ກອງປະຊຸມໄດ້ຮັບຮູ້ບັນດາຄວາມມານະພະຍາຍາມຂອງບັນດາສະມາຊິກ ADMM+ ໃນການຊຸກຍູ້ການຮ່ວມມືຕົວຈິງກ່ຽວກັບບັນຫາຄວາມໝັ້ນຄົງທາງທະເລ. ທີ່ກອງປະຊຸມ, ມີຫຼາຍປະເທດໄດ້ເນັ້ນໜັກເຖິງການເຄົາລົບກົດໝາຍສາກົນ ໃນບັນດາການຂັດແຍ້ງກັນທາງທະເລ, ພ້ອມທັງສະແດງໃຫ້ເຫັນເລື່ອງສະໜັບສະໜູນການແກ້ໄຂບັນດາການຂັດແຍ້ງກັນໂດຍສັນຕິວິທີ ແລະ ເຄົາລົບກົດໝາຍສາກົນ. ກ່ຽວກັບບັນຫາທະເລຕາເວັນອອກ, ກອງປະຊຸມໄດ້ຢືນຢັນເຖິງຄວາມສຳຄັນຂອງການປະຕີບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງມີປະສິດທິຜົນແລະ ບັນລຸໄດ້ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ, ເພື່ອແນໃສ່ສ້າງຄວາມໄວ້ເນື້ອເຊື່ອໃຈ, ຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບຢູ່ພາກພື້ນ. ກ່າວຄຳເຫັນທີ່ກອງປະຊຸມ ADMM+ ຄັ້ງທີ 4, ທ່ານພົນເອກ ໂງຊວນລິກ, ລັດຖະມົນຕີກະຊວງປ້ອງກັນປະເທດ, ຫົວໜ້າຄະນະຜູ້ແທນຫວຽດນາມ ໄດ້ຍົກອອກບັນດາສິ່ງທ້າທາຍສຳລັບບັນດາປະເທດ, ໃນນັ້ນໄດ້ເຕື້ອງເຖິງບັນຫາຊາວປະມົງ. ຕາມທ່ານລັດຖະມົນຕີແລ້ວ, ນີ້ກໍ່ແມ່ນໜຶ່ງໃນບັນດາບັນຫາ ຖ້າຫາກບໍ່ໄດ້ຮັບການແກ້ໄຂເທົ່າທີ່ຄວນນັ້ນ ອາດຈະສົ່ງຜົນສະທ້ອນເຖິງການພົວພັນ 2 ຝ່າຍ. ໃນສະພາບການນັ້ນ, ທ່ານລັດຖະມົນຕີ ໂງຊວນລິກ ຖືວ່າ, ເພື່ອສ້າງສະພາບແວດລ້ອມແຫ່ງສັນຕິພາບຢ່າງແທ້ຈິງນັ້ນ, ບັນດາປະເທດຕ້ອງຮ່ວມແຮງຮ່ວມໃຈກັນແກ້ໄຂບັນດາສິ່ງທ້າທາຍພ້ອມກັບຄວາມຮັບຮູ້ລວມ, ດ້ວຍ “ຄວາມໄວ້ເນື້ອເຊື່ອໃຈຍຸດທະສາດ”, ຕາມກອບກົດໝາຍລວມ.

        ສິ້ນສຸດກອງປະຊຸມ, ທ່ານລັດຖະມົນຕີກະຊວງປ້ອງກັນປະເທດຟີລິບປີນ Delfin Lorenzana ໄດ້ແຈ້ງໃຫ້ຊາບວ່າ, ນັບແຕ່ປີ 2018 ກອງປະຊຸມ ADMM+ ຈະໄດ້ຮັບການຈັດຕັ້ງປະຈຳປີ. ທ່ານ Delfin Lorenzana ກໍ່ມອບໂອນຕຳແໜ່ງປະທານ ADMM, ADMM+ ໃຫ້ທ່ານ Ng Eng Heng, ລັດຖະມົນຕີກະຊວງປ້ອງກັນປະເທດສິງກະໂປ, ເຊິ່ງແມ່ນປະເທດຈະຮັບດຳລົງຕຳແໜ່ງເປັນປະທານອາຊຽນ ໃນປີ 2018.