ຍູ້ແຮງການຮ່ວມມືດ້ານປ້ອງກັນຊາດ ລະຫວ່າງ ຫວຽດນາມ - ມາເລເຊຍ
(VOVWORLD) - ຕອນບ່າຍວັນທີ 5 ທັນວາ, ຢູ່ສຳນັກງານກະຊວງປ້ອງກັນປະເທດ, ທ່ານ ພົນໂທ ຟານວັນຢາງ, ຫົວໜ້າເສນາທິການໃຫຍ່ ກອງທັບປະຊາຊົນ ຫວຽດນາມ, ຮອງລັດຖະມົນຕີກະຊວງປ້ອງກັນປະເທດ ໄດ້ໃຫ້ການຕ້ອນຮັບທ່ານ Liew Chin Tong ຮອງລັດຖະມົນຕີ ກະຊວງປ້ອງກັນປະເທດ ມາເລເຊຍ.
 ທ່ານພົນໂທ ຟານວັນຢາງ (ພາບ: TTXVN) |
ສອງຝ່າຍໄດ້ຢັ້ງຢືນວ່າ ການພົວພັນໃນການປ້ອງກັນຊາດ ລະຫວ່າງ ຫວຽດນາມ - ມາເລເຊຍ ໃນໄລຍະທີ່ຜ່ານມາ ໄດ້ຮັບການພັດທະນາຢ່າງຕັ້ງໜ້າ, ເປັນຕົ້ນແມ່ນບັນດາຂົງເຂດຄື: ບຳລຸງສ້າງ, ຮ່ວມມືກອງທັບເຮືອ, ສົມທົບກັນຢູ່ບັນດາເວທີປາໄສຫຼາຍຝ່າຍ… ພ້ອມທັງເນັ້ນໜັກວ່າ ການຮ່ວມມືດ້ານປ້ອງກັນຊາດສອງຝ່າຍມີເງື່ອນໄຂຫຼາຍຢ່າງເພື່ອພັດທະນາຢ່າງແຮງກ່ວາອີກເໝາະສົມກັບການພົວພັນຄູ່ຮ່ວມມື ຍຸດທະສາດ ຫວຽດນາມ - ມາເລເຊຍ.
ທ່ານ ພົນໂທ ຟານວັນຢາງ ໃຫ້ຮູ້ວ່າ ກະຊວງປ້ອງກັນປະເທດ ຫວຽດນາມ ມີຄວາມປາດຖະໜາວ່າ ຈະສືບຕໍ່ໄດ້ຮັບການສະໜັບສະໜູນ ແລະ ການຮ່ວມມືຢ່າງແໜ້ນແຟ້ນຂອງ ກະຊວງປ້ອງກັນປະເທດ ມາເລເຊຍ ເມື່ອ ຫວຽດນາມ ດຳລົງຕຳແໜ່ງເປັນປະທານອາຊຽນ ໃນປີ 2020.