ທ່ານ ຫວູບ໊າຝູ ຫົວໜ້າກົມສົ່ງເສີມການຄ້າ, ກະຊວງອຸດສາຫະກຳ ແລະ ການຄ້າ ຫວຽດນາມກ່າວຄຳເຫັນທີ່ກອງປະຊຸມສະມຳນາ (ພາບ: TTXVN)

ທີ່ກອງປະຊຸມສຳມະນາ, ມີວິສາຫະກິດຂອງ ຫວຽດນາມ ເກືອບ 40 ແຫ່ງ ໄດ້ແນະນຳບັນດາຜະລິດຕະພັນຂອງ ຫວຽດນາມ ໃຫ້ບັນດາວິສາຫະກິດຂອງ ເຢຍລະມັນ  ຄື ເຄື່ອງດື່ມ, ຜະລິດຕະພັນກະເສດ, ສະບຽງອາຫານ, ເຄື່ອງໃຊ້ສອຍໃນຄອບຄົວ, ເຄື່ອງສິລະປະຫັດຖະກຳ… ເໝາະສົມກັບຄວາມຕ້ອງການຂອງຜູ້ບໍລິໂພກຢູ່ ເຢຍລະມັນ ເວົ້າສະເພາະ ແລະ ສະຫະພາບເອີລົບເວົ້າລວມ. ທ່ານ ຫວູບ໊າຝູ ຫົວໜ້າກົມສົ່ງເສີມການຄ້າ, ກະຊວງອຸດສາຫະກຳ ແລະ ການຄ້າ ຫວຽດນາມໃຫ້ຂໍ້ສັງເກດວ່າ:

ວິສາຫະກິດ ຫວຽດນາມ ໄດ້ຮັບຮູ້ ແລະ ມານະພະຍາຍາມຕອບສະໜອງບັນດາຄວາມຮຽກຮ້ອງຂອງຕະຫຼາດ ເຢຍລະມັນກໍ່ຄືຕະຫຼາດ ເອີລົບ, ສ້າງພື້ນຖານຢ່າງໝັ້ນແກ່ນໃຫ້ແກ່ການຮ່ວມມືດ້ານການຄ້າເພື່ອຜົນປະໂຫຍດຢ່າງແທດຈິງຂອງສອງຝ່າຍໃນອະນາຄົດ. ຜ່ານກອງປະຊຸມຄັ້ງນີ້, ບັນດາຝ່າຍຈະພ້ອມກັນແລກປ່ຽນຢ່າງເປີດອົກເປີດໃຈຊອກຮູ້ຊຶ່ງກັນແລະກັນຢ່າງຈະແຈ້ງກ່ວາກ່ຽວກັບຄວາມຕ້ອງການຂອງກັນ, ມຸ່ງໄປເຖິງການເຊັນສັນຍາຮ່ວມມື, ເພີ່ມທະວີການພົວພັນແລກປ່ຽນການຄ້າລະຫວ່າງ ຫວຽດນາມ - ເຢຍລະມັນ.

ປະຈຸບັນ, ເຢຍລະມັນ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງ ຫວຽດນາມ, ບໍ່ພຽງແຕ່ຢູ່ສະຫະພາບ ເອີລົບ ເທົ່ານັ້ນຫາກຍັງຢູ່ທົ່ວ ເອີລົບ ອີກດ້ວຍ. ນີ້ກໍ່ແມ່ນປະຕູສົ່ງຕໍ່ສິນຄ້າທີ່ສຳຄັນຂອງ ຫວຽດນາມ ໄປຍັງບັນດາຕະຫຼາດອື່ນໆ. ບັນດາປະເພດສິນຄ້າຂອງ ຫວຽດນາມ ສົ່ງອອກຕົ້ນຕໍໄປຍັງ ເຢຍລະມັນ ແມ່ນເກີບ, ເຄື່ອງຕ່ຳແຜ່ນຕັດຫຍິບ, ກາເຟ, ເຄື່ອງເຟີນີເຈີ, ເຄື່ອງສິລະປະຫັດຖະກຳ, ໂທລະສັບມືຖື, ຄອມພິວເຕີ ແລະ ເຄື່ອງອາໄຫຼ່…