(vovworld) – ຕອນຄ່ຳວັນທີ 17/5, ຢູ່ອະນຸສາວະລີປະທານ ໂຮ່ຈີມິນ ເຊິ່ງຫາກໍ່ເປີດສະຫຼອງ, ຢູ່ນະຄອນ ໂຮ່ຈີມິນ, ໄດ້ດຳເນີນລາຍການສະແດງສິລະປະພິເສດ “ໂຮ່ຈີມິນ ຊື່ຂອງເພີ່ນງາມທີ່ສຸດ”. ລາຍການໄດ້ຮັບການຈັດຕັ້ງເນື່ອງໃນໂອກາດສະເຫຼີມສະຫຼອງ 125 ປີແຫ່ງວັນຄ້າຍວັນເກີດປະທານ ໂຮ່ຈີມິນ (19/5/1890 – 19/5/2015) ແລະ 104 ປີແຫ່ງວັນປະທານ ໂຮ່ຈີມິນ ອອກເດີນທາງໄປຊອກຫາເສັ້ນທາງກູ້ຊາດ (5/6/1911 – 5/6/2015). ຮ້ອຍໂທ ໂງວັນເທ໋, ນັກຮົບປ້ອມປ້ອງກັນຊາຍແດນທ່າກຳປັ່ນ ໄຊງ່ອນ, ຜູ້ເຂົ້າຮ່ວມລາຍການນີ້ ແບ່ງປັນວ່າ:
“ເຂົ້າຮ່ວມລາຍການພົບປະແລກປ່ຽນສະແດງສິລະປະພິເສດມື້ນີ້ ແມ່ນບັນດາພະນັກງານ, ນາຍທະຫານທີ່ໜຸ່ມແໜ້ນ, ພວກຂ້າພະເຈົ້າໝັ້ນໝາຍປະກອບກຳລັງແຮງຂອງຕົນເຂົ້າໃນວຽກງານປົກປັກຮັກສາອະທິປະໄຕຂອງທ່າກຳປັ່ນ ໂຮ່ຈີມິນ, ສົມເປັນນະຄອນໃສ່ຊື່ປະທານ ໂຮ່ຈີມິນ”
ແລະກໍ່ໃນຕອນຄ່ຳວັນທີ 17/5, ຢູ່ຮ່າໂນ້ຍ, ຄະນະຊາວໜຸ່ມນະຄອນ ຮ່າໂນ້ຍກໍ່ໄດ້ຈັດຕັ້ງລາຍການສະເຫຼີມສະຫຼອງ 125 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ຍ້ອງຍໍຊົມເຊີຍ 125 ແບບຢ່າງຊາວໜຸ່ມທີ່ເປັນກຳມະກອນດີເດັ່ນຕາມຄຳສັ່ງສອນຂອງປະທານ ໂຮ່ຈີມິນ…
ເນື່ອງໃນໂອກາດສະເຫຼີມສະຫຼອງ 125 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ໃນເວລາ 20 ໂມງ 10 ນາທີວັນທີ 19/5, ໃນຊ່ອງໂທລະພາບ VTV1 ກໍ່ໄດ້ສາຍຟິມຮູບເງົາເອກະສານ “ໂຮ່ຈີມິນ - ບົດເພງເສລີພາບ”.
ເນື່ອງໃນໂອກາດນີ້, ຫຼາຍທ້ອງຖິ່ນກໍ່ໄດ້ຈັດຕັ້ງການເຄື່ອນໄຫວສະເຫຼີມສະຫຼອງຕ່າງໆ. ຄະນະຜູ້ແທນຂອງສະຫະພັນບັນດາອົງການມິດຕະພາບ ຫວຽດນາມ, ຜູ້ຕາງໜ້າອຳນາດການປົກຄອງ ແລະ ປະຊາຊົນເຂດຊາຍແດນແຂວງ ກວາງນີງ ຂອງ ຫວຽດນາມ ກໍ່ໄດ້ເຂົ້າຮ່ວມລາຍການ “ການທ່ອງທ່ຽວແດງ - ຕາມຮອຍປະທານ ໂຮ່ຈີມິນ” ແລະ “ງາມມະໂຫລານປະຊາຊົນເຂດຊາຍແດນ ຫວຽດນາມ - ຈີນ” ຢູ່ແຂວງ ກວາງສີ, ປະເທດ ຈີນ. ເມື່ອເວົ້າເຖິງຄວາມໝາຍຂອງລາຍການ, ທ່ານ ຫວູຊວນຮົ່ງ, ປະທານສະຫະພັນບັນດາອົງການມິດຕະພາບ ຫວຽດນາມ ຊີ້ແຈ້ງວ່າ:
“ຮອຍຂອງເພີ່ນໃນເຂດດິນແດນ ຈີນ ລ້ວນແຕ່ຕິດພັນກັບບັນດາເຫດການສຳຄັນຂອງການປະຕິວັດ ຫວຽດນາມ ແລະ ເປັນຂີດໝາຍໃຫ້ແກ່ການພົວພັນອ້າຍນ້ອງທີ່ສະໜິດສະໜົມຂອງ 2 ປະເທດພວກເຮົາ. ການເຄື່ອນໄຫວ ການທ່ອງທ່ຽວແດງ - ຕາມຮອຍລຸງໂຮ່ ແມ່ນໂອກາດເພື່ອໃຫ້ພວກເຮົາຮ່ຳຮຽນ ແລະ ປະຕິບັດຕາມແບບຢ່າງຂອງພວກປູຍາຕາຍາຍເມື່ອກ່ອນ, ພ້ອມທັງປະກອບສ່ວນສຶກສາອົບຮົມ ປະຊາຊົນ 2 ປະເທດ, ພິເສດແມ່ນຊາວໜຸ່ມ, ສືບຕໍ່ເຄົາລົບນັບຖື, ສືບທອດ ແລະ ເສີມຂະຫຍາຍນ້ຳໃຈມິດຕະພາບ ຫວຽດນາມ - ຈີນ ແມ່ນຊັບສົມບັດອັນລ້ຳຄ່າຂອງປະຊາຊົນ 2 ປະເທດ.”