(vovworld) – ບັນດາສຳນັກຂ່າວສານຂອງ ອິນເດຍ ໃຫ້ຮູ້ວ່າ, ວັນທີ 25/6, ກຳລັງ ຕາລີບານ ໄດ້ຈັດຕັ້ງການບຸກໂຈມຕີເຂົ້າສຳນັກງານລັດຖະບານ ອາບການິດສະຖານ ຢູ່ ນະຄອນຫຼວງ Kabul. ການບຸກໂຈມຕີຖືກດຳເນີນຢູ່ເຂດໃຈກາງເມືອງ Shash Darak, ເຊິ່ງແມ່ນແຫ່ງທີ່ຕັ້ງສຳນັກງານຂອງບາງອົງການຕາງໜ້າຕ່າງປະເທດ ແລະ ອົງການແຫ່ງລັດທີ່ໄດ້ຮັບການປົກປ້ອງຢ່າງເຂັມງວດ, ເລີ່ມແຕ່ເວລາ 6 ໂມງ 30 ນາທີຕອນເຊົ້າ (ຕາມເວລາທ້ອງຖິ່ນ). ກຳລັງທະຫານແຕກທັບໄດ້ເລີ່ມດຳເນີນການບຸກໂຈມຕີເຂົ້າປະຕູທາງທິດຕາເວັນອອກຂອງສຳນັກງານປະທານາທິບໍດີ, ບ່ອນທີ່ມີນັກຂ່າວນັບສິບຄົນພວມລຳຖ້າເຂົ້າຮ່ວມການປະຊຸມຂ່າວຂອງທ່ານປະທານາທິບໍດີ Hamid Karzai, ຄາດວ່າຈັດຕັ້ງໃນເວລາ 9 ໂມງຂອງວັນດຽວກັນ. ຫົວໜ້າຕຳຫຼວດ Kabul ທ່ານ Aoub Salangicho ໃຫ້ຮູ້ວ່າພາຍຫຼັງຍິງປືນກັບຕຳຫຼວດ, ພວກບຸກໂຈມຕີທຸກຄົນໄດ້ຖືກດັບສູນ. ຫລັງຈາກນັ້ນ, ໂຄສົກຂອງ ຕາລີບານ Zabihullah Mujahid ໄດ້ສົ່ງຂໍ້ຄວາມທີ່ວ່າ “ບາງຄົນທີ່ຍອມສະຫຼະເພື່ອສາສະໜາ” ໄດ້ບຸກໂຈມຕີສຳນັກງານປະທານາທິບໍດີ, ສຳນັກງານກະຊວງປ້ອງກັນປະເທດ ແລະ ໂຮງແຮມ Ariana (ບ່ອນຕັ້ງສຳນັກງານອົງການສືບລາຊະການລັບສູນກາງ ອາເມລິກາ - CIA).