ທ່ານຮອງລັດຖະມົນຕີການຕ່າງປະເທດ ຈີນ ລືວເຈີ່ນໝີນ
(ພາບ :Yonhap/TTXVN)
(vovworld) - ຕາມໜັງສືພິມ “China Daily” ພາສາອັງກິດແລ້ວ, ໃນການປະຊຸມໜຶ່ງຂັ້ນຮອງລັດຖະມົນຕີການຕ່າງປະເທດລະຫວ່າງບັນດາປະເທດ ອາຊຽນ ແລະ ຈີນ ຢູ່ພາກຕາເວັນອອກສ່ຽງເໜືອ ຈີນ ໃນວັນທີ 16/08 ແລ້ວ, 2 ຝ່າຍເຫັນດີເປັນເອກະພາບນຳກັນວ່າ: ຮອດກາງປີ 2017 ຈະສຳເລັດການສ້າງໂຄງຮ່າງໃຫ້ແກ່ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC). ໜັງສືພິມກໍ່ຄັດສະເໜີຄຳເວົ້າຂອງທ່ານຮອງລັດຖະມົນຕີການຕ່າງປະເທດ ຈີນ ລືວເຈີ່ນໝີນໃຫ້ຮູ້ວ່າ: ຝ່າຍຕ່າງໆກໍ່ຮັບຮອງເອົາບັນດາທິດທາງພື້ນຖານໃຫ້ແກ່ການຈັດຕັ້ງໂທລະສັບສາຍດ່ວນ ທີ່ນຳໃຊ້ໃນກໍລະນີສຸກເສີນທີ່ເກີດຂຶ້ນໃນທະເລຕາເວັນອອກ. ບັນດາເອກະສານກ່ຽວກັບໂທລະສັບສາຍດ່ວນ ແລະ ການແກ້ໄຂບັນດາການປະທະກັນໃນທະເລຢ່າງກະທັນຫັນ ທີ່ບັນລຸໄດ້ໃນກອງປະຊຸມຄັ້ງທີ 3 ໃນປີ 2016 ກ່ຽວກັບ COC ນີ້ ຈະຍື່ນສະເໜີຕໍ່ກອງປະຊຸມສຸດຍອດ ອາຊຽນ ຢູ່ ລາວ ໃນຕົ້ນເດືອນກັນຍາ ເພື່ອຮັບຮອງເອົາ.