ວັນທີ 22 ກຸມພາ, ສຳນັກຂ່າວສານ IRNA ຂອງ ອີຣານ ໃຫ້ຮູ້ວ່າ ປະເທດ ນີ້ໄດ້ຮຽກຕົວທ່ານ Simon Shercliff ເອກອັກຄະລັດຖະທູດ ອັງກິດ ຢູ່ ເຕເຮຣານ ມາສຳນັກງານກະຊວງການຕ່າງປະເທດ ເພື່ອຄັດຄ້ານຄຳກ່າວຫາຂອງ ລອນດອນ ໂດຍຖືວ່າ ເຕເຮຣານ “ນາບຂູ່” ບັນດານັກຂ່າວພວມຕັ້ງຖິ່ນຖານຢູ່ ລາຊະອານາຈັກ ອັງກິດ. ການກະທຳດັ່ງກ່າວ ຖືກດຳເນີນພາຍຫຼັງທີ່ ກະຊວງການຕ່າງປະເທດ ອັງກິດ ຮຽກຕົວທ່ານ Mehdi Hosseini Matin ອຸປະທູດຊົ່ວຄາວ ອີຣານ ປະຈຳ ລອນດອນ ມາສຳນັກງານເພື່ອຄັດຄ້ານສິ່ງທີ່ປະເທດນີ້ເອີ້ນວ່າເປັນ “ການນາບຂູ່” ນັກຂ່າວຢູ່ ລອນດອນ. ກະຊວງການຕ່າງປະເທດ ອີຣານ ຖະແຫຼງວ່າ ຄຳກ່າວຫາຂອງ ອັງກິດ ໄດ້ສະແດງໃຫ້ເຫັນ “ນະໂຍບາຍດ້ານ ອີຣານ” ຂອງປະເທດນີ້, ພ້ອມທັງຮຽກຮ້ອງໃຫ້ ລອນດອນ ຢຸດຕິ “ວິທີເປັນປໍລະປັກ”.

        ການພົວພັນຂອງ ອີຣານ ກັບ ອັງກິດ ນັບມື້ນັບ ຊົ່ວຮ້າຍລົງ ພາຍຫຼັງທີ່ ລອນດອນ ມີປະຕິກິລິຍາກ່ຽວກັບການແຫ່ຂະບວນປະທ້ວງທີ່ເກີດຂຶ້ນຢູ່ ອີຣານ ເມື່ອເດືອນ ກັນຍາ 2022 ແລະ ເລື່ອງ ອີຣານ ປະຫານຊີວິດທ່ານ Alireza Akbari  ອະດີດຮອງລັດຖະມົນຕີກະຊວງປ້ອງກັນປະເທດ, ຜູ້ທີ່ຖືສອງສັນຊາດ ອີຣານ - ອັງກິດ, ດ້ວຍຖານໂທດເປັນນັກສືບໃຫ້ແກ່ອົງການສືບລາຊະການລັບ ອັງກິດ.