(vovworld) - ໂດຍສືບຕໍ່ວາລະປະຊຸມຄັ້ງທີ 13 ຄະນະປະຈຳສະພາແຫ່ງຊາດ, ຕອນເຊົ້າວັນທີ 13/12, ຄະນະປະຈຳສະພາແຫ່ງຊາດສືບຕໍ່ໃຫ້ຄຳເຫັນກ່ຽວກັບການຈັດແບ່ງ 2 ໂຄງການຈຸດໝາຍແຫ່ງຊາດນັ້ນແມ່ນ: ການປ່ຽນແປງຂອງດິນຟ້າອາກາດ ແລະ ແກ້ໄຂມົນລະຜິດສິ່ງແວດລ້ອມ. ຜ່ານການປຶກສາຫາລື, ບັນດາສະມາຊິກຄະນະປະຈຳສະພາແຫ່ງຊາດ ໄດ້ຖືວ່າ ເລື່ອງຈັດແບ່ງງົບປະມານໃຫ້ 2 ໂຄງການບໍ່ທັນມີຈຸດສຸມ, ເພາະສະນັ້ນ, ຕ້ອງເລືອກບັນດາໂຄງການໃຫ້ບຸລິມະສິດເພື່ອລົງທຶນ. ທ່ານຮອງປະທານສະພາແຫ່ງຊາດ ອວງຈູຫີຼວ (Uong Chu Luu) ຍົກຄຳເຫັນວ່າ.
“ພວກເຮົາຕ້ອງລົງທຶນກໍ່ສ້າງບັນດາຮູບແບບທົດລອງ ເພື່ອຄວບຄຸມ, ແກ້ໄຂສິ່ງເສດເຫຼືອ, ຫັນປ່ຽນວິຊາຊີບ, ນຳວິທະຍາສາດເຕັກໂນໂລຊີເຂົ້າໃນການແກ້ໄຂມົນລະຜິດ, ພ້ອມກັນນັ້ນແມ່ນໂຄສະນາໃຫ້ປະຊາຊົນ, ວິສາຫະກິດ ເພື່ອແນໃສ່ສ້າງການຫັນປ່ຽນກ່ຽວກັບສະຕິ. ຈາກບັນດາຮູບແບບທົດລອງນີ້ ຈະຜັນຂະຫຍາຍ ທະວີຄຸນໃນທົ່ວປະເທດ, ຫີຼິກລ້ຽງສະພາບການຜັນຂະຫຍາຍໂດຍບໍ່ມີຈຸດສຸມ ເຊິ່ງບໍ່ມີມາດຖານຢ່າງລະອຽດ”.
ຕາມໃບສະເໜີຂອງລັດຖະບານ, ງົບປະມານທັງໝົດທີ່ຈັດແບ່ງໃຫ້ໂຄງການຈຸດໝາຍແຫ່ງຊາດ ເພື່ອຮັບມືກັບການປ່ຽນແປງຂອງດິນຟ້າອາກາດ ແລະ ແກ້ໄຂມົນລະຜິດສິ່ງແວດລ້ອມໃນປີ 2013 ແມ່ນເກືອບ 390 ຕື້ດົງ.
ແລະກໍໃນຕອນເຊົ້າຂອງວັນດຽວກັນ, ຄະນະປະຈຳສະພາແຫ່ງຊາດໄດ້ສຸມໃສ່ປຶກສາຫາລືບັນດາບັນຫາໃຫຍ່ທີ່ຍັງມີຄວາມເຫັນທີ່ແຕກຕ່າງກັນຂອງຮ່າງກົດໝາຍວ່າດ້ວຍການໄກເກ່ຍປອງດອງຢູ່ຂັ້ນຮາກຖານ .