ຜູ້ແທນຢ້ຽມຢາມຫໍວາງສະແດງໂຮ່ຈິມິນຢູ່ນະຄອນຊຸງຈົວແຂວງກວາງສີ
(ພາບ: thanhnienviet.vn)
(vovworld)- ວັນທີ 25/11, ຢູ່ນະຄອນຈີນເຈົາ, ຜູ້ແທນຊາວໜຸ່ມຫວຽດນາມ 450 ຄົນ ໄດ້ເຂົ້າຮ່ວມບັນດາການເຄື່ອນໄຫວພົບປະແລກປ່ຽນໃນຂອບເຂດງານມະໂຫລານຊາວໜຸ່ມຫວຽດນາມ-ຈີນ ຄັ້ງທີ 2 ຊື່ງລວມມີ: ການພົບປະແລກປ່ຽນກັບຄູອາຈານ, ນັກຮຽນໂຮງຮຽນມັດທະຍົມເລກ 2 ນະຄອນຈີນເຈົາ; ຢ້ຽມຊົມຮ້ານວາງສະແດງຜະລິດຕະພັນເຄື່ອງເຄືອບ, ເຄື່ອງປັ້ນດິນເຜົາ ນີຊິງ; ຢ້ຽມຢາມເຂດບໍລິຫານສັງລວມ, ສູນການຄ້າສາກົນ ແລະ ທ່າກຳປັ່ນສາກົນຈີນເຈົາ, ເຂດເສດຖະກິດຈຸງໝ໋າ.
ກ່ອນໜ້ານັ້ນ, ວັນທີ 24/11, ທີ່ການພົບປະເຈລະຈາກັບການນຳຄະນະຜູ້ແທນຊາວໜຸ່ມຫວຽດນາມ, ທ່ານນາງແຊວອີງສື ເລຂາຄະນະພັກນະຄອນຈີນເຈົາ ເນັ້ນໜັກວ່າ: ງານມະໂຫລານຊາວໜຸ່ມຫວຽດນາມ-ຈີນ ແມ່ນການເຄື່ອນໄຫວທີ່ມີຄວາມໝາຍ ໂດຍບັນດາການນຳສອງຝ່າຍສະເໜີເອງ. ງານມະໂຫລານໄດ້ຊຸກຍູ້ການເຄື່ອນໄຫວພົບປະແລກປ່ຽນມິດຕະພາບຂອງຊາວໜຸ່ມສອງປະເທດເວົ້າລວມ ແລະ ຊາວໜຸ່ມຫວຽດນາມ ກັບຊາວໜຸ່ມນະຄອນຈີນເຈົາ ເວົ້າສະເພາະ.
ໃນວັນດຽວກັນ, ຢູ່ນະຄອນຊຸງຈົວ, ຜູ້ແທນຊາວໜຸ່ມຫວຽດນາມ 300 ຄົນ ໄດ້ໄປຢ້ຽມຢາມຫໍວາງສະແດງໂຮ່ຈິມິນ; ຢ້ຽມຢາມຕະຫຼາດດ່ານຊາຍແດນຢູ່ເຂດການຄ້າເສລີຊາຍແດນຈີນ-ອາຊຽນ. ຜູ້ແທນຊາວໜຸ່ມຫວຽດນາມ ກໍ່ເຂົ້າຮ່ວມພິທີເປີດໂຄງການຊາວໜຸ່ມຫວຽດນາມ-ຈີນ ຮ່ວມແຮງຮ່ວມໃຈກໍ່ສ້າງເສັ້ນທາງຫຼວງປອດໄພອາຊຽນ ຊື່ງແມ່ນເສັ້ນທາງສຳຄັນຊ່ວຍຊຸກຍູ້ການເຄື່ອນໄຫວເສດຖະກິດ, ການຄ້າລະຫວ່າງບັນດາປະເທດອາຊຽນ ກັບຈີນ.
ທີ່ນະຄອນຫຼຽວເຈົາ, ວັນທີ 24/11, ຜູ້ແທນຊາວໜຸ່ມຫວຽດນາມ 700 ຄົນ ໄດ້ພົບປະກັບການນຳນະຄອນຫຼຽວເຈົາ ແລະ ໄປຢ້ຽມຢາມຫໍຊາວໜຸ່ມຈີນ. ໃນຕອນບ່າຍຂອງວັນດຽວກັນ, ບັນດາຜູ້ແທນໄດ້ພົບປະແລກປ່ຽນກັບຊາວໜຸ່ມ, ນັກສຶກສານະຄອນຫຼຽວເຈົາ ຢູ່ມະຫາວິທະຍາໄລວິທະຍາສາດເຕັກນິກກວາງສີ. ນະທີ່ນີ້, ຜູ້ແທນຊາວໜຸ່ມສອງປະເທດໄດ້ພອ້ມກັນລົງລາຍເຊັນໃນກຳແພງມິດຕະພາບ.
ພາຍຫຼັງເຂົ້າຮ່ວມບັນດາການເຄື່ອນໄຫວພົບປະແລກປ່ຽນຢູ່ 7 ນະຄອນຂອງແຂວງກວາງສີ, ຄະນະຜູ້ແທນຊາວໜຸ່ມຫວຽດນາມ 7 ຄະນະໄດ້ເຕົ້າໂຮມກັນຢູ່ນະຄອນໜານໜິງ ໃນວັນທີ 26/11 ເພື່ອເຂົ້າຮ່ວມງານມະໂຫລານຊາວໜຸ່ມຫວຽດນາມ-ຈີນ ຄັ້ງທີ 2 ຊື່ງຈະຈັດຂຶ້ນຢູ່ທີ່ນີ້.