(vovworld) – ຍົກສູງກຳລັງຄວາມສາມາດນຳພາ ແລະ ກຳລັງຕໍ່ສູ້ເພື່ອສຳເລັດພາລະກຳນຳພາປະເທດຊາດ - ນີ້ແມ່ນຄຳຢືນຢັນຂອງທ່ານເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຟູ໋ຈ້ອງ ໃນການຕອບສຳພາດຕໍ່ນັກຂ່າວ VOV ເນື່ອງໃນໂອກາດບຸນປີໃໝ່ປະຈຳຊາດ ປີມະເມຍ 2014. ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ ແລ້ວ, ກຳລັງແຮງຂອງພັກກອມມູນິດ ຫວຽດນາມ ແມ່ນສາຍສຳພັນເລືອດເນື້ອກັບ ປະຊາຊົນ, ກໍ່ຄືກຳລັງແຮງຂອງປະຊາຊົນແມ່ນເລີ່ມມາຈາກການນຳພາຂອງພັກ. ທ່ານຢືນຢັນວ່າ:
“ພັກຕ້ອງຢູ່ໃຕ້ການຕິດຕາມກວດກາຂອງປະຊາຊົນ, ຮັບຟັງຄຳເຫັນຈາກປະຊາຊົນ, ມີຄວາມຜູກພັນຢ່າງສະໜິດແໜ້ນກັບປະຊາຊົນ. ເຮັດໄດ້ຄືແນວນັ້ນຈຶ່ງສົມເປັນຜູ້ນຳ, ຜູ້ຈັດຕັ້ງທຸກໆໄຊຊະນະຂອງການປະຕິວັດ ຫວຽດນາມ, ແມ່ນຜູ້ນຳພາສັງຄົມ, ນຳພາລັດ, ນຳພາປະຊາຊົນ, ສົມເປັນກອງກຳລັງປະຈັບບານຂອງຊົນຊັ້ນກຳມະກອນ, ພ້ອມທັງເປັນກອງກຳລັງປະຈັນບານຂອງຊາວຜູ້ອອກແຮງງານ ແລະ ທົ່ວປວງຊົນທັງຊາດ, ແມ່ນຜູ້ແທນທີ່ຈົ່ງຮັກພັກດີໃຫ້ແກ່ຜົນປະໂຫຍດຂອງຊົນຊັ້ນກຳມະກອນ, ປະຊາຊົນຜູ້ອອກແຮງງານ ແລະ ທົ່ວທັງຊາດ.”
ທ່ານເລຂາທິການໃຫຍ່ ຫງວຽນຟູ໋ຈ້ອງ ຢືນຢັນວ່າ: ປະຕິບັດວຽກງານປ້ອງກັນ, ຕ້ານການສໍ້ລາດບັງຫຼວງກໍ່ແມ່ນໜ້າທີ່ເປັນປະຈຳເພື່ອສ້າງສາພັກຢ່າງປອດໃສ, ໝັ້ນຄົງ, ເຂັ້ມແຂງ. ໃນປີ 2014, ວຽກງານປ້ອງກັນ, ຕ້ານການສໍ້ລາດບັງຫຼວງກໍ່ໄດ້ຮັບການຍູ້ແຮງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ:
“ເວລາຜ່ານມາ, ຕາມມະຕິຂອງສູນກາງພັກ ແລະ ກົມການເມືອງ, ຄະນະຊີ້ນຳການສະຫລຸບ 30 ປີແຫ່ງການປ່ຽນໃໝ່ໄດ້ຮັບການສ້າງຕັ້ງ ແລະ ປະຈຸບັນພວມໄດ້ຮັບການຜັນຂະຫຍາຍຢ່າງຕັ້ງໜ້າ. ເນື້ອໃນການສະຫລຸບຕ້ອງຮອບດ້ານ. ຈຸດສຸມເລັ່ງໃສ່ບັນດາບັນຫາໃໝ່ທີ່ຫຍຸ້ງຍາກ, ທີ່ຍັງຄົງຄ້າງຕ້ອງໄດ້ຮັບການແກ້ໄຂ. ຕົວຢ່າງຄື: ເສດຖະກິດການຕະຫຼາດກຳນົດທິດສັງຄົມນິຍົມ, ການພົວພັນລະຫວ່າງຕະຫຼາດກັບບົດບາດຄຸ້ມຄອງ, ບໍລິຫານຂອງລັດ....”
ເນື່ອງໃນໂອກາດບຸນປີໃໝ່ປະຈຳຊາດປີມະເມຍ 2014, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ສົ່ງຄຳຢື້ຢາມຖາມຂ່າວ ແລະ ຄຳອວຍພອນປີໃໝ່ອັນດີງາມເຖິງພໍ່ແມ່ພີ່ນ້ອງ, ນັກຮົບໃນທົ່ວປະເທດ ແລະ ຊາວ ຫວຽດນາມ ອາໄສຢູ່ຕ່າງປະເທດ. ທ່ານເລຂາທິການໃຫຍ່ ປາດຖະໜາ ແລະ ອວຍພອນໃຫ້ທົ່ວພັກ, ທົ່ວກອງທັບ, ທົ່ວປວງຊົນ ຫວຽດນາມ ກ້າວໄປສູ່ປີໃໝ່ຈົ່ງສາມັກຄີເປັນຈິດໜຶ່ງໃຈດຽວ, ເຊື່ອໝັ້ນຢ່າງແນວແນຕໍ່ພັກ, ຕໍ່ອະນາຄົດແຫ່ງການພັດທະນາຂອງປະເທດຊາດເພື່ອພ້ອມກັນກ້າວເຂົ້າສູ່ປີໃໝ່ດ້ວຍເຈດຈຳນົງ, ຄວາມຕັດສິນໃຈໃໝ່ສ້າງສາປະເທດ ຫວຽດນາມ ບື່ນຕົວຂຶ້ນລະດັບສູງໃໝ່.