(vovworld) – ວັນທີ 24/5, ພະສົງສາມະເນນ ແລະ ພຸດທະສາສະນິກກະຊົນ ໃນທົ່ວປະເທດສະເຫຼີມສະຫຼອງວັນວິສາຂະບູຊາ - ພສ 2557. ໃນຊຸມວັນນີ້, ຢູ່ບັນດາແຂວງ, ນະຄອນ ໄດ້ດຳເນີນການເຄື່ອນໄຫວສວດມົນພາວະນາຂໍໃຫ້ປະຊາຊົນມີຄວາມສະຫງົບສຸກ, ໂລກມີສັນຕິພາບ.
ຢູ່ນະຄອນ ດ່າໜັງ, ວັດວາອາຮາມກ່ວາ 100 ແຫ່ງລ້ວນແຕ່ໄດ້ຮັບການປະດັບປະດາດ້ວຍດອກໄມ້, ດອກໄຟນາໆສີເພື່ອສະເຫຼີມສະຫຼອງ ວັນວິສາຂະບູຊາ - ພສ 2557. ພະສົງສາມະເນນ, ພຸດທະສາສະນິກກະຊົນ ໄດ້ຈັດຕັ້ງການເຄື່ອນໄຫວກຸສົນຄື: ມອບຂອງຂວັນນັບພັນພຸດໃຫ້ຜູ້ປະສົບເຄາະຮ້າຍຈາກທາດພິດສີສົ້ມ/ ດີໂອຊິນ, ເດັກນ້ອຍທຸກຍາກ, ສ້າງເຮືອນແຫ່ງສາຍຈິດມິດໃຈ 20 ຫຼັງໃຫ້ແກ່ຄົນທຸກຍາກຢູ່ແຂວງ ກ໋ວາງນາມ, ແລະ ນະຄອນ ດ່າໜັງ. ພະອາຈານ ທິກທົງດ້າວ, ຫົວໜ້າເລຂາສະມາຄົມພຸດທະສາສະໜານະຄອນ ດ່າໜັງ, ໃຫ້ຮູ້ວ່າ:
“ປີນີ້, ສະມາຄົມພຸດທະສາສະໜານະຄອນ ດ່າໜັງ ໄດ້ປະຕິບັດພິທີດ້ວຍຄວາມປະຢັດເພື່ອໃຊ້ເງິນເຮັດວຽກງານກຸສົນສັງຄົມໃຫ້ພໍ່ແມ່ປະຊາຊົນຢ່າງແທດຈິງຄື: ສ້າງເຮືອນແຫ່ງສາຍຈິດມິດໃຈ, ມອບຂອງຂວັນໃຫ້ຄົນທຸກຍາກ...”
ຢູ່ນະຄອນ ຍາຈາງ, ແຂວງ ແຄ໋ງຮ່ວາ, ໄດ້ດຳເນີນງານວາງສະແດງຮູບພາບ ແລະ ຈັດງານພົບປະແລກປ່ຽນດ້ວຍຫົວເລື່ອງ “ຕົວພະຍານຫຼັກຖານ ແລະ ຍຸກສະໄໝ”. ທີ່ວັດແຫ່ງຕ່າງໆຂອງເມືອງເກາະ ເຈື່ອງຊາ, ພະສົງສາມະເນນ, ພຸດທະສາສະນິກກະຊົນ ເປັນຈຳນວນຫຼວງຫຼາຍ ໄດ້ເຕົ້າໂຮມຢູ່ວັດແຫ່ງຕ່າງໆ ເພື່ອປະດັບປະດາວັດ ແລະ ເຂົ້າຮ່ວມບັນດາການເຄື່ອນໄຫວສະເຫຼີມສະຫຼອງ ວັນວິສາຂະບູຊາ. ພະອາຈານ ທິກແຄ່ງຮ່ວາ, ເຈົ້າອະທິການວັດເຈື່ອງຊາ ໃຫຍ່ , ເມືອງເກາະ ເຈື່ອງຊາ, ແຂວງ ແຄ໋ງຮ່ວາ, ໃຫ້ຮູ້ວ່າ:
“ຢູ່ ເຈື່ອງຊາ ຍັງມີຄວາມຫຍຸງຍາກຫຼາຍຢ່າງແຕ່ໄດ້ຈັດພິທີຢ່າງກົມກຽວ. ວັນທີ 8/4 ຜ່ານມາ ໄດ້ດຳເນີນພິທີຫົດສົງ, ປະຊາຊົນ, ທະຫານໃນເກາະໄດ້ຖະຫວາບທູບທຽນ, ເຂົ້າຮ່ວມພິທີຫົດສົງ. ”
ແລະກໍ່ໃນຕອນຄຳ່ວັນທີ 22/5, ຢູ່ສວນສາທາລະນະ ເທືອງບາກ, ນະຄອນ ເຫ້ວ, ຄະນະບໍລິຫານງານສະມາຄົມພຸດທະສາສະໜາແຂວງ ເທື່ອທຽນເຫ້ວ ໄດ້ຈັດຕັ້ງພິທີແຫ່ຂະບວນດ້ວຍລົດທີ່ໄດ້ຮັບການປະດັບປະດາເນື່ອງ ໃນໂອກາດງານບຸນວິສາຂະບູຊາ - ພສ 2557. ລົດປະດັບປະດາ 74 ຄັນນັ້ນໄດ້ໄປຜ່ານຖະໜົນສາຍຕົ້ນຕໍ່ຢູ່ນະຄອນ ເຫ້ວ ນຳເອົາສານຂອງບັນດາສາສະນິກກະຊົນ, ພຸດທະສາສະນິກກະຊົນກ່ຽວກັບວັນວິສາຂະບູຊາ. ປະຊາຊົນ ແລະ ແຂກທ່ອງທ່ຽວເປັນຈຳນວນຫຼວງຫຼາຍໄດ້ລົງຖະໜົນເພື່ອຊົມຂະບວນລົດ ປະດັບປະດານີ້.
ພ້ອມກັບການແຫ່ຂະບວນດ້ວຍລົດປະດັບປະດານັ້ນ, ໃນສັບປະດາສະເຫຼີມສະຫຼອງວັນ ວິສາຄະບູຊາ, ຢູ່ນະຄອນ ເຫ້ວ ຍັງດຳເນີນພິທີລອຍກະໂທງໃນແມ່ນ້ຳ ເຮືອງ, ຫົດສົງ ແລະ ຂະບວນແຫ່ພະພຸດ.
ກ່ອນໜ້ານັ້ນ, ວັນທີ 21/5, ການນຳແຂວງ ເທື່ອທຽນເຫ້ວ ໄດ້ໄປຢ້ຽມຢາມ, ອວຍພອນຄະນະບໍລິຫານງານສະມາຄົມພຸດທະສາສະໜາ ແຂວງ ເທື່ອທຽນເຫ້ວເນື່ອງໃນໂອກາດພິທີງານບຸນວິສາຂະບູຊາ 2013, ພ້ອມທັງຕີລາຄາສູງການປະກອບສ່ວນຂອງບັນດາຜູ້ມີຍົດຖາບັນດາສັກ, ພຸດທະສາສະນິກກະຊົນ ເຂົ້າໃນຜົນງານໃນການພັດທະນາເສດຖະກິດ, ສັງຄົມຂອງແຂວງ, ສະແດງມູນເຊື້ອຂອງພຸດທະສາສະໜາຕາມຈິດໃຈ “ທຳມະ - ຊົນຊາດ - ສັງຄົມນິຍົມ.”