(VOVWORLD) -ຕອນບ່າຍວັນທີ 30 ກັນຍາ, ຢູ່ສຳນັກງານລັດຖະບານ, ທ່ານນາງ ຫວໍທິແອ໊ງຊວັນ ຮອງປະທານປະເທດ ຫວຽດນາມ ໄດ້ເຈລະຈາທາງໂທລະສັບກັບທ່ານ Yemi Osinbajo ຮອງປະທານາທິບໍດີ ສາທາລະນະລັດ ສະຫະພັນ ນີເຊຣີ, ເພື່ອແນໃສ່ຊຸກຍູ້ການຮ່ວມມືສອງຝ່າຍ ຫວຽດນາມ - ນີເຊຣີ.
 ທ່ານນາງ ຫວໍທິແອ໊ງຊວັນ ຮອງປະທານປະເທດ ຫວຽດນາມ ເຈລະຈາທາງໂທລະສັບກັບທ່ານ Yemi Osinbajo ຮອງປະທານາທິບໍດີ ສາທາລະນະລັດ ສະຫະພັນ ນີເຊຣີ (ພາບ: TTXVN) |
ໃນການເຈລະຈາທາງໂທລະສັບ, ການນຳສອງປະເທດໄດ້ຢັ້ງຢືນການຖືເປັນສຳຄັນ ແລະ ມີຄວາມປາດຖະໜາຢາກຍົກສູງປະສິດທິຜົນໃນການຮ່ວມມືລະຫວ່າງສອງຝ່າຍໃນໄລຍະຈະມາເຖິງ, ແລກປ່ຽນກ່ຽວກັບບັນດາມາດຕະການລະອຽດຄື: ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ທຸກຂະແໜງການ, ເປັນຕົ້ນແມ່ນຄະນະຜູ້ແທນຂັ້ນສູງ. ສອງຝ່າຍໄດ້ເຫັນດີເປັນເອກະພາບຈະຍູ້ແຮງການເຄື່ອນໄຫວສົ່ງເສີມການຄ້າ ແລະ ການລົງທຶນ, ຊຸກຍູ້ການຮ່ວມມືດ້ານພະລັງງານ, ກະສິກຳ, ການສຶກສາ, ກິລາ…
ກ່ຽວກັບກອບນິຕິກຳ, ສອງຝ່າຍໄດ້ເຫັນດີເປັນເອກະພາບ ຈະຊຸກຍູ້ການເຈລະຈາ ແລະ ລົງນາມບັນດາຂໍ້ຕົກລົງ ເພື່ອແນໃສ່ສ້າງເງື່ອນໄຂສະດວກໃຫ້ແກ່ການຮ່ວມມື ໃນຫຼາຍດ້ານລະຫວ່າງສອງປະເທດ. ສອງຝ່າຍກໍ່ເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນແລະກັນ ຢູ່ເວທີປາໄສຫຼາຍຝ່າຍ, ພິເສດແມ່ນ ສປຊ, ສະຫະພາບ ອາບຟຼິກກາ…
ກ່ຽວກັບໂລກລະບາດໂຄວິດ - 19, ສອງຝ່າຍຢັ້ງຢືນວ່າ ຈະສະໜັບສະໜູນຄວາມມານະພະຍາຍາມເພີ່ມທະວີຄວາມສາມາດໃນການສຳຜັດກັບວັກຊິນ ກັນໂຄວິດ - 19 ຂອງບັນດາປະເທດພວມພັດທະນາ, ຖ່າຍທອດເຕັກໂນໂລຢີໃນການຜະລິດວັກຊິນ.