ວັນທີ 23 ມັງກອນ, ກະຊວງການຕ່າງປະເທດ ລັດເຊຍ ໄດ້ຮຽກຕົວທ່ານ Margus Laidre, ເອກອັກຄະລັດຖະທູດ Estonia ປະຈຳ ລັດເຊຍ ມາເພື່ອຮຽກຮ້ອງໃຫ້ທ່ານນີ້ອອກຈາກປະເທດ ລັດເຊຍ ກ່ອນວັນທີ 7 ກຸມພາ. ແຈ້ງການຂອງກະຊວງການຕ່າງປະເທດ ລັດເຊຍ ໄດ້ຊີ້ແຈ້ງວ່າ: ມົດສະກູ ຕັດສິນໃຈຫລຸດການພົວພັນທາງທູດກັບ Estonia ລົງເປັນອຸປະທູດຊົ່ວຄາວ. ການກະທຳນີ້ຂອງມົດສະກູ ເພື່ອແນໃສ່ຄັດຄ້ານເລື່ອງຕົ້ນເດືອນນີ້, ກະຊວງການຕ່າງປະເທດ Estonia ຮຽກຮ້ອງໃຫ້ ມົດສະກູຫລຸດຈຳນວນພະນັກງານການທູດຢູ່ສະຖານທູດ ລັດເຊຍ ປະຈຳ Tallinn ເລີ່ມແຕ່ວັນທີ 1 ກຸມພາ.

        ໂດຍໂຕ້ຕອບຄືນແຈ້ງການຈາກລັດເຊຍ, ກໍ່ໃນວັນທີ 23 ມັງກອນ, Estonia ໄດ້ປະກາດວ່າ: ປະເທດນີ້ຈະເນລະເທດເອກອັກຄະລັດຖະທູດ ລັດເຊຍ ປະຈຳ Tallinn ແລະ ຮຽກຮ້ອງໃຫ້ ເອກອັກຄະລັດຖະທູດ ລັດເຊຍ ຕ້ອງອອກຈາກ Tallinn ກ່ອນວັນທີ 7 ກຸມພາ.

        ຫຼັງຈາກ Estonia ນັ້ນ, ໃນວັນດຽວກັນ, ກະຊວງການຕ່າງປະເທດ Latvia ກໍ່ປະກາດຫລຸດລະດັບການພົວພັນທາງການທູດລົງເປັນອຸປະທູດຊົ່ວຄາວແຕ່ວັນທີ 24 ກຸມພາ ແລະ ຮຽກຮ້ອງໃຫ້ເອກອັກຄະລັດຖະທູດລັດເຊຍ ອອກຈາກ Latvia ກ່ອນວັນທີ 24 ກຸມພາ. ເອກອັກຄະລັດຖະທູດ Latvia ປະຈຳ ລັດເຊຍ ກໍ່ຈະອອກຈາກລັດເຊຍ ກ່ອນວັນທີ 24 ກຸມພາ. ຕາມທ່ານລັດຖະມົນຕີການຕ່າງປະເທດ Latvia Edgars Rinkevics ແລ້ວ, ການກະທຳນີ້ຂອງ Latvia ເພື່ອແນໃສ່ສະແດງຄວາມສາມັກຄີກັບ Estonia ກໍ່ຄືຄັດຄ້ານບັ້ນຮົບການທະຫານພິເສດຂອງ ລັດເຊຍ ຢູ່ ຢູແກຼນ.