(vovworld) - ຕອນທ່ຽງວັນທີ 18/02, ຕຳຫຼວດໄທ ເລີ່ມນຳໃຊ້ແກັດນ້ຳຕາເພື່ອຄວບຄຸມສະຖານທີ່ແຫ່ຂະບວນປະທ້ວງ ຢູ່ເຂດໜຶ່ງອ້ອມຂ້າງສຳນັກງານນາຍົກລັດຖະມົນຕີ, ຈັບຕົວຜູ້ນຳຄົນໜຶ່ງຈັດຕັ້ງການແຫ່ຂະບວນປະທ້ວງ. ຕາມແຫຼ່ງຂ່າວໃນເບື້ອງຕົ້ນຊີ້ໃຫ້ເຫັນວ່າ, ເລື່ອງຢືດເອົາຄືນສະຖານທີ່ແຫ່ຂະບວນປະທ້ວງໄດ້ພາໃຫ້ເກີດການປະທະກັນ, ເຮັດໃຫ້ຕຳຫຼວດ ແລະ ຜູ້ແຫ່ຂະບວນປະທ້ວງບາງຄົນຖືກບາດເຈັບ. ໃນຂະນະນັ້ນ, ກຳລັງແຫ່ຂະບວນປະທ້ວງຂອງທ່ານ ສຸເທບ ຍັງເຕົ້າໂຮມຢູ່ອ້ອມເຂດສຳນັກງານນາຍົກລັດຖະມົນຕີ. ບັນດາການນຳແຫ່ຂະບວນປະທ້ວງ ສືບຕໍ່ກ່າວຕຳນິຕິຕຽນການເຄື່ອນໄຫວຂອງລັດຖະບານຊົ່ວຄາວ ແລະ ຕຳຫຼວດເພື່ອແນໃສ່ຄວບຄຸມສະຖານທີ່ແຫ່ຂະບວນປະທ້ວງ, ພ້ອມທັງຮຽກຮ້ອງທຸກໆຄົນ ຈົ່ງເຂົ້າຮ່ວມການແຫ່ຂະບວນປະທ້ວງຂະໜາດໃຫຍ່ຕ້ານລັດຖະບານໃນວັນທີ 19/02.
ແລະກໍ່ໃນຕອນເຊົ້າວັນດຽວກັນ, ຕຳຫຼວດໄທ ໄດ້ຈັບຕົວທ່ານຣະວີ ມາດມາດົນ, ຫົວໜ້າຂະບວນການແຫ່ຂະບວນປະທ້ວງຕ້ານລັດຖະບານ ແລະ ຜູ້ແຫ່ຂະບວນປະທ້ວງໃນບັ້ນຮົບຢືດເອົາສິດຄວບຄຸມບັນດາສະຖານທີ່ແຫ່ຂະບວນປະທ້ວງຢູ່ນະຄອນຫຼວງບາງກອກ. ທ່ານປະທານສະພາປ້ອງກັນຄວາມສະຫງົບແຫ່ງຊາດໄທ ພະຣາດອນ ພັດທະນະຖາບຸດ ໃຫ້ຮູ້ວ່າ ມີຜູ້ແຫ່ຂະບວນປະທ້ວງປະມານ 100 ຄົນຖືກຈັບຕົວຢູ່ສຳນັກງານກະຊວງພະລັງງານ ຍ້ອນລະເມີດພະລາຊະດຳລັດສະພາວະສຸກເສີນ. ຕາມທ່ານ ພະຣາດອນ ພັດທະນະຖາບຸດ ແລ້ວ, ຕຳຫຼວດບໍ່ປະສົບກັບການຕ້ານຍັນໃດໆ. ທ່ານໃຫ້ຮູ້ຕື່ມອີກວ່າ, ຜູ້ແຫ່ຂະບວນປະທ້ວງກໍ່ເຫັນດີບໍ່ປິດລ້ອມເສັ້ນທາງພາໄປເຖິງສຳນັກງານລັດຖະບານ ຢູ່ຊານນະຄອນທາງທິດເໜືອນະຄອນຫຼວງບາງກອກ ເພື່ອສ້າງເງື່ອນໄຂສະດວກໃຫ້ບັນດາລັດຖະກອນໄປເຮັດວຽກ.
ວັນທີ 18/02, ໜັງສືພິມ Bangkok Post ໃຫ້ຂ່າວວ່າ , ຕຳຫຼວດໄທ ໄດ້ຢືດຄອງ ບັນດາສະຖານທີ່ແຫ່ຂະບວນປະທ້ວງຢູ່ ຖະໜົນໃຫຍ່ ວິພາວະດີ ລັງສີດ ຄືນໃໝ່. ໃນຂະນະນັ້ນ, ຜູ້ແຫ່ຂະບວນປະທ້ວງຢູ່ສຳນັກງານລັດຖະບານ ຍັງບໍ່ທັນໄດ້ຍົກເລີກ.