ວິທະຍຸກະຈາຍສຽງ ຫວຽດນາມ ຈັດລາຍການພິເສດ
(ພາບປະກອບ)
(vovworld) – ເນື່ອງໃນໂອກາດ ຫວຽດນາມ ສະເຫຼີມສະຫຼອງ 60 ປີແຫ່ງວັນໄຊຊະນະ ດ້ຽນບຽນຝູ, ການນຳຫຼາຍປະເທດໃນໂລກໄດ້ສົ່ງໂທລະເລກ ອວຍພອນການນຳພັກ, ລັດ ແລະ ປະຊາຊົນ ຫວຽດນາມ. ໃນໂທລະເລກສົ່ງເຖິງທ່ານປະທານປະເທດ ຫວຽດນາມ ເຈືອງເຕີນຊາງ, ທ່ານປະທານາທິບໍດີ ສະຫະພັນ ລັດເຊຍ V. Putin ເນັ້ນໜັກວ່າ: ຂ້າພະເຈົ້າຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງທ່ານປະທານປະເທດ ເຈືອງເຕີນຊາງ ເນື່ອງໃນໂອກາດສະເຫຼີມສະຫຼອງ 60 ປີແຫ່ງໄຊຊະນະ ດ້ຽນບຽນຝູ - ເຊິ່ງເປັນຂີດໝາຍສິ້ນສຸດສົງຄາມນອງເລືອດ, ປົດປ່ອຍປະເທດ ຫວຽດນາມ ໃຫ້ຫລຸດພົ້ນອອກຈາກແອກປົກຄອງຂອງພວກລ່າເມືອງຂຶ້ນ. ໂທລະເລກຂອງຄະນະບໍລິຫານງານສູນກາງພັກ ປະຊາຊົນປະຕິວັດ ລາວ, ສະພາແຫ່ງຊາດ, ລັດຖະບານ ແລະ ແນວລາວສ້າງຊາດ ທີ່ຝາກເຖິງຄະນະບໍລິຫານງານສູນກາງພັກ ກອມມູນິດ ຫວຽດນາມ, ສະພາແຫ່ງຊາດ, ລັດຖະບານ ແລະ ແນວໂຮມປະເທດຊາດ ຫວຽດນາມ ກໍ່ຊີ້ແຈ້ງວ່າ: “ໄຊຊະນະ ດ້ຽນບຽນຝູ ມີຄວາມໝາຍສຳຄັນໃນປະຫວັດສາດອັນຍິ່ງໃຫຍ່ຂອງກອງທັບປະຊາຊົນ ຫວຽດນາມ ວິລະຊົນ ພາຍໃຕ້ການຊີ້ນຳ, ນຳພາທີ່ປີຊາສາມາດຂອງພັກກອມມູນິດ ຫວຽດນາມ ແລະ ປະທານ ໂຮ່ຈີມິນ ຜູ້ຍິ່ງໃຫຍ່... ໄຊຊະນະ ດ້ຽນບຽນຝູ ໄດ້ລະດົມກຳລັງໃຈປະຊາຊົນຜູ້ຮັກຫອມສັນຕິພາບ ແລະ ບັນດາປະເທດຖືກກົກຂີ່ຂຸດຮີດທີ່ພວມຕໍ່ສູ້ເພື່ອເອກະລາດ, ເສລີພາບ, ປະຊາທິປະໄຕ ແລະ ສັງຄົມນິຍົມໃນທົ່ວໂລກຢ່າງແຮງ. ພວກຂ້າພະເຈົ້າຢືນຢັນຕັດສິນໃຈພ້ອມກັບ ຫວຽດນາມ ເພີ່ມພຸນຄຸນສ້າງສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ.”
ວັນທີ 7/5, ວິທະຍຸກະຈາຍສຽງ ຫວຽດນາມ ໄດ້ຈັດລາຍການກະຈາຍສຽງພິເສດ, ສະເຫຼີມສະຫຼອງ 60 ປີແຫ່ງໄຊຊະນະປະຫວັດສາດ ດ້ຽນບຽນຝູ ດ້ວຍຫົວຂໍ້ວ່າ: “ຂີດໝາຍປະຫວັດສາດທີ່ດັງກ້ອງກັນວານໄປທົ່ວ 5 ທະວີບ” ທີ່ແກ່ຍາວເປັນເວລາ 9 ຊົ່ວໂມງ, ແຕ່ 5 ໂມງຮອດ 14 ໂມງ. ລາຍການໄດ້ວາດພາບໄລຍະອັນສະຫງ່າລາສີ, ບັນດາຂີດໝາຍສຳຄັນທີ່ສຸດໃນບັ້ນຮົບ ດ້ຽນບຽນຝູ, ປະກອບສ່ວນຊ່ວຍໃຫ້ທ່ານຜູ້ຟັງທັງພາຍໃນ ແລະ ຕ່າງປະເທດເຂົ້າໃຈແຈ້ງກ່ວາກ່ຽວກັບ ໄຊຊະນະ ດ້ຽນບຽນຝູ