) – ຕອນເຊົ້າວັນທີ 9/9, ທີ່ຫ້ອງວ່າການລັດຖະບານ ລາວ ຢູ່ນະຄອນຫລວງ ວຽງຈັນ, ລາວ. ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ, ປະທານຄະນະກຳມາທິການລະຫວ່າງລັດຖະບານ ລາວ - ຫວຽດນາມ, ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງນະຄອນຫລວງ ຮ່າໂນ້ຍ ໂດຍທ່ານນາງ ໂງທິແທງຮັ່ງ, ຮອງເລຂາປະຈຳຄະນະພັກນະຄອນ ຮ່າໂນ້ຍ ນຳໜ້າ, ພວມມີການຢ້ຽມຢາມ ແລະ ເຮັດວຽກຢູ່ ລາວ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ຢືນຢັນວ່າ: ການພົວພັນຮ່ວມມືລະຫວ່າງ 2 ນະຄອນຫລວງ ຮ່າໂນ້ຍ ແລະ ວຽງຈັນ ມີຫລາຍບາດກ້າວໃໝ່ອັນດີງາມ, ມີປະສິດທິຜົນ ແລະ ເຂົ້າສູ່ລວງເລິກ. ທ່ານຮອງນາຍົກລັດຖະມົນຕີ ຫວັງວ່າ: ໃນໄລຍະຈະມາເຖິງ, 2 ຝ່າຍຈະເພີ່ີມທະວີຮັດແໜ້ນການພົວພັນມິດຕະພາບ, ການຮ່ວມມືທີ່ມີຢູ່ແລ້ວກາຍເປັນການພົວພັນເປັນແບບຢ່າງລະຫວ່າງນະຄອນຫລວງບັນດາປະເທດສະມາຊິກ ອາຊຽນ; ຮ່າໂນ້ຍ ຈະແບ່ງປັນກັບ ວຽງຈັນ ບົດຮຽນກ່ຽວກັບການຮັກສາ ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ບັນຫາແຜນຜັງນະຄອນຫລວງ, ໃນສະພາວະປີ 2016 ລາວ ຈະເປັນປະທານ ອາຊຽນ.
ແລະຕອນເຊົ້າວັນດຽວກັນ, ທ່ານນາງຮອງເລຂາປະຈຳຄະນະພັກນະຄອນ ຮ້າໂນ້ຍ ໂງທິແທງຮັ່ງ ເຂົ້າຢ້ຽມຂຳ່ນັບ ທ່ານ ສິນລະວົງ ຄຸດໄພທູນ ເລຂາ, ເຈົ້າຄອງນະຄອນຫລວງ ວຽງຈັນ ແລະ ດຳເນີນການໂອ້ລົມສົນທະນາກັບຄະນະຜູ້ແທນຂັ້ນສູງນະຄອນຫວງ ວຽງຈັນ ໂດຍທ່ານ ອານຸພາບ ຕຸນາລົມ ຮອງເລຂາຄະນະພັກນະຄອນ, ຮອງເຈົ້າຄອງນະຄອນຫຼວງວຽງຈັນ ນຳໜ້າ. 2 ຝ່າຍເຫັນດີເປັນເອກະພາບ ໃນໄລຍະຈະມາເຖິງ ຈະເພີ່ມທະວີການຮ່ວມມືເຂົ້າສູ່ລວງເລິກ, ບັນລຸໄດ້ບັນດາໝາກຜົນສຳຄັນໃນທຸກຂົງເຂດ, ພິເສດແມ່ນດ້ານການເມືອງ, ປ້ອງກັນຊາດປ້ອງກັນຄວາມສະຫງົບ, ເສດຖະກິດ, ວັດທະນະທຳ, ການສຶກສາ, ວິທະຍາສາດ, ເຕັກນິກ. ໂດຍອີງໃສ່ຄວາມຮຽກຮ້ອງຕ້ອງການພັດທະນາ, ຈຸດພິເສດ ແລະ ທ່າແຮງຂອງ 2 ຝ່າຍ, ກຳນົດຂົງເຂດສຸມໃສ່ບຸລິມະສິດການຮ່ວມມືໃນໄລຍະຈະເຖິງ.
ຕອນບ່າຍວັນທີ 9/9, ຄະນະຜູ້ແທນຂັ້ນສູງນະຄອນຫລວງ ຮ່າໂນ້ຍ ເຂົ້າຮ່ວມພິທີເປີດສະຫຼອງໂຄງການຫໍພັກສະຖາບັນການເມືອງ - ການປົກຄອງນະຄອນຫລວງ ວຽງຈັນ ແລະ ຕອນຄ່ຳວັນດຽວກັນ, ດຳເນີນພິທີເຊັນບົດບັນທຶກຊ່ວຍຈຳກ່ຽວກັບການເພີ່ມທະວີສາຍພົວພັນມິດຕະພາບ ແລະ ການຮ່ວມມືລະຫວ່າງ ນະຄອນ ຮ່າໂນ້ຍ - ວຽງຈັນ.