ຈີນ ຈະສືບຕໍ່ຮ່ວມມືກັບ ລັດເຊຍ ເພື່ອພັດທະນາການພົວພັນຄູ່ຮ່ວມມືຍຸດທະສາດຮອບດ້ານ, ລວມມີການໜູນຊ່ວຍເຊິ່ງກັນແລະກັນ, ເຊື່ອໂຍງຢ່າງເລິກເຊິ່ງກວ້າງຂວາງ, ປ່ຽນແປງໃໝ່ ແລະ ຕ່າງຝ່າຍຕ່າງມີຜົນປະໂຫຍດເພື່ອແນໃສ່ຊຸກຍູ້ການພັດທະນາລວມ. ນີ້ແມ່ນຄຳຢັ້ງຢືນຂອງທ່ານປະທານປະເທດຈີນ ສີຈິ້ນຜິງ ໃນວັນທີ 10 ກໍລະກົດ, ຢູ່ປັກກິ່ງ, ເມື່ອໃຫ້ການຕ້ອນຮັບທ່ານ Valentina Ivanovna Matvienko ປະທານສະພາສູງ ລັດເຊຍ ທີ່ພວມມີການຢ້ຽມຢາມປັກກິ່ງ. ທ່ານປະທານສີຈິ້ນຜິງ ກໍ່ສະແດງຄວາມຫວັງກ່ຽວກັບການຊຸກຍູ້ການຮ່ວມມືສອງຝ່າຍໃນບັນດາຂົງເຂດທີ່ແຕກຕ່າງກັນນັບແຕ່ຂັ້ນ ນິຕິບັນຍັດ ກໍ່ຄືການເພີ່ມທະວີການແລກປ່ຽນບົດຮຽນປະສົບການກ່ຽວກັບນິຕິກຳ ແລະ ຄຸ້ມຄອງລັດ, ນຳການພົວພັນຮ່ວມມືລະຫວ່າງອົງການນິຕິບັນຍັດສອງປະເທດຂຶ້ນສູ່ລະດັບສູງໃໝ່.

ສ່ວນທ່ານປະທານສະພາສູງ ລັດເຊຍ Valentina Ivanovna Matvienko ໄດ້ຢັ້ງຢືນວ່າ ການພົວພັນຄູ່ຮ່ວມມືສົມທົບກັບຍຸດທະສາດຮອບດ້ານ ລັດເຊຍ - ຈີນ ເໝາະສົມກັບຜົນປະໂຫຍດ ຂອງສອງປະເທດ, ບັນລຸໄດ້ລະດັບສູງທີ່ສຸດໃນປະຫວັດສາດ ແລະ ສືບຕໍ່ມີການພັດທະນາຢ່າງມີສະຖຽນລະພາບ.

ທ່ານປະທານສະພາສູງ ລັດເຊຍ Valentina Ivanovna Matvienko ໄດ້ນຳໜ້າຄະນະປະຕິບັດງານໄປຍັງຈີນ ໃນລະຫວ່າງວັນທີ 9 - 12 ກໍລະກົດ ແລະ ເຂົ້າຮ່ວມກອງປະຊຸມຄັ້ງທີ 8 ຂອງຄະນະກຳມະການຮ່ວມມືລັດຖະສະພາ ຈີນ - ລັດເຊຍ.