ວັນທີ 26 ພະຈິກ, ມີກຸ່ມສະມາຊິກສະພາແຫ່ງຊາດ ສ. ເກົາຫຼີ ກຸ່ມໜຶ່ງໄດ້ໄປຢ້ຽມຢາມເກາະແຫ່ງໜຶ່ງໃນໝູ່ເກາະ Dokdo ທີ່ຍັງມີຄວາມຂັດແຍ້ງກັນກັບຍີ່ປຸ່ນ ໃນທະເລ ຮວາຕູງ, ເຮັດໃຫ້ ໂຕກຽວ ໄດ້ອອກສຽງຄັດຄ້ານ ແລະ ກໍ່ໃຫ້ເກີດຄວາມເຄັ່ງຕຶງໃນການພົວພັນສອງຝ່າຍ. ກ່າວຄຳເຫັນທີ່ການຖະແຫຼງຂ່າວປະຈຳໄລຍະ, ທ່ານ Yoshihide Suga, ຫົວໜ້າຫ້ອງວ່າການຄະນະລັດຖະບານ ຍີ່ປຸ່ນ ໃຫ້ຮູ້ວ່າ: “ມີກຸ່ມສະມາຊິກສະພາແຫ່ງຊາດ ສ. ເກົາຫຼີ ກຸ່ມໜຶ່ງ ໄດ້ໄປຍັງໝູ່ເກາະ Takeshima ໂດຍບໍ່ຫົວຊາຕໍ່ການຄັດຄ້ານ ແລະ ຄຳຮຽກຮ້ອງກ່ອນນັ້ນຂອງ ຍີ່ປຸ່ນ ກ່ຽວກັບການຍົກເລິກການຢ້ຽມຢາມນີ້. ຕາມທັດສະນະຂອງປະເທດພວກຂ້າພະເຈົ້າກ່ຽວກັບອະທິປະໄຕຕໍ່ Takeshima ແລ້ວ, ສິ່ງດັ່ງກ່າວແມ່ນບໍ່ສາມາດຍອມຮັບໄດ້.”

        ກ່ອນໜ້ານັ້ນ, ໃນວັນທີ 22 ຕຸລາ, ມີກຸ່ມສະມາຊິກສະພາແຫ່ງຊາດຂຶ້ນກັບພັກຝ່າຍຕ່າງໆຂອງ ສ. ເກົາຫຼີ ກໍ່ໄດ້ພ້ອມກັນດຳເນີນການໄປຢ້ຽມຢາມໝູ່ເກາະ Dokdo ນີ້. ຕາມ ຫ້ອງການປະທານກຳມາທິການການສຶກສາ ສ. ເກົາຫຼີ ແລ້ວ, ຈຸດປະສົງຂອງການຢ້ຽມຢາມແມ່ນເພື່ອແນໃສ່ປະຕິເສດຖະແຫຼງການອະທິປະໄຕຂອງຍີ່ປຸ່ນໃນປື້ມຕຳລາຮຽນທີ່ວ່າ ໝູ່ເກາະແຫ່ງນີ້ແມ່ນເຂດນ້ຳແດນດິນຂອງຍີ່ປຸ່ນ ແລະ ເຜີຍແຜ່ “ວິທີເຂົ້າໃຈຢ່າງຖືກຕ້ອງດ້ານປະຫວັດສາດ”.