ທີ່ກອງປະຊຸມຖະແຫຼງຂ່າວ (ພາບ: VGP)

        ວັນທີ 12 ເມສາ, ແມ່ນວັນຄົບຮອບ 50 ປີທີ່ ຫວຽດນາມ ແລະ ຝລັ່ງ ສ້າງຕັ້ງການພົວພັນທາງການທູດ (12 ເມສາ 1973 – 12 ເມສາ 2023). ໃນໄລຍະ 50 ປີຜ່ານມາ, ໂດຍຜ່ານຜ່າທຸກການຜັນແປປະຫວັດສາດ, ສາຍພົວພັນມິດຕະພາບ, ການຮ່ວມມືອັນດີງາມລະຫວ່າງ ຫວຽດນາມ - ຝລັ່ງ ນັບມື້ນັບສະໜິດແໜ້ນ, ກ້າວເຂົ້າສູ່ລວງເລິກ, ຮ່ວມມືກັນຢ່າງຮອບດ້ານ, ອຸດົມສົມບູນ, ບັນລຸປະສິດທິຜົນໃນທຸກຂົງເຂດ.

        ທີ່ກອງປະຊຸມຖະແຫຼງຂ່າວໃນຕອນບ່າຍວັນທີ 11 ເມສາ, ຢູ່ ຮ່າໂນ້ຍ, ຄະນະຈັດຕັ້ງໃຫ້ຮູ້ວ່າ ກອງປະຊຸມຮ່ວມມືລະຫວ່າງບັນດາທ້ອງຖິ່ນ ຫວຽດນາມ - ຝລັ່ງ ຄັ້ງທີ 12 ຈະດຳເນີນແຕ່ວັນທີ 13-15 ເມສາ, ຢູ່ ຮ່າໂນ້ຍ, ໂດຍສູມໃສ່ປຶກສາຫາລື 4 ຫົວເລື່ອງສະເພາະກ່ຽວກັບເຂດຕົວເມືອງແບບຍືນຍົງ, ສິ່ງແວດລ້ອມ, ນ້ຳ ແລະ ບຳບັດນ້ຳ; ວັດທະນະທຳ, ມໍລະດົກ ແລະ ທ່ອງທ່ຽວ; ນະຄອນອັດສະລິຍະ; ການຫັນເປັນດີຈີຕອນ.

        ມີການເຄື່ອນໄຫວຫຼາຍຢ່າງຢູ່ນອກກອງປະຊຸມກໍ່ໄດ້ຈັດຂຶ້ນເພື່ອແນໃສ່ຮັດແໜ້ນສາຍພົວພັນສາມັກຄີ, ການພົວພັນແລກປ່ຽນລະຫວ່າງທ້ອງຖິ່ນຕ່າງໆ, ຄູ່ຮ່ວມມືຂອງ 2 ປະເທດ, ຄື: ໂຄສະນາບັນດາສະຖານທີ່ “ສີສັນ ຫວຽດນາມ”; ງານວາງສະແດງກ່ຽວກັບການພົວພັນ ຫວຽດນາມ - ຝລັ່ງ ແລະ ການຮ່ວມມືຂັ້ນທ້ອງຖິ່ນ ຫວຽດນາມ - ຝລັ່ງ; ລາຍການໄປຢ້ຽມຢາມບັນດາເຂດທັດສະນີຍະພາບຢູ່ພາຍໃນ ແລະ ນອກ ຮ່າໂນ້ຍ… ທ່ານນາງ ໂງມິນຮ່ວາງ, ຫົວໜ້າພະແນກພົວພັນຕ່າງປະເທດ ຮ່າໂນ້ຍ ເນັ້ນໜັກວ່າ:

        “ການຮ່ວມມືລະຫວ່າງບັນດາທ້ອງຖິ່ນຂອງ ຫວຽດນາມ - ຝລັ່ງ ໄດ້ສ້າງຕັ້ງແຕ່ປີ 1989 ດ້ວຍເລື່ອງສ້າງຕັ້ງການພົວພັນຄູ່ຮ່ວມມືລະຫວ່າງນະຄອນ ຮ່າໂນ້ຍ ແລະ ເຂດ Ile de France. ກວ່າ 30 ປີຜ່ານມາ, ຮູບແບບການຮ່ວມມືດັ່ງກ່າວໄດ້ຮັບການປັບປຸງ, ພັດທະນາຢ່າງບໍ່ຢຸດຢັ້ງ ແລະ ກາຍເປັນແບບຢ່າງໃຫ້ແກ່ສາຍພົວພັນມິດຕະພາບເປັນມູນເຊື້ອ, ການຮ່ວມມືລະຫວ່າງທ້ອງຖິ່ນທຸກຂັ້ນຂອງ 2 ປະເທດ. ກອງປະຊຸມຮ່ວມມືລະຫວ່າງບັນດາທ້ອງຖິ່ນ ຫວຽດນາມ - ຝລັ່ງ ຄັ້ງທີ 12 ແມ່ນໂອກາດທີ່ດີເພື່ອໂຄສະນາພາບພົດຂອງປະເທດຊາດ ຫວຽດນາມ ເວົ້າລວມ, ຮ່າໂນ້ຍ ເວົ້າສະເພາະເຖິງເພື່ອນມິດສາກົນ, ໃນນັ້ນມີບັນດາເພື່ອນມິດຂອງ ຝລັ່ງ”.

        ຄາດວ່າ, ກອງປະຊຸມຮ່ວມມືລະຫວ່າງບັນດາທ້ອງຖິ່ນ ຫວຽດນາມ - ຝລັ່ງ ຄັ້ງທີ 12 ໂດຍມີການເຂົ້າຮ່ວມຂອງຜູ້ຕາງໜ້າຈາກຝ່າຍ ຫວຽດນາມ ແລະ ຝລັ່ງ ກວ່າ 800 ທ່ານ.

        ແລະເນື່ອງໃນໂອກາດນີ້, ແຕ່ວັນທີ 14-16 ເມສາ, ຢູ່ຖະໜົນຍາງໜອງ ຮວ່ານກຽມ ໄດ້ຈະຈັດເຂດວາງສະແດງ, ລວມມີ 60 ຮ້ານ ເພື່ອໂຄສະນາບັນດາຜະລິດຕະພັນດີເດັ່ນ ແລະ ວັດທະນະທຳອາຫານການກິນມາຈາກຫຼາຍທ້ອງຖິ່ນ, ພ້ອມກັບຮູບຖ່າຍກ່ຽວກັບຜົນງານຂອງການຮ່ວມມືລະຫວ່າງ ຫວຽດນາມ - ຝລັ່ງ.