ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ກ່າວໃນພິທີຖະແຫລງຂ່າວ ໃນຕອນບ່າຍ ວັນທີ 26 ມີນາ ນີ້ວ່າ: ຈຳນວນ 3 ກໍລະນີ ທີ່ຕິດເຊື້ອເພີ່ມ ຄື 1 ເພດຊາຍ ອາຍຸ 42 ປີ ຢູ່ບ້ານປ່ອງຄຳ ນະຄອນຫລວງພະບາງ ແຂວງຫລວງພະບາງ, 2 ເພດຊາຍ ອາຍຸ 52 ປີ ຢູ່ບ້ານວິຊຸນ ນະຄອນຫລວງພະບາງ ແຂວງ ຫລວງພະບາງ, ເຊິ່ງທັງສອງກໍລະນີ ເປັນພະນັກງານຂັບລົດໃຫ້ແກ່ກຸ່ມ ນັກທ່ອງທ່ຽວທີ່ຢັ້ງຢືນການຕິດເຊື້ອ. ສໍາລັບກໍລະນີທີ 3 ເປັນເພດຊາຍ ອາຍຸ 41 ປີ ຢູ່ບ້ານຈຳປາ ເມືອງສີໂຄດຕະບອງ ນະຄອນຫລວງວຽງຈັນ, ເປັນຜູ້ສຳຜັດໃກ້ຊິດກັບກໍລະນີ ຕິດເຊື້ອຜູ້ທີສາມ (ນັກທຸລະກິດ). ປັດຈຸບັນ, ສອງກໍລະນີ ກຳລັງໄດ້ຮັບປິ່ນປົວ ຢູ່ໂຮງໝໍແຂວງຫລວງພະບາງ ແລະ ອີກກໍລະນີໜຶ່ງ ປິ່ນປົວຢູ່ໂຮງໝໍມິດຕະພາບ ຕາມຫລັກວິຊາການ ໂດຍທັງສາມຄົນມີ ອາການຂັ້ນເບົາບາງ.