ລາຍການສະແດງສິລະປະ ຢູ່ ງານມະໂຫລານ (ພາບ: VOV)

ໂດຍສະເຫຼີມສະຫຼອງ ວັນຊາດ ຫວຽດນາມ ທີ 2 ກັນຍາ (2/9/1945 – 2/9/2022) ແລະ ສະເຫຼີມສະຫຼອງ 77 ປີແຫ່ງວັນສ້າງຕັ້ງສະຖານີວິທະຍຸກະຈາຍສຽງ ຫວຽດນາມ (7/9/1945 – 7/9/2022), ຕອນຄ່ຳວັນທີ 5 ກັນຍາ, ຢູ່ສູນກະຈາຍສຽງແຫ່ງຊາດ ເຮືອນເລກທີ 58, ຖະໜົນກວານຊື, ຮ່າໂນ້ຍ, ວິທະຍຸກະຈາຍສຽງ ຫວຽດນາມ ໄດ້ຈັດ ງານມະໂຫລານສະແດງເຂດພາກເໜືອ. ດ້ວຍຫົວຂໍ້ຍ້ອງຍໍຊົມເຊີຍນ້ຳໃຈຄວາມຮັກແພງບ້ານເກີດເມືອງນອນ, ປະເທດຊາດ, ຍ້ອງຍໍຊົມເຊີຍພັກ, ປະທານ ໂຮ່ຈີມິນທີ່ເຄົາລົບຮັກ, ມູນເຊື້ອຂອງສະຖານີວິທະຍຸກະຈາຍສຽງ ຫວຽດນາມ… ກ່າວຄຳເຫັນໄຂງານມະໂຫລານ, ທ່ານ ຫວູຫ໋າຍກວາງ, ຮອງຜູ້ອຳນວຍການໃຫຍ່ວິທະຍຸກະຈາຍສຽງ ຫວຽດນາມ, ປະທານກຳມະບານສະຖານີວິທະຍຸກະຈາຍສຽງ ຫວຽດນາມ ໃຫ້ຮູ້ວ່າ:

ບັນດາການແຂ່ງຂັນກິລາ ແລະ ງານມະໂຫລານສະແດງສິລະປະ ໄດ້ປະສົບຜົນສຳເລັດຢ່າງຈົບງາມ. ຕາມການຕີລາຄາຂອງພວກຂ້າພະເຈົ້າ ປີນີ້ແມ່ນປີພິເສດທີ່ສຸດ, ອ້າຍນ້ອງພະນັກງານຢູ່ທຸກເຂດພາກ ໄດ້ເຂົ້າຮ່ວມການແຂ່ງຂັນກິລາ ແລະ ງານມະໂຫລານສະແດງສິລະປະ ຢ່າງເບີກບານມ່ວນຊື່ນ ແລະ ປິຕິຊົມຊື່ນ. ອາດເວົ້າໄດ້ວ່າ ບໍ່ມີຍາມໃດມີບັນຍາກາດຟົດຟື້ນ, ຫ້າວຫັນຄືໃນປີນີ້.

ງານມະໂຫລານແມ່ນໂອກາດເພື່ອໃຫ້ພະນັກງານ, ພາລະກອນ, ລັດຖະກອນຫວນຄືນມູນເຊື້ອປະຫວັດສາດວິລະຊົນຂອງສະຖານີວິທະຍຸກະຈາຍສຽງ ຫວຽດນາມ ຮ່ວມເດີນທາງພ້ອມກັບປະເທດຊາດນັບແຕ່ວັນຊາດ, ຜ່ານການຕໍ່ສູ້ກູ້ຊາດ 2 ຄັ້ງ, ວິວັດການປ່ຽນແປງໃໝ່ ແລະ ການສ້າງສາ, ປົກປັກຮັກສາປະເທດຊາດມາຮອດປັດຈຸບັນ.